Read Ngaju 1 KRONIKA 22 Bible Online

1 KRONIKA 22 - Ngaju bible

1 KRONIKA 22

¹Koan Dawid, “Intu eka toh musti mamangun Human TUHAN, Hatalla. Tuntang intu mesbeh jetoh toh oloh Israel musti maluput parapah je ingehu ewen akan TUHAN.”

²Raja Dawid manyoho mamumpong uras oloh bangsa beken je melai intu lewun oloh Israel, palus ie manyoho ewen bagawi. Belahe bara ewen mamahat batu akan hapa mamangun Human TUHAN.

³Akan mawi paku tuntang engsel akan kare lawang Human TUHAN te, Dawid mamumpong are toto sanaman. Ie kea mamumpong are toto tambaga sampai dia olih inimbang.

⁴Bara oloh Tirus tuntang Sidon ie mameteh are kayu alau Libanon.

⁵Dawid malalus taloh handiai te awi ie maniroke kalutoh: “Aku musti manatap taloh je kareh ihapan akan mamangun Human TUHAN. Awi Salomo anakku magon tabela tuntang dia are taloh je puji ie mawie. Tuntang Human TUHAN je kareh imangun te musti paham bahalap tuntang basewut intu hapus kalunen.” Awi te helo bara Dawid matei, ie manyadia are toto ramo akan hapa mamangun.

⁶Dawid mantehau anake, Salomo, tuntang marentah ie uka mampendeng huma akan TUHAN, Hatalla je inyembah awi ungkup Israel.

⁷ Koan Dawid dengan Salomo, “Anakku, jari tahi aku handak mampendeng ije huma hapa mahormat TUHAN, Hatallangku.

⁸Tapi TUHAN hamauh je aku pahalau kinjap parang tuntang jari mampatei are oloh. Awi te Ie dia manyoho aku mampendeng huma Akae.

⁹Aloh kalote, ie jari manenga akangku janji toh: ‘Ikau kareh mandino ije anak hatue je kareh marentah dengan kasanang tuntang kamangat, basa Aku akan mandohop ie sampai dia aton musoh je mamarang ie. Ie akan inyewut Salomo [31] intu hapus Israel.

¹⁰Anakm te je kareh mampendeng huma akang-Ku. Ie kareh jadi anak-Ku tuntang Aku jadi bapae. Padadosan karajaan Israel kareh tetep hong turonae palus katatahie.’ ”

¹¹Palus koan Dawid tinai, “Toh, anakku, keleh TUHAN, Hatalla harajur mandohop ikau. Tuntang keleh ikau olih malalus gawi mampendeng huma akan TUHAN kilau je jari injanji Awie.

¹²Tuntang keleh TUHAN, Hatallam manenga akam kapintar tuntang kaharati akan marentah Israel tumon parentah Aie.

¹³ Amon ikau manumon uras parentah je inenga TUHAN intu Moses akan bangsa Israel, ikau kareh olih malaluse. Ikau patut kontep kapercayam tuntang bahanyi. Ela mikeh manaharep narai bewei.

¹⁴Tahiu Human TUHAN te aku jari bagawi toto-toto mangat mamumpong 3.400 ton amas tuntang labih bara 34.000 ton perak. Beken bara te aton tambaga tuntang sanaman je dia tara ise karee. Kayu tuntang batu mahin jari inatapku, tapi ikau musti magon mandahange tinai.

¹⁵Ayum aton are oloh je apik bagawi. Aton je apik manggau batu, aton tukang kayu, tukang batu tuntang are toto tukang je tau manggawi

¹⁶amas, perak, tambaga tuntang sanaman. Has, nampara bajeleng! Kareh TUHAN mandohop ikau.”

¹⁷Palus Dawid manyoho uras pamimpin oloh Israel mandohop Salomo.

¹⁸Koae, “TUHAN, Hatallan keton jari mandohop keton, tuntang manenga kamangat akan hapus lewu. Ie jari mawi aku mampakalah uras bangsa je bihin melai intu lewu toh. Toh ewen mamenda keton tuntang TUHAN.

¹⁹Jadi, keleh keton manempo TUHAN, Hatallan keton dengan salepah hambaruan keton. Keleh nampara mamangun huma akan TUHAN, mangat Patin Janjie tuntang uras pakakas beken je ihapan tantai akan sombayang tau iingkes intu hete.”