Read Ngaju 1 KRONIKA 18 Bible Online

1 KRONIKA 18 - Ngaju bible

1 KRONIKA 18

¹Pire-pire katahie limbah te Raja Dawid manyarang tuntang mampakalah oloh Pilistin hayak marabut lewu Gad dengan kare desa tokepe.

²Dawid kea mampakalah oloh Moab sampai ewen mamenda tuntang mambayar pajak akae.

³Limbah te Dawid mampakalah Hadadeser, raja intu Soba tokep tanah Hamat hong lewu Siria. Metoh te Hadadeser metohe hong pangguete uka manguasa tanah tokep hila ngaju Sungei Euprat.

⁴Dawid marabut 1.000 kareta parang, tuntang manawan 7.000 biti tantara bakuda hayak 20.000 biti tantara mananjong pai. Ie mampalemo-lupek uras kuda, kacuali belahe, sukup akan 100 kereta parang.

⁵Oloh Siria bara Damaskus mangirim tantara akan mandohop Raja Hadadeser, tapi Dawid mampakalah ewen tuntang mampatei 22.000 biti.

⁶Limbah te ie mampendeng kare eka kemah militer hong tanah ewen tuntang ewen mamenda hayak mambayar upeti akae. TUHAN manenga kamanang akan Dawid hong kueh bewei ie baparang.

⁷Kare talawang amas je ihapan awi tantara Hadadeser irampas awi Dawid tuntang imbit akan Yerusalem.

⁸ Beken bara te Dawid kea manduan are toto tambaga bara Tibhat tuntang Kun, kare lewu je bihin inguasa awi Hadadeser. (Hong rahian andau kare tambaga te ihapan awi Salomo akan mawi bak, hayak kare jihi tuntang pakakas sombayang intu Human TUHAN).

⁹Raja Tou bara Hamat mahining je Dawid jari mampakalah hapus tantara Hadadeser.

¹⁰Ie balaku mangirim Yoram anake hatue akan manyampai tabe akan Raja Dawid tuntang salamat tagal kamanange te awi Hadadeser kinjap baparang dengan Tou. Yoram dumah tanggoh Dawid dengan mimbit are hadiah amas, perak tuntang tambaga.

¹¹Raja Dawid manenga uras hadiah te akan TUHAN uka ihapan huang upacara sombayang. Kalote kea iawie dengan kare ramo amas tuntang perak je jari irabut bara Hadadeser tuntang kare bangsa je impakalahe, iete bangsa Edom, Moab, Amon, Pilistin tuntang Amalek.

¹² Abisai (indue bagare Seruya) mampakalah tuntang mampatei 18.000 oloh Edom intu Janah Uyah.

¹³Ie mampendeng kare eka kemah militer intu hapus Edom. Maka oloh Edom mamenda Raja Dawid. TUHAN menenga kamanang akan Dawid hong kueh bewei ie baparang.

¹⁴Kalote Dawid marentah hapus Israel tuntang manjaga mangat rayat harajur iawi adil tuntang bahalap.

¹⁵Jetoh kare pajabat tinggi je iangkat awi Dawid. Pangkalima angkatan bersenjata: Yoab kaka Abisai Sekretaris istana: Yosapat anak Ahilud Kare imam: Sadok anak Ahitub tuntang Ahimelekh anak Abyatar Sekretaris negara: Sausa[30] Kapala pangawal pribadi raja: Benaya anak Yoyada. Kare anak hatue ain Dawid mimbing jabatan je mambatang huang pamarentahan.