Read Ngaju 2 KRONIKA 16 Bible Online

2 KRONIKA 16 - Ngaju bible

2 KRONIKA 16

¹Intu nyelo katelo puluh jahawen Asa marentah Yuda, Baesa raja Israel manyarang Yuda tuntang mandehen lewu Rama uka matep jalan balua tame akan Yuda.

²Palus raja Asa manduan amas tuntang perak bara kamar panatau Human TUHAN tuntang istana raja, palus mangirime akan Damaskus akan Benhadad raja Siria impahayak peteh toh,

³“Ayo itah hasobat tuntang hapakat kilau je jari ilalus awi oloh bakas itah. Hayak toh aku mangirim amas tuntang perak kilau panenga, tuntang balaku Tuan mampaterai pakat dengan Baesa raja Israel, uka ie manduan haluli pasukae bara tanah aingku.”

⁴Benhadad nahuang manumon auh te palus ie manyoho kare pangkalimae hayak pasukan ewen manyarang kare lewun oloh Israel. Ewen mampakalah Iyon, Dan, Abel-Bet-Maakha tuntang uras kare lewu eka mingkes bahata intu Naptali.

⁵Metoh raja Baesa mahining tahiu hal te, ie terai mandehen Rama tuntang malihi lewu te.

⁶Palus Raja Asa mirak kare oloh bara hapus Yuda akan munda kayu tuntang batu je ihapan Baesa intu Rama hapa mandehen lewu te. Kare ramo te ihapan Asa akan mandehen lewu Geba tuntang Mispa.

⁷Metoh te Nabi Hanani manalih Asa tuntang hamauh, “Basa ikau jari basinggoh intu raja Siria tuntang dia dengan TUHAN, Hatallam; maka nihau kasampet akam mampakalah raja Israel.[9]

⁸En dia Sudan tuntang Libia tempon pasukan tantara je hai, are kareta parang tuntang tantara manongkang kuda? Aloh kalote TUHAN manenga kamanang akam malawan ewen, awi ikau basinggoh intu Ie.

⁹TUHAN manampayah hapus kalunen uka menenga kaabas Aie akan kare oloh je baketep Dengae. Ikau jari malalus kahumong, awi te nampara bara toh ikau harajur buah parang.”

¹⁰Auh Nabi Hanani te mawi Asa paham sangit sampai ie manamean nabi te akan huang penjara. Metoh te kea Asa mangapehe pire-pire biti bara rayat ayue.

¹¹Uras kajadian metoh raja Asa narentah bara tamparae sampai kahapuse jari incatet huang buku Sejarah Kare Raja Yuda tuntang Isarel.

¹²Intu nyelo katelo puluh jalatien Asa marentah, Asa buah panyakit je paham hong due paie. Aloh kalote ie dia manggau pandohop bara TUHAN, malengkan bara dokter.

¹³Due nyelo limbah te ie matei.

¹⁴Hantue ingasai hapan ramon taloh je inampa bara rarampah tuntang taloh mangat ewaue, palus ingubur intu kubur kare raja intu Lewun Dawid. Tuntang hapa manenga hormat akae, rayat manotong pehon je hai toto.