Read Ngaju 1 KRONIKA 19 Bible Online

1 KRONIKA 19 - Ngaju bible

1 KRONIKA 19

¹Pire-pire katahine limbah te Nahas raja Amon matei, tuntang Hanun anake jadi raja.

²Palus hamauh Raja Dawid, “Nahas paharingku je baketep, awi te aku musti kalote kea dengan Hanun, anake.” Tagal te Dawid mangirim sarohan akan lewu Amon akan mampong ie awi pampatei bapae. Katika ewen sampai intu Amon,

³kare pamimpin lewu te hamauh dengan Raja Hanun, “Ela baginda manirok Raja Dawid mangirim sarohae te awi ie handak mahormat bapa baginda! Ie mangirim kare oloh te akan hetoh kilau pangalati akan mangalati lewun itah, mangat tau marabute!”

⁴Raja Hanun manangkap kare sarohan Dawid te, manetek janggot ewen, manggunting pakaian ewen sampai akan kahang, tuntang manyoho ewen haguet buli.

⁵Tapi ewen mahamen buli, awi te ewen haguet akan Yerikho. Metoh taloh te insanan akan Dawid, ie mangirim peteh uka kare sarohan te melai intu Yerikho sampai janggut ewen manjadi lembut tinai.

⁶Palus raja Hanun tuntang oloh Amon kasene je gawin ewen jari mambuku Dawid mamusoh ewen. Awi te ewen mangirim 34.000 kilogram perak akan tanah Mesopotamia Hunjun, hayak akan Maakha tuntang Soba intu Siria akan manyewa 32.000 kareta parang tuntang tantara bakuda. Palus dumah tantara Maakha dengan hapus kareta parang sewaan te tuntang bakemah tokep Medeba. Oloh Amon kea dumah bara hapus lewun ewen akan baparang.

⁸Metoh Dawid mahining taloh te ie manyoho Yoab dengan hapus angkatan parange miar malawan musoh.

⁹Oloh Amon balua tuntang mator barisan ewen intu baun lawang Raba, lewu je mambatang ain ewen, sadang kare raja je jari dumah akan mandohop ewen, mator barisae intu janah.

¹⁰Yoab mite je ie hapit awi pasukan musoh intu baun tonggang intu likut. Awi te ie mintih tantara Israel je pangkalepe tuntang mandak ewen hataharep dengan tantara Siria.

¹¹Kalabiee inyarah akan Abisai andie, je mator barisan ewen hataharep dengan tantara Amon.

¹²Yoab hamauh dengan andie te, “Amon aku dia olih hindai batahan taharep tantara Siria, golong dumah mandohop aku. Kabalikae amon ikau dia olih hindai batahan taharep tantara Amon, aku kareh dumah mandohop ikau.

¹³Mente-menteng wei, ayu itah kalahi dengan kahanyi akan bangsa itah tuntang akan kare lewun Hatallan itah. Keleh TUHAN malalus taloh je eka kahandak Aie.”

¹⁴Yoab tuntang pasukae manyarang, sampai tantara Siria hadari.

¹⁵Metoh oloh Amon mite tantara Siria hadari, ewen kea hadari bara Abisai tuntang mundur akan huang lewu. Limbah mamarang oloh Amon, Yoab buli akan Yerusalem.

¹⁶Oloh Siria jari kasene je ewen jari impakalah awi oloh Israel. Palus ewen mantehau tantara ewen je bara tanah hila timor Sungei Euprat tuntang manyoho tantara te batampur hong penda pimpinan Sobakh pangkalima angkatan parang Hadadeser raja Soba.

¹⁷Mahining taloh te, Dawid mangumpul hapus pasukan Israel, palus dimpah Sungei Yordan tuntang mator barisae hataharep dengan oloh Siria. Palus ewen batampur,

¹⁸tuntang tantara Siria imukul mundur awi tantara Israel. Dawid tuntang pasukae mampatei 7.000 biti panongkang kareta tuntang 40.000 tantara mananjong pai. Sobakh pangkalima Siria te impatei kea.

¹⁹Metoh kare raja je inguasa Hadadeser mite je ewen jari impakalah awi tantara Israel, ewen balaku badamai dengan Dawid, tuntang mamenda ie. Limbah te oloh Siria dia maku hindai mambantu oloh Amon.