Read Ngaju 2 KRONIKA 11 Bible Online

2 KRONIKA 11 - Ngaju bible

2 KRONIKA 11

¹Metoh Raja Rehabeam dumah akan Yerusalem, ie mamumpong 180.000 tantara ayue je pangkahalape bara suku Yuda tuntang Benyamin akan mamarang oloh Israel.

²Tapi TUHAN manyoho Nabi Semaya

³manyampai peteh toh akan Rehabeam tuntang akan hapus oloh hong suku Yuda tuntang Benyamin.

⁴“Ela mamarang kare paharim oloh Israel. Keleh buli! Narai je jari manjadi jete kahandak ayung-Ku.” Palus ewen urase manumon parentah TUHAN tuntang balang haguet mamarang Yerobeam.

⁵Rehabeam melai intu Yerusalem tuntang manyoho oloh mamangun kare kota akan kare lewu intu tanah Yuda tuntang Benyamin iete:

⁶Lewu Betlehem, Etam, Tekoa,

⁷Bet-Sur, Sokho, Adulam,

⁸Gat, Mares, Sip,

⁹Adoraim, Lakhis, Aseka,

¹⁰Sora, Ayalon tuntang Hebron.

¹¹Ie mandehen kare lewu bakota te tuntang mandak ije biti kapala pasukan intu genep lewu te. Genep lewu te inyukupe dengan bahata taloh kinan, undus saitun tuntang anggor,

¹²hayak talawang tuntang lunju. Tumon te tanah Yuda tuntang Benyamin tetep intu huang kuasae.

¹³Kare imam tuntang oloh Lewi bara hapus tanah Israel hadari omba dengan Rehabeam.

¹⁴Kare oloh Lewi te malihi kare padang oru tuntang petak ewen tuntang bindah akan Yuda tuntang Yerusalem, awi Yerobeam tuntang kare raja je mangganti ie dia manyoho ewen bagawi kilau imam ain TUHAN.

¹⁵ Yerobeam mangkat kare imam ayue kabuat akan malalus gawi intu kare eka manyembah hampatong dewa tuntang manyembah kare ijin tuntang hampatong sapi je inampa ewen kabuat.

¹⁶Kare oloh bara hapus suku Israel je toto-toto handak manyembah TUHAN, Hatallan Israel, bindah akan Yerusalem, manuntut kare oloh Lewi te uka tau maluput parapah akan TUHAN, Hatalla je inyembah tato hiang ewen.

¹⁷Tumon te karajaan Yuda jari labih dehen. Katahin telo nyelo ewen mandohop Rehabeam anak hatue ain Salomo je marentah, tuntang belom sama kilau hong jaman Raja Dawid tuntang Raja Salomo narentah.

¹⁸Rehabeam kawin dengan Mahalat; bapa Mahalat iete Yerimot anak hatue ain Dawid, tuntang indue iete Abihail anak Eliab, eson Isai.

¹⁹Ain ewen aton telo anak hatue: Yeus, Semarya tuntang Saham.

²⁰Limbah te Rehabeam kawin dengan Maakha anak Absalom. Ewen mandino epat anak hatue: Abia, Atai, Sisa tuntang Selomit.

²¹Ain Rehabeam aton 18 biti sawae tuntang 60 biti gundike, 28 anak hatue tuntang 60 anak bawi. Bara kakare sawae tuntang gundike te je paling inyintae iete Maakha.

²²Awi te Abia anak Maakha labih irajie bara kakare anake je beken, sampai Abia te je intihe akan mangganti ie jadi raja.

²³Dengan kapintar kaharatie Rehabeam manenga kare gawi akan kare anak hatuee tuntang mandak intu kare lewu bakota intu hapus tanah Yuda tuntang Benyamin. Ie manenga akan ewen panginan malabien karee, tuntang kea manyadia are oloh bawi akan sawan kare anake.