Read Ngaju 2 KRONIKA 2 Bible Online

2 KRONIKA 2 - Ngaju bible

2 KRONIKA 2

¹Raja Salomo jari manukas uka mamangun Human TUHAN, tuntang ije istana akae kabuat.

²Awi te ie mirak 70.000 biti uka mimbit ramon pangun huma, 80.000 biti akan mamahat batu intu bukit tuntang 3.600 mandor akan manantuani gawi te.

³Salomo mangirim kabar jetoh akan Hiram raja Tirus, “Keleh Tuan badagang dengangku kilau Dawid bapaku. Tuan jari manjual akae kayu alau Libanon akan mamangun istanae.

⁴Toh aku handak mamangun ije huma sombayang je tantai akan mahormat TUHAN, Hatallangku. Intu huma te aku tuntang rayatku kareh sombayang intu Ie dengan mamapui garo je mangat ewaue, hayak maluput rote tampayah Akae harajur. Intu huma te ikei kea kareh maluput parapah je ingehu genep hanjewu tuntang hamalem, genep andau Sabat, andau Bulan Taheta tuntang kare andau je inantu je beken akan mahormat TUHAN, Hatallan ikei. Awi, Ie jari marentah mangat taloh te ilalus katatahie awi oloh Israel.

⁵Aku nahuang uka Human TUHAN je kareh imangungku te kilau huma je paham ihormat. Awi, Hatallan ikei labih paham ihormat bara hatalla je kueh bewei.

⁶ Tapi katotoe jaton je olih mampendeng huma akan Hatalla, awi aloh kare langit pangkagantonge mahin dia sukup kahaie akan eka melai Akae. Jadi, Human TUHAN je olih impendengku te baya eka akan mamapui garo akan Hatalla!

⁷Awi te, keleh Tuan mangirim akan ikei ije biti oloh je tau mawi ukiran tuntang tau nguan amas, perak, tambaga, sanaman, kea tau nguan benang biru, ungu tuntang bahandang. Ie kareh bagawi sama dengan kare tukang hong Yuda tuntang Yerusalem je jari iintih awi bapaku Dawid.

⁸Aku katawan kare oloh je maneweng kayu intu lewun Tuan apik maneweng kayu. Awi te keleh Tuan mangirim akangku sepsimpan kayu alau tuntang kayu cendana bara Libanon. Aku kareh mairak kare oloh ayungku akan mandohop kare oloh ayun Tuan,

⁹mangat ewen manatap are-are kayu. Awi Human TUHAN je handak imangungku te puna hai tuntang bahalap.

¹⁰Akan bahatan kare oloh ayun Tuan te kareh aku mangirim akan Tuan due macam gandom, je karee samandiaie 2.000 ton, anggor 400.000 liter tuntang undus saitun 400.000 liter.”

¹¹Akan baleh surat Raja Salomo te, Raja Hiram mangirim surat je auhe kalutoh, “Awi TUHAN sinta ungkup Ayue, Ie jari mangkat Tuan jadi rajan ewen.

¹²Tara akan TUHAN, Hatallan Israel, je manjapa langit tuntang petak! Ie manenga akan Dawid ije biti anak hatue je paham harati tuntang pintar, tinai aton pangalamae. Toh ie metoh handak mampendeng ije huma akan TUHAN tuntang ije istana akae kabuat.

¹³Hayak toh aku mangirim akan Tuan ije oloh je are kataue tuntang pintar hayak apik bagawi, arae Huram.

¹⁴Indue bara suku Dan, bapae oloh Tirus. Ie tau mawi kare ramo bara amas, perak, tambaga, sanaman, batu tuntang kayu. Ie tau mawi benang biru, ungu, bahandang, tuntang kea benang lena. Uras macam gawi maukir tau ie mawie manumon tampan en bewei je ilaku. Keleh ie inenga gawi hayak dengan kare tukang ain Tuan, tuntang dengan oloh je jari bagawi akan Raja Dawid bapa Tuan.

¹⁵Ikei mentai kiriman due macam gandom, anggor tuntang undus saitun je injanji Tuan te.

¹⁶Ikei kareh maneweng kayu alau bara kare bukit Libanon tumon kare je ihapan Tuan. Palus ikei marait kayu te jadi lanting tuntang mampahantonge mahalau tasik sampai akan Yope. Bara hete Tuan tau mimbite akan Yerusalem.”

¹⁷Raja Salomo mawi sensus akan hapus oloh bangsa beken je melai intu Israel, kilau je puji ilalus awi Dawid bapae. Palus ingatawan aton 153.600 biti oloh bangsa beken.

¹⁸Uju puluh koyan bara ewen inengae gawi uka munda kare ramon pangun, 80.000 akan mamahat batu intu kare bukit, tuntang 3.600 akan manantuani tuntang manjaga uka kare gawi ilalus manumon rencanae.