Read Ngaju 1 KRONIKA 24 Bible Online

1 KRONIKA 24 - Ngaju bible

1 KRONIKA 24

¹ Aron aton epat anake hatue: Nadab, Abihu, Eleasar tuntang Itamar. Nadab tuntang Abihu matei labih helo bara bapa ewen jaton bara anak. Awi te Eleasar tuntang Itamar kare paharin ewen jadi imam. Dawid mambagi turonan Aron huang kare kalompok manumon tugas ewen. Huang mawi kalompok te Dawid indohop awi Sadok turonan Eleasar tuntang awi Ahimelekh turonan Itamar.

⁴Turonan Itamar imbagi jadi hanya kalompok, tapi turonan Eleasar jadi jahawen walas kalompok, awi intu huang turonan Eleasar aton labih are hatue kapala keluarga.

⁵Awi aloh huang turonan Eleasar atawa huang turonan Itamar aton kare pagawai Human TUHAN tuntang kare pamimpin agama, maka huang mambagi gawi ilalus mahapan tenong.

⁶Turonan Eleasar tuntang turonan Itamar hagilir inenong, palus kare aran ewen incatet awi ije biti sekretaris je arae Semaya anak Nataneel oloh Lewi. Taloh handiai te ilalus intu taharep raja hayak kare pagawaie, Imam Sadok, Ahimelekh anak Abyatar hayak kare kapala keluarga baris imam tuntang kare kapala keluarga baris Lewi.

⁷Jetoh nomor gilir bagawi je buah tenong akan due puluh epat kalompok te: 1. Yoyarib — 13. Hupa 2. Yedaya — 14. Yesebeab 3. Harim — 15. Bilga 4. Seorim — 16. Imer 5. Malkia — 17. Hesir 6. Miyamin — 18. Hapises 7. Hakos — 19. Petahya 8. Abia — 20. Yeheskiel 9. Yesua — 21. Yekhin 10. Sekhanya — 22. Gamul 11. Elyasib — 23. Delaya 12. Yakim — 24. Maasa

¹⁹Aran kare oloh te incatet manumon gilir ewen akan tame Human TUHAN tuntang malalus gawin sombayang je jari inukas awi Aron, tato hiang ewen, tumon parentah TUHAN Hatallan Israel.

²⁰Beken bara te hong panakan Lewi magon tame kare kapala keluarga jetoh: Yehdeya, turonan Amran bara baris turonan Subael; Yisia, turonan Rehabya; Yahat, turonan Yishar bara baris turonan Selomot; Yeria, Amarya, Yahesiel, tuntang Yekameam kare anak Hebron manumon turon umure; Samin turonan Usiel bara baris turonan Milka; Sakaria, turonan Usiel bara baris turonan Yisia paharin Mikha, Mahli, Musi tuntang Yaasia, turonan Merari.

²⁷Yaasia aton telo anake hatue: Soham, Sakur tuntang Hibri.

²⁸Mahli aton due anake hatue arae Eleasar tuntang Kis. Eleasar jaton dinon anak hatue, tapi Kis dinon ije anak hatue arae Yerahmeel.

³⁰Anak hatue ain Musi aton telo biti: Mahli, Eder tuntang Yerimot. Jete kare keluarga huang suku Lewi.

³¹Akan mangatawan gilir ewen bagawi, genep kapala keluarga hayak ije biti andie je hatue inenong kilau je ilalus awi tondah paharin ewen, iete kare imam turonan Aron. Tenong te inyaksi awi Raja Dawid hayak Sadok, Ahimelekh dengan kare kapala keluarga bara baris kare imam tuntang bara baris oloh Lewi.