Read Ngaju 1 KRONIKA 25 Bible Online

1 KRONIKA 25 - Ngaju bible

1 KRONIKA 25

¹Akan mamimpin upacara hong sombayang, Raja Dawid tuntang kare pamimpin oloh Lewi mintih kare jalahan oloh Lewi jetoh: Asap, Heman tuntang Yedutun, ewen inenga gawi iete manyampai peteh bara Hatalla dengan impahayak musik kacapi, gambus tuntang simbal. Akan mamimpin sombayang dengan kakare ampin gawie, iintih bara kare kalompok toh:

²Kaepat anak hatuen Asap: Sakur, Yosep, Netanya tuntang Asarela. Je mamimpin ewen iete Asap, je manyampai peteh bara Hatalla, amon ie inyoho awi raja.

³Kajahawen anak hatuen Yedutun: Gedalya, Seri, Yesaya, Simei, Hasabya tuntang Metica. Imimpin awi bapa ewen, ewen manyampai peteh bara Hatalla impahayak musik kacapi, tuntang ewen manyanyi nyanyi tara hayak auh tarimakasih akan TUHAN.

⁴Kaepatwalas anak hatuen Heman: Bukia, Matanya, Usiel, Sebuel, Yerimot, Hananya, Hanani, Eliata, Gidalti, Romamti-Eser, Yosbekasa, Maloti, Hotir tuntang Mahasiot.

⁵Heman te nabi je ayun raja kabuat. TUHAN manenga epat walas anak hatue, hayak telo biti anak bawi akan Heman, awi TUHAN jari hajanji uka manenga eka je paham ihormat akae.

⁶Uras anak Heman te tukang mampahiau simbal, kacapi tuntang gambus je ingapala awi bapa ewen akan mampahayak upacara iete sombayang intu Human TUHAN. Asap, Yedutun tuntang Heman mandino gawi tumon kare atoh bara raja.

⁷Kadue puluh epat anak hatue ain ewen te tuntang kare tondah paharin ewen te uras oloh je tau nguan gawin musik je paceh. Ewen te samandiaie aton 288 biti.

⁸Akan manukas gilir gawi, ewen urase inenong aloh je tabela atawa je bakas, aloh je jari tahi bagawi atawa je harue manampara bajar.

⁹Ka-288 biti te imbagi huang 24 kelompok manumon keluarga ayu-ayue. Genep kalompok aton 12 biti penda ije biti kapala. Jetoh gilir aran ewen manumon tenong: 1. Yosep bara keluarga Asap — 13. Subael 2. Gedolya — 14. Matica 3. Sakur — 15. Yeremot 4. Yisri — 16. Hananya 5. Netanya — 17. Yosbekasa 6. Bukia — 18. Hanani 7. Yesarela — 19. Maloti 8. Yesaya — 20. Eliata 9. Matanya — 21. Hotir 10. Simei — 22. Gidalti 11. Asareel — 23. Mahasiot 12. Hasabya — 24. Romamti-Eser