Read Ngaju 2 KRONIKA 17 Bible Online

2 KRONIKA 17 - Ngaju bible

2 KRONIKA 17

¹Yosapat jadi raja Yuda mangganti Asa bapae, tuntang ie mampaabas arepe uka malawan Israel.

²Ie mandak tantara intu uras lewu bakota intu Yuda, tuntang intu tanah luar lewu intu Yuda, hayak intu kare lewu je jari irampas bapae intu tanah Epraim.

³TUHAN mamberkat Yosapat awi ie manuntut gawin bapae; ie dia manyembah Baal,

⁴malengkan sombayang intu Hatalla. Ie manumon kare parentah Hatalla, tuntang pambelome dia kilau kare raja Israel.

⁵TUHAN manenga akan Yosapat kuasa je dehen kilau raja Yuda. Hapus rayat mimbit kare panenga akae tuntang ie jari tatau hayak paham ihormat.

⁶Dengan salepah kaabase ie manumon parentah TUHAN tuntang manganan uras eka manyembah hampatong tuntang kare hampatong Dewi Asera intu Yuda.

⁷Hong nyelo katelo ie marentah, ie manyoho kare pagawai je gantong pangkate uka majar kare parentah TUHAN intu kare lewun oloh Yuda. Ewen te iete: Benhail, Obaja, Sakharia, Netaneel tuntang Mikha.

⁸Ewen impahayak awi jalatien biti oloh Lewi tuntang due biti imam. Kare oloh Lewi te iete Semaya, Netanya, Sebaya, Asael, Semiramot, Yonatan, Adonia, Tobia tuntang Tob-Adonia. Due imam te iete Elisama tuntang Yoram.

⁹Dengan mimbit buku Kare Parentah TUHAN ewen haguet akan hete-hete intu hapus tanah Yuda tuntang majar rayat intu hete.

¹⁰TUHAN manyangkulep kikeh mawi kare karajaan je hakaliling Yuda sampai ewen dia bahanyi parang malawan Yosapat.

¹¹Bara oloh Pilistin ie are manarima perak tuntang are panenga beken, tuntang bara oloh Arab ie manarima 7.700 tabiri tuntang 7.700 kambing.

¹²Tumon te Yosapat sasar tahi sasar hai kuasae. Intu hapus Yuda ie mamangun kare lewu bakota tuntang are lewu eka mingkes bahata.

¹³Ie mingkes panginan akan bahata je are toto intu kare lewu te. Intu Yerusalem ie mandak kare pangkalima je menteng,

¹⁴gagenep baris pasukan manumon jalahae. Adna iete pangkalima pasukan kakare suku Yuda. Ie mamimpin 300.000 biti tantara.

¹⁵Oloh je kadue iete Yohanan, ie mamimpin 280.000 biti tantara.

¹⁶Oloh je kateloe iete Amasia anak Sikhri; ie mamimpin 200.000 tantara. (Amasia te ije biti oloh je awi kahandake kabuat manempo TUHAN).

¹⁷Pangkalima baris pasukan bara bangsa hong kakare suku Benyamin iete Elyada, ije biti oloh patuh parang je menteng. Ie mamimpin 200.000 biti tantara je mahapan panah tuntang talawang.

¹⁸Oloh je kadue hong baris pasukan toh iete Yosabad; ie mamimpin 180.000 biti tantara je sukop dengan pakakas parang.

¹⁹Ewen te je bagawi intu Yerusalem. Beken bara te, raja mandak kare baris pasukan beken intu kare kota hong tanah Yuda.