Read Ngaju 1 KRONIKA 15 Bible Online

1 KRONIKA 15 - Ngaju bible

1 KRONIKA 15

¹Dawid mampendeng kare huma akae kabuat intu Lewun Dawid, tuntang manatap akan eka Patin Janjin TUHAN palus mampendeng kemah akan eka mingkes Pati te.

² Dawid hamauh, “Baya oloh Lewi tau manggatang Patin Janjin TUHAN, awi ewen te je iintih TUHAN akan meton Pati te tuntang manempo Ie[27] sampai katatahie.”

³Palus Dawid mantehau hapus oloh Israel akan Yerusalem uka mindah Patin Janjin TUHAN akan eka je jari inatape.

⁴Balalu Dawid manyoho turonan Aron tuntang oloh Lewi hapumpong.

⁵Bara jalahan Kehat, suku Lewi dumah Uriel, je mamimpin 120 biti jalahan aie.

⁶Bara jalahan Merari dumah Asaya je mamimpin 220 biti.

⁷Bara bangsa Gerson dumah Yoël je mamimpin 130 biti.

⁸Bara jalahan Elsapan dumah Semaya je mangapala 200 biti.

⁹Bara jalahan Hebron dumah Eliel je mamimpin 80 biti.

¹⁰Tuntang bara jalahan Usiel dumah Aminadab je mamimpin 112 biti.

¹¹Palus Dawid mantehau Imam Sadok tuntang Imam Abyatar hayak jahawen biti oloh Lewi te, iete: Uriel, Asaya, Yoël, Semaya, Eliel, tuntang Aminadab.

¹²Koan Dawid dengan ewen, “Keton Pamimpin jalahan huang suku Lewi. Awi te, keleh keton tuntang kare oloh Lewi je beken mamparasih arep ewen mangat tau mindah Patin Janjin TUHAN, Hatallan Israel akan eka je jari inyadiaku.

¹³Metoh Pati te hong tingkat je solake iindah, keton jaton intu hete uka mimbite. Awi te TUHAN, Hatallan itah, mahukum itah awi itah manyembah Ie dia tumon kanahuang Aie.”

¹⁴Jadi, kare imam tuntang oloh Lewi mamparasih arep mangat tau mindah Patin Janjin TUHAN, Hatallan Israel.

¹⁵ Metoh Pati te iindah, ewen manggatange akan hunjun bahan ewen hapan kayu pikul, manumon atoran je inenga TUHAN mahalau Moses.

¹⁶Dawid kea manyoho kare pamimpin gagenep oloh Lewi te mangat manyoho pire-pire biti bara suku ewen uka manyanyi tuntang mampahiau kitara dengan simba huang kare lagu kahanjak.

¹⁷Bara marak keluarga je tukang manyanyi, ewen mintih kare oloh toh akan mampahiau simbal tambaga: Heman anak Yoël dengan tondah paharie je arae Asap anak Berekhya, tuntang Etan anak Kusaya bara jalahan Merari. Akan mampahayak ewen tuntang mampahiau kitara gantong auhe iintih kare oloh Lewi jetoh: Sakaria, Yaasiel, Semiramot, Yehiel, Uni, Eliab, Maaseya, tuntang Benaya. Akan mampahiau kitara randah auhe iintih kare oloh Lewi jetoh: Matica, Elipele, Mikneya, Asasa, tuntang due biti bara oloh je manjaga Human TUHAN, iete Obed-Edom tuntang Yeiel.

²²Kenanya intih akan mangapala kare tukang musik bara suku Lewi te, awi ie apik mampahiau pakakas musik.

²³Berekhya tuntang Elkana hayak Obed-Edom tuntang Yehia iintih jadi oloh je manjaga Patin Janjin TUHAN. Kare imam jetoh: Sebaya, Yosapat, Netaneel, Amasai, Sakaria, Benaya tuntang Elieser iintih akan mampahiau tarompet intu hila baun pati te.

²⁵Raja Dawid haguet hayak kare pamimpin oloh Israel tuntang kare pangkalima akan human Obed-Edom uka manduan Patin Janji te dengan pesta hai.

²⁶Uju sapi hatue tuntang uju tabiri inenga akan Hatalla awi Ie jari mandohop oloh Lewi je jari manggatang Patin Janji te.

²⁷Metoh te Dawid mahapan jubah bara lena lamos, kalote kea kare kapalan tukang musik tuntang Kenanya mamimpin ewen hayak kare oloh Lewi je manggatang Patin Janji te. Dawid kea mahapan baju epod.[28]

²⁸Hapus ungkup Israel haguet mampahayak Patin Janji sampai akan Yerusalem dengan auh lahap, auh tarompet, sarunai, simbal tuntang kitara.

²⁹Metoh Pati te imbit tame akan lewu, Mikhal anak bawi ain Saul manjengok bara baun sengok tuntang mite Raja Dawid manari hayak hanjak rantang. Balalu Mikhal handak muta.