Read Ngaju 2 KRONIKA 1 Bible Online

2 KRONIKA 1 - Ngaju bible

2 KRONIKA 1

¹Salomo anak Raja Dawid jadi raja je abas huang karajaan Israel. TUHAN, Hatalla mamberkat ie tuntang manjadian ie paham kuasa.

²Uras kare kapala pasukan 1.000 tuntang pasukan 100, uras pagawai pamarentah, tuntang uras kapala keluarga Israel irentah awi Raja Salomo

³uka haguet dengae akan eka sombayang hong Gibeon, ewen haguet akan hete, awi intu hete aton Kemah TUHAN je inampa awi Moses rewar TUHAN metoh intu padang pasir. (

⁴ Tapi Patin Janjin TUHAN aton intu Yerusalem intu huang Kemah je impendeng awi Raja Dawid akan Pati te metoh ie mindahe bara Kiryat-Yearim).

⁵ Mesbeh tambaga je inampa awi Besaleel anak Uri, eson Hur, aton kea hong Gibeon hong baun Kemah TUHAN. Raja Salomo tuntang hapus rayat sombayang akan TUHAN intu hete.

⁶Intu hila baun kemah te raja maluput parapah intu hunjun mesbeh tambaga 1.000 kongan meto kilau parapah je ingehu akan TUHAN.

⁷Alem te Hatalla mamparahan arep Aie akan Salomo tuntang hamauh, “Salomo, laku taloh je ingahandakm, jete kareh inenga-Ku akam!”

⁸Salomo tombah, “O Hatalla, Ikau jari mamparahan je Ikau paham sinta bapaku Dawid, tuntang Ikau jari mangkat aku jadi raja mangganti ie.

⁹ Toh, O TUHAN, Hatalla, keleh Ikau malalaus janjin Aim akan bapaku. Ikau jari mangkat aku jadi raja akan bangsa je hai toh je dia taraise karee.

¹⁰Awi te tenga akangku kapintar-kaharati tuntang pangatawan je ihapaku marentah ewen. Amon dia kalote, kilen ampie aku tau marentah ungkup Ayum je hai toh?”

¹¹Koan Hatalla dengan Salomo, “Palakum te bahalap. Ikau dia balaku panatau atawa jawet ramo atawa aran basewut atawa pampatei akan kare musohm atawa umur panjang akam kabuat, malengkan kapintar tuntang kaharati akan marentah ungkup-Ku je imercaya-Ku dengam.

¹²Tagal te kapintar tuntang kaharati kareh inenga-Ku akam. Beken bara te Aku kareh mawi ikau labih sanang belom, labih tatau tuntang labih basewut bara kare raja je kueh bewei aloh intu katika je halau atawa intu katika je inaharep.”

¹³Limbah te Salomo malihi eka sombayang hong Gibeon, eka Kemah TUHAN, palus haluli akan Yerusalem. Bara hete ie malalus gawie marentah Israel.

¹⁴ Ie manyadia sepsimpan taloh akan pasukan parange dengan 1.400 kareta parang tuntang 12.000 kuda parang. Belahe ingkese hong Yerusalem, tuntang belahe intu kare lewu beken.

¹⁵ Metoh Salomo marentah, amas tuntang perak kilau ramo je dia barega hong Yerusalem, sama kilau batu; tuntang kayu alau Libanon are toto kilau kayu ara je dia barega.

¹⁶ Mahalau kare oloh dagang je mandohop raja, kuda inamean bara Misir tuntang Kewe.

¹⁷Kare kareta parang inamean bara Misir, limbah te injual tinai akan kare raja Het tuntang kare raja Siria dengan rega 150 duit perak akan ije kongan kuda, tuntang 600 duit perak akan ije kareta parang.