Read Ngaju 1 KRONIKA 26 Bible Online

1 KRONIKA 26 - Ngaju bible

1 KRONIKA 26

¹Jetoh bagin gawi akan kare oloh Lewi je manjaga Human TUHAN. Bara jalahan Korah inunjok Meselemya anak Kore bara keluarga Ebyasap.

²Ie aton 7 anake hatue je indaptar manumon turon umure: Sakaria, Yediael, Sebaja, Yatniel,

³Elam, Yohanan, Elyoënai.

⁴ Limbah te inunjok Obed-Edom. Ie imberkat Hatalla dengan 8 anak hatue je indaptar manumon turon umure: Semaya, Yosabad, Yoah, Sakhar, Netaneel,

⁵Amiel, Isakhar tuntang Peuletai.

⁶Semaya anak tambakas ain Obed-Edom aton 6 anake hatue: Otni, Repael, Obed, Elsabad, Elihu tuntang Semakhya; uras ewen te oloh basewut hong jalahan ewen, awi ewen te oloh menteng je mambatang Elihu tuntang Semakhya.

⁸Akan gawi jaga te jalahan Obed-Edom manenga 62 biti oloh hatue je menteng.

⁹Jalahan Meselemya manenga 18 biti oloh menteng.

¹⁰Bara jalahan Merari inunjok Hosa. Ie aton epat anake hatue: Simri (ie dia anak tambakas, tapi iangkat jadi kapala awi bapae),

¹¹Hilkia, Tebalya tuntang Sakaria. Samandiaie aton 13 biti bara keluarga Hosa je bagawi manjaga Human TUHAN.

¹²Kakare oloh je manjaga Human TUHAN imbagi huang kare kalompok manumon jalahae. Ewen inenga kea kare gawi beken intu huang Human TUHAN kilau oloh Lewi je beken.

¹³Genep jalahan, aloh jalahan je hai atawa je korik, inenong uka mangatawan hong lawang kueh ewen kareh bagawi.

¹⁴Selemya mandino lawang hila timor. Sakaria anake je harajur manenga tirok je bahalap, mandino lawang hila utara.

¹⁵Obed-Edom mandino lawang hila salatan tuntang kare anake mandino gawi manjaga kare gudang eka mingkes kakare macam ramo tuntang pakakas beken.

¹⁶Supim tuntang Hosa mandino lawang hila barat tuntang lawang Salekhet je aton hong jalan je mandai. Tugas jaga iator kalote sampai harajur aton je manjaga hong lawang.

¹⁷Genep andau intu hila timor aton 6 biti oloh jaga, intu hila utara 4 biti tuntang intu hila salatan 4 biti. Kare gudang eka mingkes kare pakakas tuntang ramo awang beken tinai injaga awi 4 biti: 2 akan genep gudang.

¹⁸Sarambi hila barat injaga awi 4 biti hong jalan tuntang 2 biti hong sarambi te kabuat.

¹⁹Tumon te imbagi gawin tugas jaga te akan jalahan Korah tuntang jalahan Merari.

²⁰Kare oloh je beken hong suku Lewi inyarah uka mahaga kare ramo ain Human TUHAN tuntang akan gudang je mingkes kare panenga akan Hatalla.

²¹Ladan iete ije biti anak hatue ain Gerson; ie tato hiang pire-pire baris jalahan, ie kea jalahan Yehiel anake.

²²Kare anak Yehiel, iete Setam tuntang Yoël, inenga tugas mahaga kare gudang tuntang duit Human TUHAN.

²³Turonan Amram, Yishar, Hebron tuntang Usiel kea mandino bagin gawi.

²⁴Sebuel bara jalahan Gerson, anak Moses iete manantuani kare ramo ain Human TUHAN.

²⁵Ie aton horoi kola dengan Salomit mahalau Elieser paharin Gersom. Jereh Elieser sampai Salomit iete kalotoh: Elieser, Rehabya, Yesaya, Yoram, Sikhri, Selomit.

²⁶Selomit, tuntang tondah paharie inenga tanggung jawab akan uras kare panenga je iluput awi raja Dawid, awi kare kapala keluarga, kare pamimpin jalahan tuntang kare pangkalima gantong.

²⁷Kare panenga te iete belah bara ramo rampasan je dinon ewen hong parang tuntang je inenga ewen tantai akan ihapan huang Human TUHAN.

²⁸Pandak auh, Salomit tuntang keluargae musti mahaga kare taloh je akan ihapan baya huang Human TUHAN; tatame panenga je mahalau nabi Samuel jari inyarah awi raja Saul awi Abner anak Ner tuntang awi Yoab anak Seruya.

²⁹Turonan Yishar, iete Kenanya tuntang kare anake, inyarah gawi hong administrasi karajaan tuntang kare gawin basara hong Israel.

³⁰Uras urusan agama tuntang urusan pamarentah intu Israel hila barat Sungei Yordan inyarah akan Hasabya, tuntang akan 1.700 anak paharie: urase kare oloh basewut turonan Hebron.

³¹Pamimpin turonan Hebron iete Yeria. Hong nyelo kaepat puluh kahum Raja Dawid marentah, iriksa tahiu turonan Hebron. Hong panyondau te ampie aton bara marak ewen tantara menteng je melai intu Yaser hong tanah Gilead.

³²Uras urusan agama tuntang pamarentah hong Israel hila timor Sungei Yordan, iete tanah suku Ruben, Gad tuntang belahe suku Manase inyarah akan 2.700 kapala keluarga Yeria, urase oloh basewut je iintih awi Raja Dawid.