Read Ngaju 1 KRONIKA 28 Bible Online

1 KRONIKA 28 - Ngaju bible

1 KRONIKA 28

¹Raja Dawid marentah uka kakare pamimpin Israel hapumpong intu Yerusalem. Maka kare kapala suku, kare pagawai je maurus gawin pamarentah, kare kapala jalahan, kare oloh je nantuani ramo tuntang meto ain raja dengan kare anak hatuee, pandak auh kare oloh hai hong istana, pangkalima tuntang oloh je mambatang, urase hapumpong intu Yerusalem.

² Dawid mendeng intu taharep ewen tuntang hamauh, “Paharingku samandiai je ije bangsa, hining! Jari tahi aku nahuang mampendeng ije huma dehen akan Patin Janji, eka pain TUHAN itah bahunje. Aku jari manatap kare taloh je akan ihapan mampendeng ije huma eka manyembah Ie.

³Tapi TUHAN mangahana aku malalus taloh te awi aku ije biti tantara je jari are manusoh daha.

⁴TUHAN, Hatalla je inyembah Israel, jari mintih aku tuntang turonangku uka marentah Israel katatahie. Akan manatap ije biti kapala ie mintih suku Yuda, tuntang bara suku te ie mintih keluarga bapaku. Tuntang bara kakare oloh keluarga bapaku te ie pahias mintih aku tuntang mangkat aku jadi raja akan hapus Israel.

⁵Ie manenga are anak akangku tuntang bara kare anakku te Ie mintih Salomo akan marentah Israel, karajaan TUHAN.

⁶TUHAN hamauh dengangku kalutoh, ‘Salomo anakm kareh mamangun huma akang-Ku. Ie jari iintih-Ku jadi anak-Ku, tuntang Aku kareh jadi bapae.

⁷Amon ie puna toto-toto harajur manumon kakare atoran tuntang parentah-Ku kilau je ilaluse katika toh, Aku kareh mandehen karajaae sampai katatahie.’ ”

⁸Palus koan Dawid limbah te “Jadi toh, o rayatku, intu taharep Hatallan itah tuntang intu taharep pumpong hapus Israel, ungkup TUHAN toh, aku balaku dengan keton toto-toto manumon sahapus parentah TUHAN, Hatallan itah. Maka keton tau tetep tempon tanah je bahalap toh tuntang mawarise akan turonan keton sampai katatahie.”

⁹Palus akan Salomo, Dawid hamauh, “Anakku, keleh Hatalla je inyembah bapam ingakum kilau Hatallam. Ikau patut manempo Ie dengan kabujur tuntang kahias. Awi ie katawan tirok tuntang kanahuang atei itah. Amon ikau manggau Ie, Ie kareh sondaum. Tapi amon ikau malihi Ie, Ie kareh malihi ikau katatahie.

¹⁰Ingat toto-toto je TUHAN jari mintih ikau uka mampendeng huma je tantai Akae. Nah, toh lalus te dengan salepah atei.”

¹¹Limbah te Dawid manyarah akan Salomo rencana pangun Human TUHAN, kare gudange, uras kamare tuntang Kamar Ije Barasih Haliai, eka mampun dosa.

¹²Dawid manyarah kea uras rancana je jari iniroke akan kare parantaran tuntang kare kamar hakalilinge, kea kare gudang eka kare pakakas tuntang ramo beken ain Human TUHAN te hayak kare gudange eka mingkes kare panenga akan TUHAN.

¹³Inyarahe kea rancana tahiu kalompok kare bitin imam tuntang oloh Lewi, tahiu kare gawi je ilalus ewen, iete kare gawin ewen intu Human TUHAN toh tuntang mahaga uras pakakas sombayang.

¹⁴Ie manenga kare atoh tahiu cara mawi amas tuntang perak akan manampa kare pakakas,

¹⁵akan genep sumbo tuntang tantahan sumbo,

¹⁶akan kare meja bara perak, tuntang akan genep meja amas eka rote panenga akan Hatalla.

¹⁷Kea kare atoh tahiu jumlah amas tolen je musti ihapan akan manampa garpu, mangkok tuntang sangkir, tahiu kilen karee perak tuntang amas akan mawi kare piring,

¹⁸tahiu kilen kare amas tulen akan mawi mesbeh eka mamapui garo tuntang akan manampa kareta akan kare hampatong kerub dengan palapase je hambirang intu hunjun Patin Janjin TUHAN.

¹⁹Palus Raja Dawid hamauh, “Uras taloh te aton hong rencana je jari inyurat tumon kare atoh je inenga awi TUHAN akangku uka ilalus.”

²⁰Limbah te Raja Dawid hamauh tinai dengan Salomo anake, “Ikau patut mahapan salepah kapercayam tuntang kahanyim. Keleh manampara gawi te tuntang ela mikeh dengan en bewei. TUHAN, Hatalla je inyembahku kareh mandohop ikau. Ie jaton handak malihi ikau. Ie kareh mampahayak ikau sampai uras gawim te hapus.

²¹Bagin gawin sombayang huang Human TUHAN jari inukas awi kare imam tuntang oloh Lewi. Kare oloh je apik bagawi hong macam gawie kabuat-kabuat kareh mandohop ikau dengan sanang ateie, tuntang kare pamimpin tuntang hapus rayat kareh manumon parentahm.”