Read Ngaju 2 KRONIKA 24 Bible Online

2 KRONIKA 24 - Ngaju bible

2 KRONIKA 24

¹Yoas umure 7 nyelo metoh ie jadi raja Yuda. Ie marentah intu Yerusalem 40 nyelo katahie. Indue bagare Sibya bara lewu Berseba.

²Katahin imam Yoyada magon belom, Yoas mawi kare taloh je manyanang atei TUHAN.

³Yoyada mintih due oloh bawi akan jadi sawan Yoas, tuntang bara ewen Yoas mandino kare anak hatue tuntang bawi.

⁴Limbah marentah pire-pire katika katahie, Yoas manukas akan mangambuah Human TUHAN.

⁵Kare imam tuntang oloh Lewi irentah haguet talih oloh hong kare lewu intu Yuda. Ewen mamumpong bara rayat hapa mangambuah Human TUHAN genep nyelo. Ie manyoho ewen jeleng malalus gawi te, tapi kare oloh Lewi rangka-rangkah gawie.

⁶ Awi te ie mantehau Imam Yoyada, kapalan ewen, palus hamauh, “En dia Moses rewar TUHAN jari manyoho rayat uka mambayar pajak akan ongkos Kemah TUHAN? Toh, mbuhen oloh Lewi te dia ikau hajajuae uka mamumpong pajak bara rayat intu Yuda tuntang Yerusalem?” (

⁷Kare oloh ain Atalya, bawi papa te, jari marusak Human TUHAN, tuntang are bara kare ramo je tantai akan Hatalla jari ihapan ewen manyembah Baal).

⁸Palus raja marentah mangat oloh Lewi manampa ije patin duit, tuntang mingkese intu baun lawang Human TUHAN.

⁹Hong hapus Yerusalem tuntang Yuda insanan tahiu oloh musti mambayar pajak akan TUHAN, kilau je inyoho Moses.

¹⁰Pasanan te manyanang atei rayat tuntang kare pamimpin ewen, rami-rami ewen malaboh duit pajak ewen akan huang pati te.

¹¹Genep andau pati te iimbit awi oloh Lewi akan pagawai pajak uka iriksa. Amon pati te jari kontep, sekretaris negara tuntang wakil Imam Hai mampalua duite palus pati te ilian akan ekae je solake. Kalote ilalus ewen genep andau, tuntang are toto duit je dinon.

¹²Limbah te raja tuntang Yoyada manyarah duit te akan kare oloh je mangapala gawi mangambuah Human TUHAN te. Palus kare oloh te mupah tukang batu, tukang kayu, tuntang logam akan manguan gawi te.

¹³Palus kare tukang te nampara mangambuah Human TUHAN te. Ewen uras bagawi kalote sampai kajariae huma te dehen tuntang bahalap kilau je solake.

¹⁴Limbah gawi te hapus, amas tuntang perak dengan kalabiee inyarahe akan raja tuntang Yoyada. Palus amas tuntang perak te ihapan mawi kare pakakas akan Human TUHAN, iete: kare pakakas akan gawin sombayang, akan parapah je ingehu, kare piring akan garo, tuntang kare mangkok. Katahin Imam Yoyada magon belom, parapah je ingehu tetep iluput intu Human TUHAN.

¹⁵Yoyada manyampai umur je bakas tuntang malihi kalunen metoh umure 130 nyelo.

¹⁶Ie ingubur intu kuburan kare raja intu Lewun Dawid akan marega kare jasae akan Hatalla, akan Human TUHAN tuntang akan ungkup Israel.

¹⁷Limbah Yoyada matei, Yoas ingatau awi kare pamimpin Yuda, sampai ie dia tinai paduli ajar Yoyada.

¹⁸Palus rayat dia tinai sombayang intu Human TUHAN, Hatallan tato hiang ewen, tapi manyembah kare hampatong tuntang hampatong Dewi Asera. Dosan ewen te mawi sabab TUHAN sangit dengan Yuda tuntang Yerusalem.

¹⁹TUHAN manyoho kare nabi uka mampingat ewen uka mules haluli manempo TUHAN, tapi rayat dia maku mahining.

²⁰ Palus Roh Hatalla manyuang Sakharia anak Imam Yoyada. Sakharia dumah intu taharep rayat palus hamauh, “TUHAN, Hatalla hamauh, ‘Mbuhen keton dia manumon kare parentah-Ku tuntang mancalaka arep keton kabuat, keton dia paduli Aku, maka Aku kea dia paduli keton!’ ”

²¹Tapi rayat pakat malawan Sakharia, tuntang Yoas omba hong pakat te. Ie kalapean kare kataun gawie tuntang kaketep Yoyada bapa Sakharia. Hapan parentah raja, Sakharia imedak hapan batu sampai matei hong parantaran Human TUHAN. Metoh handak matei Sakharia mantehau, “Keleh TUHAN mite gawin keton tuntang mambalehe!”

²³Nyelo te kea, hong katika musim baganti, tantara Siria manyarang Yuda tuntang Yerusalem. Ewen mampatei uras pamimpin tuntang manduan are ramo rampasan akan Damaskus.

²⁴Tantara Siria isut ih bitie, tapi TUHAN manalua ewen mampakalah tantara Yuda je kejau labih are, awi oloh Yuda dia paduli TUHAN, Hatallan tato hiang ewen. Hapan cara te TUHAN mahukum Raja Yoas.

²⁵Yoas bahimang paham. Limbah tantara musoh haguet, due biti pagawai pakat. Ewen mampatei ie intu ekae batiroh kilau baleh akan pampatei anak Imam Yoyada. Raja Yoas ingubur intu Lewun Dawid, tapi dia intu kuburan kare raja. (

²⁶Kare oloh je pakat malawan ie iete Sabad anak Simeat bawin oloh Amon, tuntang Yosabad anak Simrit bawin oloh Moab).

²⁷Sarita tahiu kare anak Yoas, tahiu kare tujum je dia bahalap tahiu ie tuntang kilen ampie ie mangambuah Human TUHAN urase aton hong buku Panarang buku kare raja. Amasia, anak Yoas, jadi raja mangganti bapae.