Read Ngaju 2 KRONIKA 26 Bible Online

2 KRONIKA 26 - Ngaju bible

2 KRONIKA 26

¹Limbah Amasia matei, hapus rayat Yuda mintih Usia anake jadi raja. Metoh te ie 16 nyelo umure. Indue bagare Yekholya, bawin oloh Yerusalem. Usia marentah intu Yerusalem 52 nyelo katahie. Ie marabut tuntang mamangun haluli lewu Elot.

⁴Kilau bapae, Usia kea malalus taloh je manyanang atei TUHAN.

⁵Sakharia iete je panasehat rohani ayue. Katahin Sakharia magon belom Usia baketep sombayang intu TUHAN sampai TUHAN mamberkat ie.

⁶Usia parang malawan oloh Pilistin. Ie manderep kare dinding lewu Gat, Yabne tuntang Asdod, palus mampendeng kare lewu bakota tokep Asdod tuntang intu tanah beken hong Pilistin.

⁷Hatalla mandohop ie tuntang mampakalah oloh Pilistin, tuntang oloh Arab je melai intu Gur-Baal hayak oloh Meunim.

⁸Oloh Amon manyarah panenga akan Usia. Ie sasar kuasa sampai arae basewut sampai akan Misir.

⁹Akan mendehen Yerusalem, Usia mampendeng candi intu Lawang Puting, intu Lawang Janah tuntang intu belokan dinding.

¹⁰Ie kea mampendeng kare candi bakota intu janah, tuntang mangali are kalin danum awi metoe are toto, aloh intu petak gantong atawa petak randah hila barat. Awi ie manantuani gawi malan, maka ie mairak are oloh akan nguan kabon anggor intu daerah bukit, tuntang akan nguan petak intu kare eka petak je bajewong.

¹¹Ayun Usia aton tantara hai je harajur tatap sadia akan haguet parang. Ewen te kare baris pasukan je jumlahe incatet awi due sekretaris raja, iete Yeiel tuntang Maaseya, imimpin awi Hananya, ije bara pagawai raja.

¹²Hapus pasukan parang te aton 307.500 tantara imimpin awi 2.600 pangkalima. Ewen uras jadi kaabas je hai toto akan parang tuntang mandohop raja mampakalah musoh.

¹⁴Usia manyukup manggenep pakakas tantara te dengan talawang, lunju, tuntang tanggoi waja, baju sanaman, anak panah tuntang panah, hayak batu tuntang telon batu hapa mamanting batu.

¹⁵Intu Yerusalem are oloh je apik manampa pakakas parang jari tau manampa pakakas je tau mambidik anak panah tuntang kare batu hai hong candi je intu puting dinding kota je ngaliling lewu. Ia basewut intu hete-hete, tuntang ie jari paham hai kuasae awi Hatalla mandohop ie.

¹⁶Limbah raja Usia jari abas, ie balalu bajoho, tuntang jete mawi kahancore. Ie malanggar parentah TUHAN, Hatallae awi tame Human TUHAN akan mamapui garo intu hunjun mesbeh garo.

¹⁷Tapi Imam Asarya dengan 80 imam beken je aba-abas tuntang bahanyi manuntut ie

¹⁸ uka malawan gawie te. Ewen hamauh, “Raja jaton hak mamapui garo akan TUHAN. Jete gawin kare imam turonan Aron, awi ewen te je tantai akan jete. Keleh Raja malihi eka je barasih toh! Raja jari malawan Hatalla tuntang dia tinai mandino berkat Aie.”

¹⁹Metoh te Usia kanjerae mendeng tokep mesbeh dupa intu Human TUHAN dengan pakakas pamapui garo intu lengee, ie sangit dengan kare imam te tuntang salenga lembut panyakit kulit je baka ike-ikeh ampie intu lingakaue.

²⁰Asarya dengan kare imam beken je mite ie paham tarewen, palus mahajajuan ie mangat bajeleng malihi Human TUHAN. Bajeleng ie balua awi TUHAN jari mahukume.

²¹Sampai Raja Usia matei panyakit te dia kele-keleh. Ie imisah intu ije huma, tuntang dia inyoho tinai tame Human TUHAN. Ie imbebas bara kare gawie, tuntang Yotam anake marentah rayat kilau wakile.

²²Barita beken tahiu Raja Usia kahum ie marentah, jari incatet awi Nabi Yesaya anak Amos.

²³ Limbah ie matei Usia ingubur itu petak tokep kuburan kare raja, tapi dia intu kuburan te kabuat, awi ie buah panyakit kulit je baka ike-ikeh ampie. Yotam anak hatue ayue jadi raja mangganti ie.