Read Ngaju 2 KRONIKA 19 Bible Online

2 KRONIKA 19 - Ngaju bible

2 KRONIKA 19

¹Limbah Yosapat raja Yuda haluli dengan salamat huang istana intu Yerusalem,

²ije biti nabi arae Yehu anak Hanani dumah manaharep raja. Koan nabi te dengae, “En patut Raja mandohop oloh papa tuntang sinta oloh je basingi dengan TUHAN? Gawin Raja mawi sabab TUHAN sangit dengan Raja.

³Aloh kalote aton kea je bahalap intu Raja. Raja jari manganan uras hampatong Dewi Asera je inyembah rayat, tuntang Raja jari kea mamparahan kahandak uka belom manumon kahandak Hatalla.”

⁴Raja Yosapat melai intu Yerusalem. Tapi ie kinjap manalih rayat intu hapus tanahe uka maningak ewen mangat mules haluli manempo TUHAN, Hatallan ewen.

⁵Intu genep lewu bakota intu Yuda ie mangkat kare hakim;

⁶ie manenga parentah akan ewen, “Bagawi bua-buah, awi keton mamutus dia hapan aran olon, tapi hapan aran TUHAN. Ie manantuani keton metoh keton mamutus pakara.

⁷Keton musti mikeh TUHAN tuntang bagawi bua-buah, awi TUHAN, Hatallan itah basingi dengan oloh je dia bujur, je mamutus babehat silae atawa je manarima panengan oloh.”

⁸Intu Yerusalem Yosapat mangkat kea kare hakim bara marak oloh Lewi, kare imam tuntang kare oloh basewut. Ewen musti mamutus kare perkara tahiu kalangkah taharep Parentah TUHAN tuntang kare perkara beken.

⁹Akan kare hakim te Yosapat manenga parentah toh, “Lalus kare gawin keton hayak manumon parentah TUHAN. Numon kakare parentah Aie te huang malalus kare gawin keton.

¹⁰Amon kare sobat keton bara lewu beken mimbit akan keton ije perkara pampatei, kalangkah taharep parentah atawa kalangkah taharep kare atoran, keleh keton manarang akan ewen. Tumon te ewen dia mawi kasalan dengan TUHAN, tuntang TUHAN dia akan sangit dengan keton atawa dengan ewen. Lalus parentah toh, maka keton kareh dia buah kasalan.

¹¹Imam Hai Amarya inengaku kuasa pangkagantonge akan kare perkara tahiu kare parentah tuntang atoran huang agama. Sebaya anak Ismael, iete gubernur Yuda, inengaku kuasa pangkagantonge akan uras pakara beken. Kare oloh Lewi omba mandohop uka kare putusan basara te toto-toto ilalus. Lalus atoran toh tuntang keleh mamutus perkara hapan kabujur. Keleh TUHAN mampahayak oloh je bagawi bujur!”