Read Ngaju 2 KRONIKA 10 Bible Online

2 KRONIKA 10 - Ngaju bible

2 KRONIKA 10

¹Rehabeam haguet akan Sikhem awi hapus rayat Israel hila utara hapumpong intu hete uka mangkat ie jadi raja.

²Metoh te Yerobeam anak Nebat magon aton intu Misir awi ie hadari bara Raja Salomo. Sana ie mahining tahiu Rehabeam, ie haluli akan Israel.

³Rayat hila utara marawei Yerobeam, palus ie hayak ewen haguet manaharep Rehabeam. Koan ewen,

⁴“Salomo bapa Raja jari manenga tanggongan je babehat akan ikei. Amon Tuan Raja mampahian tanggongan tuntang mangurang kapehen ikei, ikei kareh mamenda Raja.”

⁵Rehabeam tombah, “Aku handak bapikir helo. Dumah haluli telo andau tinai.” Palus kare oloh te buli.

⁶Balalu Rehabeam balaku tirok bara kare oloh baka-bakas je puji jadi oloh je manenga tirok akan Salomo bapa Rehabeam, “Kilen auhku tombah akan kare oloh te?” Paisek Rehabem. “Narai tirok keton?”

⁷Ewen tombah, “Amon Raja nahuang mawi gawi bahalap dengan rayat, tuntang manyanang atei ewen, tenga panombah je bahalap akan ewen, maka ewen kareh baketep dengan Raja katatahie.”

⁸Tapi kare tirok kare oloh bakas te dia inumon awi Rehabeam. Gantie, ie haguet manalih kare oloh tabela je umure ije katingkat dengae, tuntang je tau mandohop ie.

⁹Ie misek ewen, “Narai tirok keton akangku uka tombah rayat je balaku mangat aku mampahian tanggongan ewen?”

¹⁰Ewen tombah, “Keleh Raja hamauh kalotoh, akan ewen, ‘Salemo-salemoe aku, aku magon labih abas bara bapaku. [6]

¹¹Bapaku manenga tanggongan je babehat akan keton, tapi aku kareh manenga je labih babehat tinai. Ie mahewes keton hapan tetek uei, tapi aku kareh mamukul keton hapan tantowo je baduhi!’ ”

¹²Telo andau limbah te Yerobeam tuntang uras oloh te haluli manaharep Rehabeam, kilau je jari irentah.

¹³Hakalawan dengan tirok kare oloh bakas, rayat je dumah manalih ie te inombah mahapan auh kasar.

¹⁴Tumon nasehat kare oloh tabela, ie hamauh, “Bapaku manenga akan keton tanggongan je babehat, tapi aku kareh manenga tanggongan je labih babehat tinai. Ie mahewes keton dengan tetek uei, tapi aku kareh mamukul keton dengan tantowo je baduhi!”

¹⁵Palakun rayat dia ie padulie. Tapi jete puna kahandak TUHAN, Hatalla. Taloh je insanan TUHAN mahalau Nabi Ahia bara Silo tahiu Yerobeam anak Nebat musti manjadi.

¹⁶ Metoh rayat Israel mite je raja dia maku mahining auh ewen, ewen mangkariak, “Dia usah paduli dengan Dawid tuntang turonae: Ewen dia puji mawi en-en akan itah. Rayat Israel, keleh itah buli! Nauhe Rehabeam te maharago arepe kabuat!” Palus kare rayat Israel buli,

¹⁷tuntang Rehabeam jadi raja baya akan tanah Yuda.

¹⁸Aloh kalote Raja Rehabeam magon kea manyoho Adoniram, ije biti kapala panggawi paksa, uka mampasuni rayat. Tapi ewen mamedak ie hapan batu sampai matei. Rehabeam kabuat olih hadari tuntang kaje-kajeng mandai akan karetae, hayak hadari akan Yerusalem.

¹⁹Nampara bara katika te rayat intu hila utara karajaan Israel harajur malawan kare raja panakan Dawid.