Read Ngaju 1 KRONIKA 16 Bible Online

1 KRONIKA 16 - Ngaju bible

1 KRONIKA 16

¹Patin Janji te iingkes intu huang kemah je jari inyadia awi Dawid akan Pati te. Palus ewen maluput akan TUHAN parapah je ingehu tuntang parapah hapa badamai.

²Limbah Dawid hapus maluput parapah te, ie mamberkat rayat hapan aran TUHAN;

³palus ie mambagi panginan akan ewen samandiaie. Gagenep oloh je aton intu hete aloh hatue aloh bawi mandino ije kasayat sehei isin meto, rote tuntang wadai kismis.

⁴Dawid mangkat pire-pire oloh Lewi uka mangapala upacara iete sombayang akan TUHAN, Hatallan Israel, intu hila baun Patin Janji te, dengan nyanyi tuntang auh tara.

⁵Asap iintih kilau pamimpin je mambatang tuntang Sakaria wakile. Yeiel, Semiramot, Yehiel, Matica, Eliab, Benaya, Obed-Edom tuntang Yeiel inega gawi uka mampahiau kacapi. Asap inega gawi uka mampahiau simbal.

⁶tuntang due biti imam, iete Benaya tuntang Yahasiel, inenga uka sacara tetep mahimon tarompet intu baun Patin Janji te.

⁷Jete tingkat ije solake Dawid manenga gawi akan Asap tuntang kare sobate uka manyanyi tara akan TUHAN.

⁸Keleh manarimakasih akan TUHAN, keleh mambarita kahain Aie, nyarita gawin Aie hong marak kare bangsa.

⁹Keleh manyanyi tara akan TUHAN keleh mambarita kare gawin Aie je heran.

¹⁰Keleh hanjak awi itah Ayue; keleh uras oloh je manyembah Ie hanjak!

¹¹Laku kaabas Dengae, sembah Ie harajur.

¹²O turonan Yakob, rewar Hatalla! O turonan Israel, ungkup je intih Awie! Ingat uras taloh heran je ilalus Awie, ela mangalapean kare tukas Aie.

¹⁴TUHAN puna Hatallan itah kare tukas Aie ilalus hong hapus kalunen.

¹⁵Ie harajur mingat kare janjin Aie, janjin Aie akan katatahie.

¹⁶ Janji te inampa dengan Abraham, tuntang limbah te dengan Isaak,

¹⁷ palus indehen dengan Yakob jadi janji je katatahie akan ungkup Israel.

¹⁸Koae, “Tanah Kanaan kareh inenga-Ku akan keton indu pusaka akan keton.”

¹⁹Horan ungkup TUHAN belom kilau oloh bangsa beken intu hete ewen baya isut bewei.

²⁰Ewen manamuei bara bangsa akan bangsa je beken, mindah bara ije lewu akan lewu je beken.

²¹ Tapi TUHAN dia manalua eweh bewei mahenyek ewen; tagal ewen, kare raja impingate,

²²“Ela manderoh kare oloh intih-Ku, ela mawi kapapa dengan kare nabi aing-Ku.”

²³Nyanyi akan TUHAN, o hapus kalunen sanan kabar kahanjak genep andau tahiu Ie jari manyalamat itah,

²⁴Keleh manyarita kahain Aie akan kare bangsa, tuntang gawin Aie je menteng akan ungkup oloh kalunen.

²⁵Awi TUHAN te hai tuntang paham inara: Ie patut ingikeh labih bara kare dewa.

²⁶Kare dewa bangsa beken baya hampatong ngahus tapi TUHAN je manjapa kare langit.

²⁷Ie hasangkolep kahai tuntang kahalap, human Aie kontep kuasa tuntang kahanjak.

²⁸Tara akan TUHAN, o kare ungkup oloh! Tara tagal kahain Aie tuntang kaabas Aie

²⁹Tara akan aran Aie je bahalap tuntang imbit parapah akan huang human Aie Sembah TUHAN mahapan pakaian sombayang!

³⁰Keleh hagenjeh intu taharep Ie, o hapus kalunen! Kalunen dehen dia hagerek.

³¹O langit tuntang petak, keleh hanjak! Sanan akan kare bangsa je TUHAN te Raja!

³²Keleh tasik tuntang kare taloh huange mangguroh! Keleh hanjak o janah tuntang kare pambulae!

³³Kare batang kayu hong parak kayu kareh malahap awi TUHAN jari dumah uka marentah hong kalunen.

³⁴ Keleh manarimakasih akan TUHAN, awi Ie bahalap; sintan Aie palus katatahie.

³⁵Sanan, “O Hatalla, je manyalamat ikei, keleh manyalamat ikei bara kuasan kare bangsa tuntang mumpong ikei haluli mangat ikei tau manarimakasih tuntang manara aran Aim je barasih!”

³⁶Tara akan TUHAN, Hatallan Israel toh tuntang palus katatahie! Limbah te hapus ungkup Israel hamauh “Amen”, palus ewen manara TUHAN.

³⁷Limbah te Raja Dawid manyoho Asap tuntang kare oloh Lewi je beken uka tetep manantuani kare taloh handiai je perlu akan sombayang intu eka Patin TUHAN iingkes! Genep andau ewen musti bagawi intu hete.

³⁸Ewen indohop awi Obed-Edom anak Yedutun, hayak 68 biti oloh beken je ije kajalahan dengae. Obed-Edom tuntang Hosa iete kare oloh je manjaga kare lawang.

³⁹Tapi Sadok tuntang kare imam je beken inenga gawi uka tetep manantuani sombayang hong Gibeon.

⁴⁰Sining hanjewu tuntang halemei ewen musti maluput parapah je ingehu intu hunjun mesbeh tumon kare atoran je inenga TUHAN akan oloh Israel.

⁴¹Imam Sadok tuntang kare imam je indohop awi Heman tuntang Yedutun hayak kare oloh beken je tantai intih uka manyanyi tara akan TUHAN awi sinta je palus katatahie.

⁴²Heman tuntang Yedutun kea mampahiau tarompet, simbal tuntang pakakas musik je beken je impahiau akan mampahayak kare nyanyi tara. Kare oloh jalahan Yedutun inyoho manjaga kare lawang.

⁴³ Limbah te uras oloh buli akan genep humae. Kalote kea Dawid buli uka manyengok keluargae.