Read Ngaju 2 KRONIKA 15 Bible Online

2 KRONIKA 15 - Ngaju bible

2 KRONIKA 15

¹Roh Hatalla mohon akan Nabi Asarya anak Oded,

²sampai ie haguet manalih Raja Asa tuntang hamauh, “O Raja Asa, tuntang hapus oloh Yuda tuntang Benyamin! Hining! TUHAN tokep dengam amon keton tokep Dengae. Amon keton balaku dengan TUHAN, Ie kareh manengae. Tapi amon keton malihi Ie, Ie kea malihi keton.

³Tahi toto Israel dia manempo Hatalla je toto, dia aton kare parentah je patut inumon, tuntang dia aton kare imam je majar ewen.

⁴Tapi metoh ewen aton hong kajake ewen balaku dohop dengan TUHAN, Hatallan Israel. Ewen misek kahandak Ayue tuntang Ie manengae.

⁵Metoh te oloh dia olih haguet dengan sanang, awi hong genep lewu aton kaderoh hai.

⁶Bangsa je ije mahenyek bangsa je beken, tuntang lewu je ije mangapehe lewu je beken, awi Hatalla mampadumah karidu hai akan ewen.

⁷Tapi keton musti abas tuntang bahanyi. Gawin keton kareh aton hasile.”

⁸Metoh Asa mahining auh Asarya anak Oded te, lembut kalasut ateie. Ie manganan kare hampatong intu Yuda tuntang Benyamin, tuntang intu kare lewu je jari impakalah intu petak habukit Epraim, palus ie mangambuah mesbeh TUHAN je aton intu parantaran Human TUHAN.

⁹Are oloh Epraim, Manase, tuntang Simeon bagabung dengan Asa, tuntang melai intu tanah kerajaan ayue, awi ewen mite je TUHAN mandohop ie. Asa manyoho uras oloh te hayak dengan rayat Yuda tuntang Benyamin,

¹⁰hapumpong intu Yerusalem. Palus ewen hapumpong intu bulan telo hong nyelo kalime walas metoh Asa marentah.

¹¹Hong andau te ewen maluput akan TUHAN 700 sapi tuntang 7.000 tabiri, hasil rampasan je imbit ewen buli bara parang.

¹²Ewen hajanji dengan TUHAN dengan salepah atei tuntang hambaruan ewen handak belom manumon kahandak TUHAN, Hatallan tato hiang ewen.

¹³Eweh bewei, bakas atawa tabela, hatue atawa bawi, je dia belom manumon kahandak TUHAN musti ihukum matei.

¹⁴Dengan auh je hai ewen sumpah dengan TUHAN, je ewen kareh mimbing janji te. Limbah te ewen basasurak tuntang mahimon tarompet.

¹⁵Hapus rayat Yuda hanjak awi ewen jari mawi sumpah te dengan salepah atei. Ewen sanang sombayang intu TUHAN, tuntang TUHAN kea sanang manarima ewen. Ie manenga akan ewen kasanang intu tanah ewen.

¹⁶Limbah te Raja Asa mampaterai tambie Maakha, bara pangkate kilau Ratu awi ie jari mawi hampatong je baka hawe-hawen ampie akan Asera, dewi kajewong. Asa manderep tuntang mandarai hampatong te palus mamapuie intu Janah Kidron.

¹⁷Aloh dia uras eka manyembah hampatong intu lewu te impahancor awi Asa, tapi ie tetep baketep dengan TUHAN sampai hapus umure.

¹⁸Uras amas tuntang perak hayak kare ramo beken hasil rampasan parang ayun bapae tuntang ayue kabuat ingkese intu Human TUHAN uka jadi ayun TUHAN.

¹⁹Sampai intu nyelo katelo puluh lime Asa marentah, dia puji lembut parang tinai intu lewu te.