Read Ngaju 1 KRONIKA 29 Bible Online

1 KRONIKA 29 - Ngaju bible

1 KRONIKA 29

¹ Palus Raja Dawid hamauh dengan oloh je hapumpong intu hete, “Bara kakare anak hatuengku, Salomo bewei je iintih awi Hatalla. Ie magon tabela toto tuntang magon kurang pangatawae, tapi kare gawi toh paham hai. Mahi-mahi tinai je kareh imangun te dia istana akan olon, malengkan huma akan TUHAN, Hatalla.

²Kare ramo akan huma te hayak pakakas je beken jari inatapku hapan salepah kaabasku. Aku jari manyadia amas, perak, tambaga, sanaman, kayu, kare batu barega tuntang kare batu permata, sepsimpan kare batu akan kabungase tuntang are toto batu pualam.

³Tinai awi sintangku akan Human Hatallangku te aku jari manyarah kea perak tuntang amas bara panatau ayungku kabuat:

⁴amas je pangkahalape 100 ton labih, perak tulen kurang labih 240 ton hapan mangalukop dinding Human TUHAN, tuntang akan ramo je inampa awi kare oloh je apik manampae. Yoh, toh eweh tinai je handak manyarah panengae akan TUHAN dengan kasanang atei?”

⁶Maka kare kapala jalahan, kapala suku, kare pangkalima tuntang oloh je mahaga panatau ayun raja mansanan je ewen nahuang kea manenga.

⁷Palus ewen kea manenga taloh je inyewut toh hapa mamangun Human TUHAN te: amas 170 ton labih, perak 340 ton labih, tambaga tokep 620 ton, tuntang sanaman 3.400 ton labih.

⁸Kare oloh je mingkes kare batu permata manyarah akan Yehiel uka inamean akan eka panatau Human TUHAN. (Yehiel iete oloh Lewi bara jalahan Gerson).

⁹Rayat manenga dengan kahias atei akan TUHAN tuntang ewen hanjak awi jari are je inenga ewen. Raja Dawid kea hanjak toto.

¹⁰Intu taharep oloh are te Raja Dawid manara TUHAN. Ie hamauh, “O TUHAN, Hatalla je inyembah Yakob tato hiang ikei, tara akam palus katatahie!

¹¹ Ikau tempon kahai, tuntang kuasa, o TUHAN, tempon kuasa, kahalap, horumat tuntang kabungas paham; karana taloh handiai je aton hong langit tuntang hunjun petak, jete uras Ayum; Ayum o TUHAN aton karajaan, ikau gantong haliai indu takolok taloh handiai.

¹²Panatau tuntang horumat intu taharep Aim, Ikau marentah taloh handiai; huang lengen Aim te kare kaabas tuntang kuasa, tinai lengen Aim kea tau mampahai tuntang mampaabas taloh handiai.

¹³Toh, o Hatallan ikei, ikei manarimakasih intu Ikau, ikei manara kahain Aim.

¹⁴Karana eweh aku eweh bangsa ayungku, sampai ikei manjadi abas tuntang manenga kare taloh toh dengan kahias atei? Jete puna uras bara Ikau, bara lengen Aim kea ikei manenga te Akam.

¹⁵Ikau katawan, o TUHAN, kilau kare tato hiang ikei, ikei kea mahoroi pambelom toh kilau oloh tamuei je jaton petak danume. Pambelom ikei kilau kangkalingen je mahalau, tuntang ikei dia tau liwus bara pampatei.

¹⁶O TUHAN, Hatallan ikei, uras taloh barega toh imumpong ikei intu hetoh uka mampendeng huma Akam, uka ikei tau mahormat Aram je barasih. Tapi urase te inarima ikei bara Ikau tuntang taloh handiai te puna Ayum kea.

¹⁷Aku katawan Ikau mariksa atei genep bitin oloh tuntang ikau rajin dengan oloh je ateie mangilak kabujur. Dengan kahias tuntang kasanang atei inengaku taloh samandiai toh Akam. Aku jari mite kilen ampie ungkup Ayum je hapumpong intu hetoh mimbit panengan ewen Akam dengan kasanang ateie.

¹⁸O TUHAN, Hatalla je inyembah awi Abraham, Isaak tuntang Yakob, tato hiang ikei, keleh Ikau mahaga mangat ungkup Ayum tetep sinta Ikau kilau metoh toh. Dohop uka ewen katatahie baketep Dengam.

¹⁹Tenga akan Salomo anakku, kanahuang je toto-toto akan manumon kakare parentah Aim tuntang akan mamangun huma sombayang te je jari inatapku.”

²⁰Limbah balakudoa, Dawid hamauh dengan oloh are je hapumpong intu hete, “Tara akan TUHAN, Hatallan keton!” Balalu uras oloh te manara TUHAN, Hatalla je inyembah awi tato hiang ewen. Palus ewen sontop mahormat TUHAN tuntang raja.

²¹Hong andau jewue ewen manyambalih meto uka iluput indu parapah akan TUHAN, palus imbagi akan hapus rayat. Beken bara te aton 1.000 sapi hatue, 1.000 tabiri hatue tuntang 1.000 tabiri tabela je inyambalih tuntang imapui bula-bulat intu hunjun mesbeh. Ewen kea maluput parapah anggor je inukas akan kare parapah te.

²²Andau te ewen kuman mihop tuntang hanjak intu taharep TUHAN. Palus akan tingkat je kaduee ewen malantik Salomo kilau raja. Hapan aran TUHAN ewen mandehen ie jadi rajan ewen tuntang Sadok jadi imam.

²³ Maka kilau ije mangganti Dawid bapae, Salomo mondok hunjun padadosan je jari inukas awi TUHAN. Ie raja je batuah tuntang ihormat awi hapus bangsa Israel.

²⁴Uras pagawai pamarentah tuntang tantara sampai kare anak hatuen Dawid je beken kea mangaku kuasan Salomo kilau raja.

²⁵TUHAN mawi Raja Salomo paham impahai intu matan rayate, tuntang manjadian ie jadi raja je labih hebat bara raja je kueh bewei je puji marentah Israel.

²⁶Dawid anak Isai marentah hapus Israel

²⁷ epat puluh nyelo katahie. Intu Hebron ie marentah katahin 7 nyelo tuntang intu Yerusalem katahin 33 nyelo.

²⁸Ie tatau tuntang ihormat tuntang matei hong kabakase. Salomo anake jadi raja mangganti ie.

²⁹Saritan pambelom raja Dawid bara tamparae sampai kalepahe jari incatet huang buku Nabi Samuel, Nabi Natan tuntang Nabi Gad.

³⁰Hong buku te inyarita tahiu ampie marentah, kuasae tuntang uras taloh je manjadi dengae, dengan Israel tuntang kare karajaan tokep Israel.