Read Ngaju 1 KRONIKA 21 Bible Online

1 KRONIKA 21 - Ngaju bible

1 KRONIKA 21

¹Setan handak mancalaka oloh Israel; awi te ie ngantau Dawid uka mawi sensus.

²Dawid hamauh dengan Yoab tuntang kare pangkalima tantarae, “Awi sensus intu hapus Israel sampai akan sero-serok, karana aku handak katawan pire jumlah rayat Israel.”

³Tombah Yoab, “Keleh TUHAN mandahang rayat Israel sampai saratus lipet bara jumlah ewen katika toh. Raja, en dia jari tarang je ewen mamenda raja? Mbuhen musti mawi mawi? Kareh, awi kasalan toh, hapus bangsa mananggong kasalae!”

⁴Tapi raja tetep huang prentahe te, palus Yoab haguet akan hapus Israel, sampai akan sero-seroke, limbah te haluli akan Yerusalem;

⁵ie mansanan akan Raja Dawid hasil sensus te. Jumlah oloh hatue je sanggam jadi tantara aton 1.100.000 biti, intu Israel tuntang 470.000 biti intu Yuda.

⁶Tapi suku Lewi tuntang suku Benyamin dia tame jumlah te. Yoab dia mawi cacah intu marak ewen awi ie dia rajin malalus parentah raja te.

⁷Hatalla dia sanang dengan sensus te tuntang Ie mahukum oloh Israel.

⁸Palus Dawid balakudoa intu Hatalla koae, “O Hatalla, aku paham badosa! Keleh mampun aku, awi gawingku te paham humong,”

⁹TUHAN hamauh dengan Nabi Gad, je hajamban ie TUHAN manyampai peteh Aie akan Dawid.

¹⁰“Lius mansanan akan Dawid je Aku manenga telo paintih akae. Narai bewei je iintihe kareh ilalus-Ku.”

¹¹Palus Gat haguet tanggoh Dawid tuntang manyampai peteh TUHAN te, koae, “Kueh je intih Raja:

¹²Lewu toh buah lau katahin telo nyelo, atawa Raja hadari inggoa-goang musoh katahin telo bulan, atawa hapus lewu toh telo andau katahie inyarang TUHAN dengan padang peres tuntang malekat Ayue mimbit pampatei akan hete-hete. Nukas metoh toh kea taloh je akan inyampaiku akan TUHAN.”

¹³Dawid tombah, “Kayah, calaka aku! Tapi bara ihukum kalunen, labih bahalap aku ihukum TUHAN, awi hai kasayange.”

¹⁴Palus TUHAN mampadumah panyakit akan oloh Israel sampai 70.000 biti hong marak ewen matei.

¹⁵Limbah te TUHAN manyoho ije biti malekat akan mambinasa Yerusalem. Tapi metoh malekat te jari sampai tokep eka mihik gandom ayun Arauna oloh Yebusi, TUHAN mobah tukas Aie je akan mahukum bangsa te. Ie hamauh dengan malekat te, “Sukup! Tende!”

¹⁶Dawid mite malekat te aton helat langit tuntang petak. Dengan padang intu lenge, melekat te tatap akan mambinasa Yerusalem. Palus Dawid dengan kare pamimpin rayat, je metoh te hapakaian kampil tanda manyasal, sontop akan petak.

¹⁷Dawid balakudoa, koae, “O Hatalla, aku toh je sala. Aku toh je manyoho mawi sensus te. Bangsa toh samasinde dia sala! O TUHAN, Hatallangku, hukum aku tuntang keluarga ayungku, tapi ngejau calaka toh bara ungkup Ayum.”

¹⁸Palus malekat TUHAN manyoho Gad manyampai akan Dawid je ie musti mandai akan eka mihik gandom ayun Arauna tuntang mampendeng mesbeh akan TUHAN intu hete.

¹⁹Dawid balalu haguet tumon parentah TUHAN je inyampai akae hajamban Gad.

²⁰Intu eka mihik gandom te, Arauna tuntang epat anake je hatue kanjerae mihik gandom. Mite malekat te, kaepa-epat anak Arauna te hadari manyahokan.

²¹Metoh Arauna mite Raja Dawid dumah, ie mite Dawid sontop intu taharep baue.

²²Koan Dawid dengae, “Aku handak mamangun mesbeh intu eka toh akan TUHAN, uka panyakit toh terai. Awi te jual petak toh akangku. Suman pire regae, aku kareh mambayare.”

²³“Duan ih, Raja,” tombah Arauna, “tuntang lalus taloh je ingkeme Raja bahalap. Jetoh kare sapi akan parapah je ingehu, tuntang akan pandok kayue Raja tau mahapan kare papan eka mihik toh. Keleh manduan kea gandom akan parapah. Aku manenga urase taloh te, dia usah tuangku mambayare.”

²⁴Tapi raja tombah, “Ela! Aku nahuang mamilie dengan puna regae. Aku dia maku manenga akan TUHAN taloh je ayum atawa taloh je dinongku kakai bewei.”

²⁵Palus Dawid mambayar akan Arauna 600 duit amas akan eka te.

²⁶Limbah te Dawid mampendeng ije mesbeh intu hete akan TUHAN, tuntang maluput parapah je ingehu hayak parapah hapa badamai. Balalu ie balakudoa tuntang TUHAN tombah lakudoae te dengan mampamohon apui bara langit je mamapui kare parapah intu hunjun mesbeh te.

²⁷Palus TUHAN manyoho malekat te majok padange hong kumpange tinai, tuntang malekat te malalus prentah TUHAN te.

²⁸Metoh Dawid mite je TUHAN tombah lakudoae awi parapah te, ie maluput tinai parapah intu mesbeh te.

²⁹Metoh te Kemah TUHAN je inampa awi Moses intu padang pasir, tuntang mesbeh akan parapah je ingehu magon aton intu eka sombayang hong Gibeon.

³⁰Tapi Dawid dia bahanyi akan hete uka hakotak dengan Hatalla awi ie mikeh dengan padang malekat TUHAN.