Read Ngaju 1 KRONIKA 5 Bible Online

1 KRONIKA 5 - Ngaju bible

1 KRONIKA 5

¹ Ruben iete anak tambakas ain Yakob. Tapi awi Ruben jari mamapa hormat je bara gundik bapae, maka hak ayue kilau anak bakas induan tuntang inenga akan Yosep. Aloh kalote je pangkaabase bara marak turonan Yakob dia suku Yosep tapi suku Yuda. Bara suku Yuda te haream je sola-solake jadi rajan hapus ungkup Israel.

³Ruben anak tambakas ain Yakob, tempon epat anak hatue: Henokh, Palu, Hesron tuntang Karmi.

⁴ Jetoh turo-turon turonan Yoël: Semaya, Gog, Simei, Mikha, Reaya, Baal tuntang Beera. Beera iete pamimpin suku Ruben metoh ie inyingkap awi Tiglat-Pileser raja Asur, tuntang iimbit akan eka tawanan.

⁷Huang rinting incatet kea kare kapala jalahan je awang toh hong suku Ruben: Yeiel, Sakaria,

⁸tuntang Bela anak Asas, eson Sema bara jalahan Yoël. Suku Ruben melai intu Aroër tuntang intu tanah je nampara bara Aroër akan hila utara sampai akan Nebo tuntang Baal-Meon.

⁹Ain Ewen aton are toto meto intu tanah Gilead. Awi te, ewen melai tanah hila timor sampai akan padang pasir je hambirang sampai akan Sungei Euprat.

¹⁰Hong jaman Raja Saul, suku Ruben manyarang tuntang mampakalah oloh Hagri intu hila timor Gilead, palus manguasa lewu te.

¹¹Intu hila utara tanah suku Ruben aton suku Gad intu tanah Basan sampai tikas Salkha intu hila timor.

¹²Bara suku Gad te Yoël iete tato hiang jalahan je basewut, tuntang Sapam iete tato hiang jalahan je nomor due. Yaenai tuntang Sapat iete tato hiang kare jalahan je beken.

¹³Kare oloh beken hong suku Gad tame huang uju jalahan jetoh: Mikhael, Mesulam, Aseba, Yorai, Yakan, Siya tuntang Eber.

¹⁴Ewen turonan Abihail anak Huri. Turonan rinting ewen bara penda akan hunjun iete kalotoh: Abihail, Huri, Yaroah, Gilead, Mikhael, Yesisai, Yahdo, Bus.

¹⁵Kapala kare jalahan te iete Ahi anak Abdiel, eson Guni.

¹⁶Ewen melai intu tanah Basan tuntang Gilead, tuntang kare lewu hong tanah te hayak intu hapus padang oru intu Saron.

¹⁷Rinting toh inampa hong jaman Yotam raja Yuda, tuntang Yerobeam raja Israel.

¹⁸Huang suku Ruben, Gad tuntang suku Manase je intu hila timor Yordan aton 44.760 tantara je sanggam tuntang jari patuh mahapan talawang, padang tuntang panah.

¹⁹Ewen parang malawan suku Yetur, Napis tuntang Nodab, iete kare suku huang bangsa Hagri.

²⁰Kare tantara te percaya dengan Hatalla tuntang balaku awat Dengae. Palus Hatalla manarima palakun ewen tuntang manenga kamanang akan ewen bara kare oloh Hagri te tuntang oloh pakat ewen.

²¹Awi parang te manjadi tagal kanahuang Hatalla, maka are musoh je impatei ewen. Ewen kea manawan 100.000 biti, tuntang marampas 50.000 onta, 250.000 tabiri tuntang 2.000 kalidai. Limbah te ewen manetep melai intu tanah te sampai wayah bangsa Israel inawan tuntang imbit akan eka tawanan.[6]

²³Belahe suku Manase melai intu tanah Basan sampai akan utara tikas Baal-Hermon. Ewen sasar tahi sasar are.

²⁴Jetoh kare kapala jalahan ewen: Heper, Yisei, Eliel, Asriel, Yeremia, Hodawya tuntang Yahdiel. Ewen te uras kare tantara je menteng.

²⁵Oloh Israel dia baketep dengan Hatalla je inyembah ewen. Ewen malihi Ie tuntang sombayang akan kare dewa kare bangsa je jari iharak awi Hatalla bara lewu Kanaan.

²⁶ Awi te Hatalla manggerek atei Pul raja Asur, palus ie haguet manyarang lewu te. Pul kea ingasene kilau Tiglat-Pileser. Palus suku Roben, Gad, tuntang Manase je intu hila timor Yordan iundae kilau tawanan tuntang insahan akan Halah, Habor, Hara tuntang akan ije eka tokep Sungei Gosan. Intu hete ewen melai tuntang manetep sampai andau toh.