Read Ngaju 2 KRONIKA 13 Bible Online

2 KRONIKA 13 - Ngaju bible

2 KRONIKA 13

¹Intu nyelo kahanyawalas katika Raja Yerobeam marentah intu Israel, Abia jadi raja intu Yuda.

²Ie marentah telo nyelo katahie intu Yerusalem. Indue iete Mikhaya anak Uriel bara lewu Gibea. Limbah te lembut parang Abia malawan Yerobeam.

³Abia mairak 40.000 biti tantara, tuntang Yerobeam mairak 800.000 biti tantara.

⁴Due pasukan te hataharep intu daerah bukit Epraim. Abia mandai akan hunjun bukit Semaraim palus mantehau Yerobeam tuntang oloh Israel, “Hining!

⁵Keton katawan je TUHAN, Hatallan Israel, jari mampendeng janji dengan Dawid iete ie tuntang turonae kareh marentah Israel palus katatahie. Janji te dia tau imbalang.

⁶Aloh kalote, Yerobeam anak Nebat te barontak malawan Salomo, rajae.

⁷Ie mamumpong ije baris oloh je kurang ajar tuntang mamaksa kahandak ewen akan Rehabeam anak Salomo, je katika te pahalau tabela tuntang dia aton pangalamae uka malawae.

⁸Toh keton mangira tau malawan kuasa je inenga TUHAN akan turonan Dawid, awi pasukan keton hai tuntang keton aton kare sapi amas je inampa Yerobeam akan dewan keton.

⁹En dia kare imam turonan Aron tuntang kare oloh Lewi jari iharak keton urase? Kilau gantie eweh bewei je nahuang jadi imam, asal ie mimbit ije kongan sapi atawa uju kongan tabiri, iawi keton akan imam akan taloh je dia Hatalla, awi kalote ampie cara kare bangsa beken mangkat imam ewen. Tapi ikei dia mawie kalote.

¹⁰Ikei tetep manempo TUHAN, Hatallan ikei tuntang dia malihi Ie. Kare imam ikei tetep turonan Aron, tuntang kare oloh Lewi tetep mandohop ewen.

¹¹Genep hanjewu tuntang halemei ewen mamapui garo tuntang maluput parapah je ingehu akan TUHAN, hayak manyadia rote tampayah.[8] Genep alem ewen manotong kare sumbo hong tantahan sumbo amas. Ikei tetep manumon kare parentah TUHAN, tapi keton jari malihi Ie.

¹²Pamimpin ikei TUHAN kabuat, tuntang kare imam Ayue aton intu hetoh. Ewen jari tatap mahimon tarompet kilau tanda akan ikei manyarang keton. O oloh Israel, ela malawan TUHAN, Hatallan tato hiang keton! Keton dia akan tau manang!”

¹³Hemben te Yerobeam mangirim belah pasukae hapa mimpa pasukan Yuda bara likut, tuntang belah tinai manaharep ewen bara baun.

¹⁴Sana pasukan Yuda mite ewen ingapong, ewen mangkariak balaku dohop dengan TUHAN. Kare imam mahimon tarompet,

¹⁵palus pasukan Yuda mampahiau lahap parang balalu miar manyarang, imimpin awi Abia. Metoh ewen balaku dohop, Hatalla mampakalah Yerobeam tuntang Israel

¹⁶sampai ewen hadari. Hatalla mawi oloh Yuda manang malawan ewen.

¹⁷Hai kakalah oloh Israel awi Abia tuntang pasukae; 500.000 biti tantara ain ewen je pangkahalape lepah matei.

¹⁸Oloh Yuda manang, awi ewen maandal TUHAN, Hatallan tato hiang ewen.

¹⁹Metoh Abia manggoang pasukan Yerobeam, ie marapas pire-pire lewu tuntang kare kampung hakalilinge. Kare lewu te iete Betel, Yesana tuntang Epron.

²⁰Katahin Abia marentah, Yerobeam dia olih mahalalian kuasae. Kajariae ie impatei awi TUHAN.

²¹Tapi Abia sasar hai kuasae. Ie aton 13 sawae, 22 anak hatue tuntang 16 anak bawi.

²²Sarita je beken tahiu Abia, hayak tahiu uras auhe tuntang gawie jari incatet huang buku “Sejarah Nabi Ido”