Read Ngaju 1 KRONIKA 17 Bible Online

1 KRONIKA 17 - Ngaju bible

1 KRONIKA 17

¹Limbah Raja Dawid manetep intu istanae, sinde andau ie mantehau Nabi Natan tuntang hamauh, “Item, aku toh melai intu istana je inampa bara kayu seder, tapi Patin Janjin TUHAN baya intu huang kemah!”

²Natan tombah, “Lalus uras kahandak niat tuan raja awi Hatalla mandohop tuan raja.”

³Tapi huang alem te Hatalla hamauh dengan Natan,

⁴“Lius tuntang nyampai akan rewar-Ku Dawid peteh toh, ‘Dia ikau je mampendeng huma akang-Ku.

⁵Bara bangsa Israel imbebasku bara Misir sampai toh, hindai puji aku melai huang ije huma. Harajur Aku manamuei tuntang melai intu kemah.

⁶Katahain panamuei-Ku hayak bangsa Israel hindai puji Aku misek dengan kare pamimpin je jari intih-Ku, en sababe ewen dia mampendeng ije huma bara kayu sader akang-Ku.’

⁷Awi te, Natan, sanan akan rewar-Ku Dawid je Aku, TUHAN Pangkahai, hamauh dengae, ‘Ikau jari induang-Ku bara gawim manyakatik tabiri intu padang oru, tuntang iawi-Ku jadi raja akan ungkup-Ku Israel.

⁸Aku jari mandohop ikau akan kueh bewei ikau haguet, tuntang uras musohm impalomos-Ku katika ikau parang kalahi. Ikau kareh iawiku basewut kilau kare pamimpin je paling hai hong kalunen.

⁹Akan ungkup-Ku Israel jari inyadia-Ku eka indu petak danum ewen mangat ewen tau belom damai dia inderoh tinai. Bara panumah ewen akan eka toh horan, tuntang sahindai ewen aton raja, ewen inyarang kare oloh je rajin kakaras. Tapi toh hal te dia akan manjadi hindai. Aku banjaji akan mampakalah uras musohm, tuntang Aku akan manenga turonan akam.

¹¹Kareh, amon umurm hapus tuntang ikau ingubur intu kubur tato hiangm, ije bara anakm kareh iangkatku jadi raja. Ie te je kareh mampendeng huma akangku. Karajae kareh indehengku, tuntang sampai katatahie ije biti bara turonae kareh marentah kilau raja.

¹³ Aku kareh jadi bapae tuntang ie kareh jadi anak-Ku. Aku kareh tetep malalus kahalap akae tumon je ilalus-Ku dengan Saul je jari indah-Ku bara karusie mangat ikau tau jadi raja.

¹⁴Anakm je intih-Ku te kareh iawi-Ku raja akan ungkup-Ku tuntang karajaang-Ku palus katatahie. Anak esoe gilir-manggilir kareh marentah kilau raja.’ ”

¹⁵Natan mansanan akan Dawid uras taloh je jari inyampai Hatalla akae.

¹⁶Palus Raja Dawid tame akan huang Kemah TUHAN. Ie mondok tuntang balakudoa, “O TUHAN, Hatalla, aku tuntang keluargaku dia patut manarima hapus kahalap je imparahan Awimakangku katahin toh.

¹⁷Ikau mawi labih bara te haream. Ikau jari hajanji tahiu turonangku akan wayah je inaharep. Ikau mawi aku kilau oloh hai haream.[29]

¹⁸Narai hindai je tau ingotakku Akam, o TUHAN, Hatalla? Ikau katawan uras tahiu rewarm toh, tapi Ikau manenga hormat akangku.

¹⁹Tagal kanahuangku kabuat tuntang akan kapentingangku Ikau mawi uras gawi hai toh dengan tara-tarang.

²⁰Baya ikau te Hatalla, jaton je sama Dengam. Ikei katawan jete awi jari insanan bara horan.

²¹Intu hapus kalunen dia aton bangsa kilau Israel. Israel te tonggal ije bangsa je imbebas Awim bara kajipen uka manjadi ungkup Ayum kabuat. Uras gawi hai tuntang heran je ilalus Awim akan ewen mawi aram basewut intu hapus kalunen. Ikau malapas ungkup Ayum bara Misir, tuntang manyare kare bangsa beken metoh ungkupm miar parang kalahi.

²²Bangsa Israel jadi iawim ungkupm kabuat sampai katatahie. Tuntang Ikau, o TUHAN, jadi Hatallan ewen.

²³Toh, o Hatalla keleh mandehen sampai katatahie janji je insanan Awim tahiu arepku tuntang turonangku. Keleh malalus taloh je jari injanji Awim te.

²⁴Intu hete-hete oloh kareh harajur mampahai aran Aim tuntang hamauh, ‘TUHAN Pangkahai iete Hatallan Israel.’ Sampai katatahie ije bara turonangku kareh marentah kilau raja.

²⁵Aku mampahanyi arep mansanan lakudoa toh Akam, o Hatalla, awi ikau kabuat jari mansanan akangku je anak esongku gilir-manggilir kareh inampa Awim jadi raja akan bangsa toh.

²⁶Ikau, TUHAN, iete Hatalla, tuntang taloh je bahalap te jari injanji Awim akangku.

²⁷Awi te, aku balaku, keleh mamberkat turonangku, mangat katatahie ewen tetep mangkeme sintan Aim. Awi, Ikau jari mamberkat ungkup Ayum, o TUHAN, palus ewen kareh tetep imberkat sampai katatahie.”