Read Ngaju 2 KRONIKA 23 Bible Online

2 KRONIKA 23 - Ngaju bible

2 KRONIKA 23

¹Intu nyelo kauju Imam Yoyada mamutus uka manduan tindakan. Ie pakat dengan lime pangkalima, iete Asarya anak Yeroham, Ismail anak Yohanan, Asarya anak Obed, Maaseya anak Adaya, tuntang Elisapat anak Sikhri.

²Ewen haguet manalih kakare lewu hong hapus Yuda tuntang mamumpong kare oloh Lewi dengan uras kapala jalahan, palus mimbit ewen akan Yerusalem.

³ Ewen hapumpong intu Human TUHAN, tuntang mawi janji dengan Yoas anak raja te. Yoyada hamauh dengan ewen, “Jetoh anak taliau Raja Ahasia! Ie toh musti jadi raja, awi TUHAN jari hajanji tahiu turonan Raja Dawid kareh tetep marentah.

⁴Jetoh je musti ilalus itah: Amon kare imam tuntang oloh Lewi lepah bagawi hong andau Sabat, ewen dia tau buli. Sapertelo bara ewen omba manjaga intu kare bauntonggang Human TUHAN,

⁵sapertelo tinai intu istana raja, tuntang je tisae intu Lawang Penda. Hapus rayat hapumpong intu parantaran Human TUHAN.

⁶Jaton ije je tau tame Human TUHAN beken bara kare imam tuntang oloh Lewi je metoh bagawi. Ewen tau tame awi ewen jari tantai akan TUHAN. Kare oloh beken manumon atoran TUHAN tuntang melai intu luar.

⁷Kare oloh Lewi mendeng hakaliling raja dengan padang basilak, tuntang manjaga ie kakueh bewei ie haguet. Eweh je handak tame Human TUHAN impatei.”

⁸Parentah Yoyada te ilalus awi kare oloh Lewi tuntang rayat Yuda. Kare oloh je lepah tugas hong andau Sabat dia tau buli. Jadi, kare pangkalima mairak aloh oloh je lepah gawie atawa je harue dumah handak bagawi.

⁹Akan kare Kapala Pasukan Yoyada mambagi kare lunju tuntang talawang ayun Dawid je ingkes hong Human TUHAN.

¹⁰Yoyada kea mandak kare oloh dengan padang basilak hakaliling hila baun Human TUHAN akan mangalindong raja.

¹¹Limbah te Yoyada mimbit Yoas balua, palus mangkepan makota hunjun takoloke, tuntang manyarah akae buku Parentah Hatalla. Kalote Yoas iangkat jadi raja. Limbah te Imam Yoyada dengan kare anake manusoh minyak hapa malantik Yoas, palus uras oloh mangkariak “Belom raja!”

¹²Atalya mahining rayat basasurak manyambut raja. Balalu ie bajeleng haguet akan Human TUHAN eka oloh hapumpong.

¹³Ie mite raja taheta mendeng intu bauntonggang tame Human TUHAN, eka ie ilantik, ingaliling awi kare pangkalima tuntang oloh je mahimon tarompet. Hapus rayat basasurak hanjak sambil tarompet impahiau. Kare tukang musik intu Human TUHAN mamparami pesta te dengan kare pakakas musik ewen. Palus Atalya marabit pakaiae hayak mangkariak, “Kianat! Kianat!”

¹⁴Yoyada mangahana mampatei Atalya tokep Human TUHAN. Palus ie hamauh dengan kare pangkalima, “Imbit ie balua mahalau barisan oloh je manjaga Human TUHAN tuntang patei eweh bewei je handak manyalamat ie.”

¹⁵Ewen manyingkap ie tuntang palus mimbite akan istana. Intu hete ie imampatei intu Lawang Kuda.

¹⁶Imam Yoyada mimbit Raja Yoas tuntang rayat haya-hayak dengae mampendeng janji je ewen kareh jadi ungkup TUHAN.

¹⁷Limbah te ewen palus manyarang tuntang manderep human Baal. Mesbeh tuntang kare hampatong impahancor, tuntang Matan, imam Baal impatei intu baun kare mesbeh te.

¹⁸Palus Yoyada manyoho kare imam tuntang oloh Lewi uka mamanantuani gawi intu Human TUHAN manumon bagin gawi je inukas awi Raja Dawid. Ewen maluput parapah je ingehu akan TUHAN — tumon kare atoran Moses — dengan pesta tuntang kare nyanyi kilau je jari iator awi Dawid.

¹⁹Intu kare lawang Yoyada mandak pangawal akan manjaga mangat oloh je dia patut manyembah TUHAN dia tau tame.

²⁰Kare pangkalima, oloh basewut bara marak oloh Yuda, kare pagawai pamarentah, tuntang hapus rayat omba Yoyada maarak Raja Yoas bara Human TUHAN akan istana. Ewen tame bara lawang mambatang palus raja mondok intu hunjun padadusae.

²¹Hapus rayat hanjak, lewu kea sanang tuntang Atalya jari impatei.