Read Ngaju 2 KRONIKA 21 Bible Online

2 KRONIKA 21 - Ngaju bible

2 KRONIKA 21

¹Yosapat matei tuntang ingubur hong eka kubur kare raja intu Lewun Dawid. Yoram anak hatuee jadi raja mangganti ie.

²Yoram anak Yosapat, raja Yuda, aton jahawen paharie hatue: Asarya, Yehiel, Sakharia, Asariahu, Mikhail, Sepaca.

³Ewen mandino are amas, perak tuntang kare ramo barega je beken bara bapa ewen, tuntang genep bitie inenga kea ije lewu bakota intu Yuda. Tapi awi Yoram anak je tambakase, ie te je inukas awi Yosapat akan jadi raja.

⁴Metoh Yoram mangkeme kuasae kilau raja jari dehen, ie manyoho mampatei uras paharie, tuntang kea pire-pire pagawai je gantong pangkate.

⁵Yoram jadi raja hong umur 32 nyelo, tuntang ie marentah intu Yerusalem katahin 8 nyelo.

⁶Ie manumon pambelom Raja Ahab tuntang kare raja Israel je beken, awi ie kawin dengan ije bara anak bawi ain raja Ahab. Ie badosa taharep TUHAN,

⁷ tapi TUHAN dia maku mambinasa raja bara turonan Dawid awi ie jari hajanji tahiu turonan Dawid kareh tetep marentah.

⁸ Metoh Yoram marentah, Edom mambarontak malawan Yuda tuntang mampendeng karajaan kabuat.

⁹Awi te Yoram dengan kapala parange balua dengan kare kareta parange palus manyarang Edom. Ie ingapong pasukan Edom, tapi hamaleme ewen manembus arepe bara kapong musoh tuntang balalu hadari.

¹⁰Bara te Edom dia mamenda Yuda tinai. Hong katika te lewu Libna kea mambarontak bara Yuda. Urase taloh te manjadi awi Yoram jari malihi TUHAN, Hatalla je inyembah tato hiange.

¹¹Ie mampendeng haream kare eka mayembah hampatong intu tanah habukit Yuda, tuntang mawi sabab rayat Yuda tuntang Yerusalem badosa taharep TUHAN.

¹²Palus Yoram mandino ije kalambar surat je inyurat awi Nabi Elia metoh ie magon belom. Kalotoh auh surat te, “TUHAN, Hatalla je inyembah Dawid, mahukum Raja awi Raja dia manumon gawin bapa tuntang bue Raja.

¹³Kabalikae Raja belom kilau kare raja Israel, tuntang mawi sabab rayat Yuda tuntang Yerusalem dia baketep dengan Hatalla. Raja bagawi kilau Raja Ahab dengan kakare raja je mangganti ie. Raja mampatei haream kare paharin Raja, padahal ewen labih bahalap bara Raja.

¹⁴Hukum je babehat bara TUHAN kareh mawi rayat, kare anak tuntang kare sawan Raja, tuntang mambinasa uras kare panatau Raja.

¹⁵Raja kabuat kea kareh buah peres bajakah kanai je sasar paham!”

¹⁶Hong katika te aton oloh Pilistin tuntang oloh Arab je melai tokep oloh Sudan intu saran pantai. TUHAN manggerek atei kare oloh te akan mamarang Yoram.

¹⁷Ewen manyarang Yuda, marampok istana raja, palus manduan uras anak sawan Yoram kilau tawanan, kacuali Ahasia, anake je busu.

¹⁸Limbah kare kajadian te, TUHAN mahukum Yoram dengan peres bajakah kanai je dia tau keleh.

¹⁹Katahin tokep due nyelo peres sasar paham, sampai kajariae hayak manyarenan paham kapehe ie matei. Rayat ayue dia manotong pehon tanda kapehe atei kilau je ilalus ewen akan tato hiange.

²⁰Jaton oloh je manyasal pampateie. Ie ingubur intu Lewun Dawid, tapi dia intu eka kubur kare raja. Yoram manjadi raja metoh umure 32 nyelo, tuntang ie marentah intu Yerusalem 8 nyelo katahie.