Read Ngaju 2 KRONIKA 12 Bible Online

2 KRONIKA 12 - Ngaju bible

2 KRONIKA 12

¹Limbah kuasan Rehabeam kilau raja jari dehen, maka ie tuntang hapus oloh Israel malihi parentah TUHAN,

²tuntang dia baketep Dengae. Awi te TUHAN mahukum ewen. Intu nyelo kalime Rehabeam marentah, Sisak raja Misir manyarang Yerusalem

³mahapan 1.200 kareta parang, 60.000 tantara mahapan kuda, tuntang kare tantarae je dia taraitong karee, tatame kea pasukan Libia, Suki tuntang Sudan.

⁴Ie marabut kare lewu je hakota intu Yuda palus miar sampai akan Yerusalem.

⁵Metoh te Raja Rehabeam tuntang kare pamimpin oloh Yuda jari hapumpong intu Yerusalem awi hadari bara Sisak. Nabi Semaya dumah manalih ewen, tuntang hamauh, “Kalotoh koan TUHAN, ‘Keton malihi Aku, jadi toh Aku kea malihi keton sampai keton inguasa awi Sisak!’ ”

⁶Raja tuntang kare pamimpin mangaku je ewen jari badosa. Ewen hamauh, “Taloh je ilalus TUHAN te adil.”

⁷Metoh TUHAN mite je ewen jari mamparandah arep, Ie hamauh tinai dengan Semaya, koae, “Awi ewen mangaku dosan ewen, maka Aku dia akan mambinasa ewen. Aku kareh bajeleng maliwus ewen; Yerusalem dia akan hancor. Aloh kalote, Sisak

⁸kareh manguasa ewen, mangat ewen katawan kabekee manempo Aku tuntang manempo kuasan oloh kalunen.”

⁹ Palus Raja Sisak dumah manyarang lewu Yerusalem tuntang marabut kare ramo barega je aton hong Human TUHAN tuntang hong istana raja, tuntang kare talawang amas je inampa awi Raja Salomo.

¹⁰Kilau gantie Rehabeam mawi kare talawang tambaga, tuntang manyarahe mangat ihaga akan indu hapan kare pangkalima je manjaga lawang istana.

¹¹Sining katika amon raja haguet akan Human TUHAN, kare oloh je manjaga te mimbit kare talawang te, limbah te maliae akan eka jaga.

¹²Awi raja mamparandah arep intu taharep TUHAN, tuntang kea awi magon aton kare taloh je bahalap hong Yuda maka kasangit TUHAN dengan Rehabeam tendur tuntang dia mambinasae samasinde. [7]

¹³Rehabeam marentah intu Yerusalem, tuntang kuasae sasar hai. Umure 41 nyelo matoh ie jadi raja, tuntang ie marentah 17 nyelo katahie hong Yerusalem, lewu je bara hapus Israel iintih TUHAN akan eka sombayang akae. Indu Rehabeam iete Naama bara lewu Amon.

¹⁴Rehabeam mawi kapapa awi jaton kahandake malalus kahandak TUHAN.

¹⁵Saritan Rehabeam bara tamparae sampai kahapuse tuntang jerehe incatet hong buku Sejarah Nabi Semaya tuntang hong buku Sejarah Nabi Ido. Rehabeam harajur parang malawan Yerobeam.

¹⁶Rehabeam matei tuntang ingubur hong kuburan kare raja intu Lewun Dawid. Abia anak hatue ayue jadi raja mangganti ie.