Read Ngaju 2 KRONIKA 18 Bible Online

2 KRONIKA 18 - Ngaju bible

2 KRONIKA 18

¹Metoh Yosapat raja Yuda jari tatau tuntang basewut, ie mangawin ije biti bara keluargae dengan ije biti oloh bara keluarga Ahab raja Israel.

²Pire-pire nyelo limbah te Yosapat haguet maja Ahab intu lewu Samaria. Akan mahormat Yosapat tuntang kare oloh ayue, Ahab mawi pesta tuntang manyoho manyambalih are tabiri tuntang sapi. Hong katika te ie mimbit Yosapat uka manyarang lewu Ramot intu Gilead.

³Ie misek, “En nahuang ikau haguet hayak aku manyarang lewu Ramot?” Yosapat tombah, “Yoh, tantara ayungku kareh hinje dengan tantara ayum. Itah parang haya-hayak.

⁴Tapi bahalap amon itah miseke helo dengan TUHAN.”

⁵Maka Ahab mamumpong 400 nabi palus misek ewen, “En aku tau haguet manyarang Ramot atawa dia?” “Tau”, koan ewen. “Hatalla kareh manyarah lewu te akan Raja.”

⁶Tapi Yosapat misek tinai, “En intu hetoh jaton nabi beken je tau misek TUHAN akan itah?”

⁷Ahab tombah, “Magon aton ije, Mikha anak Yimla. Tapi aku dia rajin dengae, awi dia puji ie manujum taloh je bahalap akangku; harajur je dia bahalap.” “Ela hamauh kalote,” tombah Yosapat.

⁸Palus Ahab mantehau ije biti pagawai istana balalu manyoho ie capa-capat haguet manduan Mikha.

⁹Katika te Ahab tuntang Yosapat, dengan pakaian raja; mondok intu karosi karajaan intu eka mihik gandom intu hila baun lawang Samaria, metoh kare nabi dumah manaharep manyampai tujum ewen.

¹⁰Ije bara kare nabi te je arae Sedekia anak Kenaana, je jari manampa akae tandok sanaman palus hamauh, dengan Ahab, “Jetoh je insanan TUHAN, ‘Dengan kare tandok kilau toh Raja kareh mantakan Siria tuntang mampahancor ewen.’ ”

¹¹Uras nabi je beken satuju tuntang hamauh, “Nyarang Ramot, Raja kareh bontong. TUHAN kareh manenga kamanang akan Raja.”

¹²Hemben te sarohan je manduan Mikha, hamauh dengan Mikha, “Uras nabi je beken manujum kamanang akan raja. Keleh ikau kea manujum taloh je bahalap kilau ewen.”

¹³Tapi Mikha tombah, “Tagal TUHAN je belom aku baya mansanan taloh je insanan Hatalla akangku!”

¹⁴Limbah Mikha sampai intu taharep Raja Ahab, raja misek, “En tau aku tuntang Raja Yosapat haguet manyarang Ramot atawa dia?” “Sarang ih!” tombah Mikha. “Tantu Raja kareh bontong, TUHAN kareh manenga kamanang akan Raja.”

¹⁵Ahab tombah, “Amon ikau hamauh dengangku hapan aran TUHAN, sanan je toto. Hangkapire aku patut mampingat ikau tahiu taloh te?”

¹⁶ Mikha tombah, “Aku mite tantara Israel balua bilang-bilanga intu kare bukit. Ewen kilau tabiri je jaton sakatik, tuntang TUHAN hamauh tahiu ewen, ‘Kare oloh toh jaton aton pamimpie. Nauh ewen buli dengan salamat.’ ”

¹⁷Palus koan Ahab dengan Yosapat, “Pea hureh? Dia puji ie manujum taloh je bahalap akangku! Harajur je papa ih!”

¹⁸Mikha hamauh tinai, “Toh hining taloh je insanan TUHAN! Aku mite TUHAN mondok hong padadusan Aie intu sorga, tuntang uras malekat Ayue mendeng tokep Ie.

¹⁹TUHAN misek, ‘Eweh kareh mangatau Ahab mangat ie maku haguet parang tuntang matei intu Ramot hong Gilead?’ Auh tombah kare malekat te hakabeken.

²⁰Kajariae dumah ije roh. Ie manokep TUHAN tuntang hamauh, ‘Aku kareh mangatau ie’. ‘Kilen ampin carae?’ pisek TUHAN.

²¹Roh tombah, ‘Aku akan haguet tuntang mawi uras nabi ain Ahab mananjaro’. TUHAN hamauh, ‘Yoh, lalus jete, ikau kareh olih mangatau ie.’ ”

²²Limbah te Mikha hamauh, “Jete taloh je manjadi! TUHAN jari mawi kare nabi ain Raja mananjaro Raja, awi TUHAN jari manukas uka mawi calaka akan Raja!”

²³Balalu Nabi Sedekia miar manokep Mikha palus manampar baue tuntang hamauh, “Kueh tau Roh TUHAN malihi aku tuntang hakotak dengam?”

²⁴Mikha tombah, “Kareh ikau mite buktie katika ikau tame akan ije karong uka manyahokan!”

²⁵“Singkap ie” prentah Raja Ahab, “tuntang imbit ie talih Amon, walikota, tuntang akan pangeran Yoas anak raja.

²⁶Soho ewen manamean ie akan huang penjara, tuntang manenga akae taloh kinan taloh ihop baya isut bewei sampai aku haluli dengan salamat.”

²⁷Koan Mikha, “Amon Raja haluli dengan salamat, rimae TUHAN dia hakotak mahalau aku. Uras je aton intu hetoh jadi saksi.”

²⁸Limbah te Ahab raja Israel, tuntang Yosapat raja Yuda haguet manyarang lewu Ramot intu Gilead.

²⁹Ahab hamauh dengan Yosapat, “Aku handak manyamar tuntang omba parang, tapi ikau keleh mahapan pakaian raja.” Kalote raja Israel manyamar metoh haguet parang.

³⁰Metoh te kare kapala pasukan kareta parang Siria jari irentah awi rajae uka baya manyarang raja Israel.

³¹Jadi, metoh ewen mite Raja Yosafat, ewen manyangka ie te raja Israel. Awi te ewen manyarang ie. Tapi Yosapat mangkariak, palus TUHAN mandohop ie tuntang mindah manyarang manintu eka beken.

³²Sana kare pangkalima pasukan kareta parang Siria katawan je jete dia raja Israel, ewen terai manyarang ie.

³³Tabarong metoh te ije biti tantara Siria malekas anak panah mananterap. Tapi anak panah te buah Ahab tuntang manembus sapan baju parange. “Aku buah!” kariak Ahab dengan oloh je mangamburi karetae, “Mules tuntang imbit aku balua bara parang toh!”

³⁴Tapi awi kalahi te magon hamok, tuntang Raja Ahab tetep mendeng sambil iimbing huang karetae manaharep tantara Siria. Maka hayak manatanandau belep ie matei.