Read Ngaju 2 KRONIKA 14 Bible Online

2 KRONIKA 14 - Ngaju bible

2 KRONIKA 14

¹Limbah Raja Abia matei tuntang ingubur intu kubur kare raja intu Lewun Dawid, Asa anake jadi raja mangganti ie. Metoh Asa marentah tanah Yuda melai hong kasanang katahin sapuluh nyelo.

²Asa manyanang atei TUHAN Hatallae dengan malalus je adil tuntang bahalap.

³Ie manganan kare mesbeh bangsa beken tuntang eka kare manyembah hampatong dewa. Kare turus batu impahancore, tuntang kare jihin hampatong Dewi Asera impalongkange.

⁴Rayat Yuda inyohoe belom manumon kahandak TUHAN, Hatallan tato hiang ewen, tuntang manumon kare ajar tuntang parentah Aie.

⁵Uras eka manyembah hampatong tuntang eka mamapui garo inganae bara kare lewun Yuda. Palus intu karajaan te jaton karidu kalahi metoh ie marentah,

⁶sampai ie tau mamangun kare kota akan kare lewu Yuda. Pire-pire nyelo katahie dia aton parang awi TUHAN manenga kasanang akae.

⁷Koan Asa dengan rayat Yuda, “Keleh itah mandehen kare lewu dengan mamangun dinding hakalilinge tuntang kare candi hayak lawang dengan kare huite. Itah jari manguasa lewu toh awi itah jari manumon kahandak TUHAN, Hatallan itah.” Palus ewen nampara mamangun tuntang mahapus gawi te dengan bahalap.

⁸Tantara raja Asa iete 300.000 biti oloh Yuda je mahapan talawang tuntang lunju, tuntang 280.000 oloh Benyamin je mahapan talawang tuntang panah. Ewen urase tantara je bahanyi-hanyi tuntang jadi ilatih.

⁹Hong sinde katika ije biti oloh Sudan arae Serah manyarang Yuda dengan pasukan je aton 1.000.000 biti tantara tuntang 300 kareta parang. Ewen miar tikas Maresa.

¹⁰Palus Asa balua manaharep Serah palus kadadue mator barisan ayu-ayue intu Janah Sepata tokep Maresa.

¹¹Palus Asa balakudoa intu TUHAN, Hatallae, “TUHAN, baya Ikau tau mandohop je balemo taharep je abas. Dohop ikei toh, o TUHAN, Hatallan ikei! Intu Ikau ikei basinggoh tuntang hapan ara Aim ikei balua parang malawan pasukan je paham hai toh. TUHAN, Ikau wei Hatallan ikei. Ela manalua bitin Aim impakalah awi ije biti olon.”

¹²Palus Asa tuntang tantara Yuda manyarang tantara Sudan. TUHAN mampakalah tantara Sudan sampai ewen hadari.

¹³Asa tuntang tantarae manggoang ewen sampai tikas Gerar. Tantara Sudan are toto je matei sampai tantara ain ewen dia olih malawan awi impahancor awi TUHAN tuntang tantara Yuda kea marampas are toto kare ramon ewen. Limbah te tantara Yuda mampahancor kare lewu intu tanah tokep Gerar, awi TUHAN mawi oloh je melai hete mikeh. Tantara Yuda marabut uras lewu te tuntang mandino are toto ramo.

¹⁵Ewen kea manyarang kare kemah oloh je mahaga meto, tuntang manduan are tabiri tuntang onta limbah te ewen haluli akan Yerusalem.