Read Ngaju 2 KRONIKA 22 Bible Online

2 KRONIKA 22 - Ngaju bible

2 KRONIKA 22

¹Hong ije asang awi gerombolan oloh Arab uras anak hatue ain Yoram, suali Ahasia je busu, impatei. Awi te oloh Yerusalem mangkat Ahasia jadi raja mangganti bapae.

²Ahasia jadi raja hong umur 22 nyelo[10] tuntang ie marentah intu Yerusalem katahin ije nyelo. Ahasia kea belom kilau keluarga Raja Ahab, awi Atalya indue manenga tirok akae uka ie malalus gawi je papa. Atalya iete anak bawi ain Raja Ahab, eson Omri raja Israel.

⁴Ahasia badosa dengan TUHAN kilau keluarga Raja Ahab, awi ewen te je jadi oloh je tukang manenga tirok akae limbah bapae matei. Kare oloh je manenga tirok akae te je mancalaka ie.

⁵Awi tirok bara ewen te ie hapakat dengan Yoram raja Israel akan parang malawan Hasael raja Siria. Ewen parang intu Ramot tanah Gilead. Yoram bahimang intu parang te,

⁶balalu ie haluli akan lewu Yisreel uka inatamba, tuntang Ahasia haguet manyengok ie intu hete.

⁷Hatalla jari manukas, Ahasia kareh matei metoh ie maja Yoram. Hong kaja te Ahasia tuntang Yoram ilawan awi ije biti hatue bagare Yehu anak Nimsi, je jari intih TUHAN akan mambinasa keluarga Raja Ahab.

⁸Metoh Yehu malalus hukum TUHAN dengan keluarga te, ie hasondau dengan are oloh bapangkat gantong hong karajaan Yuda tuntang kare aken Ahasia je omba hong kaja te. Palus Yehu mampatei ewen urase.

⁹Limbah te ie manyoho oloh manggau Ahasia je metoh te metoh manyahokan intu Samaria. Limbah Ahasia dinon, ie imbit akan Yehu palus impatei. Aloh kalote ie ingubur kea awi ewen, karana ewen mahormat Raja Yosapat, buee je manempo TUHAN salepah atei. Bara keluarga Ahasia jaton je olih mangganti ie manjadi raja.

¹⁰Metoh Atalya katawan Raja Ahasia anake jari matei, ie marentah uka uras keluarga raja Yuda impatei.

¹¹Ahasia aton ije biti paharie bawi je bagare Yoseba je kawin dengan ije biti imam arae Yoyada. Suni-suni Yoseba manduan ije biti anak Ahasia je arae Yoas bara marak kare anak raja je handak impatei Atalya. Anak te dengan ayange inyahokae intu huang ije karong intu Human TUHAN. Kalote Yoseba manyalamat anak te sampai dia impatei awi Atalya.

¹²Jahawen nyelo katahie Yoas inyahokan hong Human TUHAN pandehan Atalya marentah kilau Ratu.