Read Ngaju 2 KRONIKA 20 Bible Online

2 KRONIKA 20 - Ngaju bible

2 KRONIKA 20

¹Pire-pire katahie limbah te tantara Moab tuntang Amon, haya-hayak dengan oloh pakat ewen tantara Meunim, manyarang Yuda.

²Palus dumah oloh mimbit barita toh akan Raja Yosapat, “Are toto tantara Edom jari dumah bara dipah Tasik Matei handak manyarang Raja. Ewen jari manguasa Haseson-Tamar.” (Haseson-Tamar iete aran beken bara En-Gedi).

³Yosapat mikeh palus ie balakudoa balaku pandohop bara TUHAN. Limbah te ie marentah uka hapus rayat puasa.

⁴Bara genep lewu hong Yuda oloh haguet akan Yerusalem uka balaku dohop dengan TUHAN.

⁵Ewen haya-hayak dengan oloh Yerusalem hapumpong intu parantaran je taheta intu Human TUHAN. Raja Yosapat mendeng intu taharep ewen;

⁶tuntang balakudoa dengan auh hai, “O TUHAN, Hatalla tato hiang ikei! Ikau Hatalla intu sorga tuntang marentah uras kare bangsa intu kalunen. Ikau kuasa tuntang abas; jaton je olih malawan Ikau.

⁷ Ikau Hatallan ikei. Metoh ungkup Ayum, bangsa Israel, dumah akan lewu toh, Ikau maharak kare oloh je metoh te melai intu hetoh. Palus Ikau manenga lewu toh akan turonan Abraham, sobatm, akan jadi tanah ayun ewen katatahie.

⁸Ewen jari melai intu hetoh tuntang jari mampendeng ije huma eka manyembah Ikau. Ewen katawan

⁹amon ewen buah hukum tagal kare dosan ewen, tuntang ewen buah parang, kare peres tuntang lau, ewen tau dumah talih Ikau tuntang mendeng intu baun huma sombayang toh. Hong kajaken ewen, ewen tau balakudoa manintu Ikau, tuntang Ikau kareh mahining tuntang mandohop ewen.

¹⁰ Toh bangsa Amon, Moab tuntang bangsa Edom manyarang ikei. Metoh tato hiang ikei dumah bara Misir, Ikau dia manyoho ewen manguasa lewun kare bangsa te. Palus tato hiang ikei maliut tuntang dia mamplomos bangsa Amon, Moab tuntang Edom te.

¹¹Toh, kalote ampie gawin kare bangsa te dengan ikei. Ewen handak maharak ikei bara lewu je inenga Awim akan ikei.

¹²Ikau Hatallan ikei. Hukum ewen, awi ikei toh dia olih manaharep tantara je are te, je handak manyarang ikei. Ikei dia katawan narai je akan ilalus ikei, awi te ikei manalih Ikau balaku dohop.”

¹³Hemben te uras oloh hatue ain Yuda dengan sawae tuntang kare anak ewen mendeng intu Human TUHAN.

¹⁴Intu bentok oloh are te aton ije biti oloh Lewi arae Yahasiel. Ie anak Sakharia bara jalahan Asap hong rinting turonan Benaya, Yeiel, Matanya. Metoh te Yahasiel iname awi Roh TUHAN,

¹⁵ tuntang ie hamauh, “Raja tuntang kare pahari handiai. TUHAN hamauh keton ela nihau kaharap atawa mikeh manaharep tantara je are te, awi je parang dia keton, tapi Hatalla.

¹⁶Jewu metoh ewen mandai mahalau jalan manukat intu Sis, nyarang ewen. Keton kareh hataharep dengan ewen intu tapakan janah hila baun padang pasir tokep Yeruel.

¹⁷Keton dia usah kalahi hong parang toh. Lius akan eka je jari inukas akan keton tuntang entai intu hete. Keton kareh mite TUHAN manenga kamanang akan keton. O oloh Yuda tuntang Yerusalem ela gaer atawa mikeh. Name wei parang te, TUHAN kareh mandohop keton!”

¹⁸Palus Raja Yosapat sontop. Hapus rayat omba kea hayak ie sontop manyembah TUHAN.

¹⁹Palus kare oloh Lewi bara jalahan Kehat tuntang Korah mendeng, tuntang basasurak manara TUHAN, Hatallan Israel.

²⁰Andau jewue hanjewu toto, rayat balua tuntang haguet akan padang pasir tokep Tekoa. Metoh ewen handak haguet, Yosapat manenga peteh toh akan ewen, “Rayat Yuda tuntang Yerusalem! Percaya bewei intu TUHAN, Hatallan keton, maka keton kareh olih manang. Tarima auh ajar bara kare nabin keton, maka keton kareh bahasil!”

²¹Limbah barunding dengan rayat, raja manyoho barisan koor mahapan pakaian je sama je bahut ihapan hong kare gawi barasih hong agama. Barisan koor te baris intu hila baun bara barisan tantara sambil manyanyi, “Tara akan TUHAN! Sintan Aie palus katatahie!”

²²Metoh barisan koor te manampara basasurak manyanyi, TUHAN mawi kaderoh intu bentok tantara ain musoh je kanjerae haguet manyarang.

²³Tantara Amon tuntang Moab manyarang tantara Edom tuntang mampalomose sama sindee. Limbah te ewen mules balalu sabak hasarang sama arepe.

²⁴Metoh tantara Yuda sampai intu candi jaga hong padang pasir tuntang manampayah eka musoh, ewen mite hantun musoh hakalampah intu petak. Jaton ije bara tantara ain musoh je belom.

²⁵Palus Yosapat dengan kare oloh ayue haguet marampas kare ramon musoh. Ewen dinon are meto, ramo, pakaian, tuntang kare taloh barega je beken. Limbah mamumpong kare ramo te telo andau katahie magon are kare ramo beken sampai tarapaksa ilihi.

²⁶Hong andau kaepat ewen uras hapumpong intu Janah Tara tuntang manara TUHAN tagal taloh handiai je jari ilalus Awie. Jete bukue janah te inyewut “Tara”.

²⁷Palus Yosapat mamimpin hapus pasukan buli akan Yerusalem dengan kahanjak awi TUHAN jari mampakalah musoh ewen.

²⁸Metoh ewen sampai intu lewu, ewen baris akan Human TUHAN impahayak kacapi tuntang tarompet.

²⁹Uras karajaan beken mikeh metoh mahining kilen ampie TUHAN mampakalah kare musoh oloh Israel.

³⁰Jete bukue Yosapat marentah hong kasanang, tuntang TUHAN manenga akae kasanang akan hapus petak danume.

³¹Yosapat jadi raja Yuda hong umure 35 nyelo, tuntang ie marentah intu Yerusalem 25 nyelo katahie. Indue iete Asuba anak Silhi.

³²Kilau Asa bapae, Yosapat malalus taloh je bahalap huang tampayah TUHAN.

³³Tapi kare eka manyembah dewa dia ie manganae. Rayat hindai kea sombayang dengan salepah atei intu Hatalla tato hiang ewen.

³⁴Sarita je beken tahiu Yosapat, bara tamparae sampai lawin ie marentah, incatet hong Saritan Yehu anak Hanani, je imuat hong buku Sejarah Kare Raja Israel.

³⁵Sinde katika Yosapat raja Yuda mawi pakat dengan Ahasia raja Israel, je mawi are kapapa.

³⁶Intu palabuhan Esion-Geber ewen manampa kare kapal uka balayar akan Tarsis.

³⁷Tapi Nabi Elieser anak Dodawa bara lewu Maresa mampingat Yosapat, koae, “Awi Raja mawi pakat dengan Ahasia, TUHAN kareh mampahancor gawin Raja.” Maka kare kapal je inampae lepah hancor sampai dia tau balayar samasinde.