Read Ngaju 2 KRONIKA 25 Bible Online

2 KRONIKA 25 - Ngaju bible

2 KRONIKA 25

¹Amasia jadi raja katika umure 25 nyelo, tuntang ie marentah intu Yerusalem 29 nyelo katahie. Indue iete Yoadan bara Yerusalem.

²Amasia malalus taloh je manyanang atei TUHAN tapi baya satengah atei.

³Sana kuasae dehen, ie mahukum matei kare pagawaie je mampatei bapae.

⁴ Tapi kare anak pagawai te dia impateie awi ie manumon parentah TUHAN hong buku Moses je auhe, “Ela mahukum matei oloh bakas awi kapapa je ilalus kare anak ewen, tuntang ela mahukum matei kare anak awi kapapa je ilalus awi oloh bakas ewen. Genep biti baya tau ihukum matei awi kapapa je iawie kabuat.”

⁵Raja Amasia mamumpong uras oloh suku Yuda tuntang Benyamin, palus manyoho ewen mendeng manumon genep jalahae, imimpin awi kapala pasukan sakoyan tuntang kapala pasukan saratus. Limbah te ie mintih kare oloh je umure 20 nyelo kahunjun, je sanggam parang tuntang tau mahapan lunju tuntang talawang. Jumlah ewen aton 300.000 biti.

⁶Beken bara te ie manyewa 100.000 tantara bara Israel dengan bayarae kakira 3.400 kilogram perak.

⁷Tapi ije biti nabi dumah manalih raja tuntang hamauh, “Ela mahapan kare tantara Israel te, awi TUHAN dia mandohop oloh Israel je bara Karajaan Utara te.

⁸Tapi amon Raja mahapan ewen kea, Hatalla kareh manalua Raja impakalah musoh, aloh tantara ain raja abas tuntang bahanyi. Awi baya Hatalla ih je kuasa manenga kamanang atawa kakalah.”

⁹“Tapi kilen ampie dengan uras perak je jari inengaku akan ewen?” paisek Amasia. Nabi te tombah, “TUHAN tau malian akan Raja labih bara te!”

¹⁰Awi te Amasia mambebas kare tantara sewaan te tuntang manyoho ewen buli lewue. Ewen palus buli tapi dengan kasangit je paham.

¹¹Amasia mampahanyi arep tuntang mimbit tantarae akan Janah Uyah. Intu hete ewen kalahi tuntang mampatei 10.000 tantara Edom.

¹²Sapuluh koyan je beken inawan. Ewen imbit akan tantan bukit batu intu lewu Sela palus injakah akan penda sampai matei.

¹³Metoh te kea kare tantara Israel je jari inyoho buli awi Amasia, tuntang dia inyoho omba parang, jari manyarang kare lewun oloh Yuda helat Samaria dengan Bet-Horon. Ewen mampatei 3.000 biti tuntang marampas are ramoe.

¹⁴Limbah mampakalah tantara Edom, Amasia buli mimbit kare hampatong dewa ain oloh Edom tuntang mingkese intu Yuda. Palus ie mamapui garo akan kare hampatong te tuntang manyembahe.

¹⁵Gawie te mawi TUHAN sangit. Ie manyoho ije biti nabi talih Amasia. Nabi te hamauh, “Mbuhen Raja manyembah hampatong bangsa beken je dia tau manyalamat bangsa ayue kabuat bara kuasan Raja?”

¹⁶“Suni,” koan Amasia, “Amon dia impatei ikei ikau! Dia puji ikei mangkat ikau jadi oloh je tukang manenga tirok akan raja!” Palus nabi te suni, tapi helo bara te ie sampet hamauh, “Toh aku katawan Hatalla jari manukas akan mambinasa Raja awi gawin Raja te, tuntang Raja dia paduli auhku.”

¹⁷Amasia raja Yuda dengan kare oloh panasehat pakat malawan Israel. Ie mangirim sarohan akan Yoas raja Israel, anak Yoahas, eson Yehu, mangat mimbit ie baparang.

¹⁸Tapi Raja Yoas mangirim panombah toh, “Sinde katika unak duhi intu bukit Libanon mangirim palaku toh akan batang kayu alau, ‘O batang kayu alau, tenga anak bawi ayum akan anakku akan jadi sawae!’ Tapi limbah te mahalau intu hete ije kongan meto parak kayu je mahunje-hunje unak duhi te.

¹⁹Ikau, Amasia, mangamburau ih je manyewut ikau jari mampakalah oloh Edom, tapi labih bahalap ikau melai intu huma. Kandue manggau-gau pakara je baya kareh mancalaka arepm tuntang rayatm?”

²⁰Tapi Amasia dia paduli kare auh Yoas raja Israel. Tuntang Hatalla nahuang je Amasia impakalah awi ie jari manyembah hampatong dewa ain oloh Edom.

²¹Awi te Yoas haguet dengan oloh ayue akan Bet-Semes tuntang parang malawan Amasia intu hete.

²²Tantara Yuda impakalah tuntang uras tantarae hadari buli akan genep humae.

²³Yoas manyingkap Amasia tuntang mimbite akan Yerusalem, palus manderep dinding lewu te sampai 200 meter, nampara bara Lawang Epraim sampai akan Lawang Puting.

²⁴Uras amas tuntang perak dengan uras pakakas je dinon intu Human TUHAN tuntang je aton hong penda pangawasan Obed-Edom, kea uras ramo istana, hayak pire-pire tawanan imbit Yoas akan Samaria.

²⁵Limbah Yoas raja Israel matei, Amasia raja Yuda magon belom 15 nyelo tinai.

²⁶Bara katika Amasia malihi TUHAN, oloh pakat malawan ie intu Yerusalem. Awi te ie hadari akan lewu Lakhis, tapi kare musohe manggoang ie intu hete tuntang mampateie. Hantue imbit hapan kuda akan Yerusalem, palus ingubur intu kuburan kare raja intu Lewun Dawid. Sarita je beken tahiu Raja Amasia bara tamparae sampai lawin pamarentahae incatet hong buku Sejarah Kare Raja Yuda tuntang Israel.