Read Ngaju 2 KRONIKA 29 Bible Online

2 KRONIKA 29 - Ngaju bible

2 KRONIKA 29

¹Hiskia manjadi raja Yuda hong umur 25 nyelo, tuntang ie marentah intu Yerusalem 29 nyelo katahie. Indue bagare Abia anak Sakharia.

²Hiskia mawi taloh je manyanang atei TUHAN kilau Raja Dawid tato hiange.

³Hong bulan ije intu nyelo je solake ie marentah, Hiskia muap kare bauntonggang Human TUHAN tuntang manyoho oloh mangambuahe.

⁴Kare imam tuntang oloh Lewi inyohoe hampumpong intu parantaran hila timor Human TUHAN,

⁵tuntang ie hakotak dengan ewen intu hete. Ie hamauh, “Keton oloh Lewi musti mangabeken arep keton akan TUHAN, tuntang mamparasih Human TUHAN, Hatallan tato hiang keton. Uras taloh je mamapa huma te musti inganan.

⁶Tato hiang itah dia baketep dengan TUHAN Hatallan itah, tuntang ewen malalus taloh je dia manyanang atei Aie. Ewen dia paduli Ie tuntang dia paduli eka Ie melai.

⁷Ewen matep kare bauntonggang Human TUHAN tuntang mambelep kare sumbo. Ewen dia mamapui garo intu Human TUHAN, tuntang dia maluput parapah je ingehu akan Hatalla je inyembah awi Israel.

⁸Palus TUHAN hong kasangit Aie mahukum oloh Yuda tuntang Yerusalem. Tuntang keton uras katawan kapaham gawin TUHAN te jari mawi uras oloh tarewen tuntang mikeh.

⁹Kare bapa itah matei hong parang tuntang anak sawan itah induan kilau tawanan.

¹⁰Toh aku handak mawi janji dengan TUHAN, Hatallan Israel, mangat Ie dia sangit tinai dengan itah.

¹¹O anakku, ela langak tinai, awi keton je intih TUHAN akan sombayang Akae tuntang manempo Ie hayak mamapui garo tuntang manantiring rayat akan sombayang.”

¹²Kare oloh Lewi je aton metoh te iete: Bara jalahan Kehat: Mahat anak Amasai, tuntang Yoël anak Asarya. Bara jalahan Merari: Kis anak Abdi tuntang Asarya anak Yehalaleel. Bara jalahan Gerson: Yoah anak Sima, tuntang Eden anak Yoah Bara jalahan Elisapan: Simri tuntang Yeiel Bara jalahan Asap: Sakharia tuntang Matanya. Bara jalahan Heman: Yehiel tuntang Simei. Bara jalahan Yedutun: Semaya tuntang Usiel.

¹⁵Limbah te ewen mamumpong kare oloh Lewi je beken, tuntang ewen uras mamparasih arep. Limbah te tumon parentah raja, kare imam tame akan Human TUHAN tuntang nampara mamparasihe manumon kare parentah TUHAN. Uras taloh je papa imbit balua akan parantaran Human TUHAN. Bara hete oloh Lewi mimbite akan Janah Kidron intu luar lewu.

¹⁷Gawi te inampara hong tanggal ije bulan ije. Hong tanggal hanya gawin ewen mamparasih sahapus parantaran Human TUHAN sampai balai baun jari hapus. Limbah te katahin hanya andau tinai ewen mamparasih Human TUHAN tuntang ewen mahapus gawie hong tanggal jahawen walas bulan te kea.

¹⁸Palus kare oloh Lewi te mansanan akan Raja Hiskia, “Ikei jari lepah mamparasih Human TUHAN urase tamput kea mesbeh parapah je ingehu, meja akan rote tampayah, tuntang uras kare pakakase.

¹⁹Ikei kea jari manduan haluli kare pakakas je inganan Raja Ahas metoh ie dia paduli TUHAN metoh ie marentah. Uras pakakas te jari ingabeken ikei baya akan TUHAN, tuntang metoh toh aton intu hila baun mesbeh.”

²⁰Bajeleng Raja Hiskia mamumpong kare oloh basewut marak kare rayat, palus haguet hayak ewen akan Human TUHAN.

²¹Akan parapah ampun dosa akan keluarga raja tuntang rayat Yuda, tuntang akan mamparasih Human TUHAN, ewen mimbit 7 kongan sapi hatue, 7 kongan tabiri hatue, 7 kongan anak tabiri, tuntang 7 kongan kambing hatue. Raja manyoho kare imam turonan Aron mawi parapah kare meto te intu hunjun mesbeh kilau parapah je ingehu.

²²Kare sapi te inyambalih, palus kare imam manata dahae intu mesbeh. Limbah te ewen mawie kalote kea dengan uju kongan tabiri tuntang uju kongan anak tabiri te.

²³Kajariae ewen manduan kare kambing te palus mimbite akan raja tuntang rayat je kanjerae sombayang intu hete, palus ewen uras mandak lengen ewen akan hunjun kare kambing te.

²⁴Limbah te kare kambing te inyambalih awi kare imam, tuntang dahae inusoh hong mesbeh kilau parapah ampun dosa akan hapus rayat. Taloh te ilalus ewen awi raja jari marentah mangat ilalus parapah je ingehu tuntang parapah ampun dosa akan hapus rayat Israel.

²⁵Tumon kare atoh je inenga TUHAN akan Dawid mahalau Nabi Gad, je bagawi akan raja tuntang mahalau Nabi Natan, raja mandak oloh Lewi intu Human TUHAN akan mampahiau kacapi tuntang gambus,

²⁶kilau je ihapan Dawid. Kea kare imam iandake intu hete dengan tarompete.

²⁷Hiskia manenga tanda uka upacara maluput parapah inampara. Pandehan parapah iluput, kare oloh nampara manyanyi tara akan TUHAN, tuntang kare tukang musik mampahiau tarompete hayak kare pakakas musik je beken.

²⁸Raja Hiskia tuntang uras oloh je aton intu hete sontop manyembah TUHAN tuntang pandehan te oloh manyanyi tuntang mampahiau kare pakakas musik sampai uras parapah te lepah bakehu.

³⁰Raja tuntang kare oloh bakas-bakas lewu manyoho kare oloh Lewi manyanyi akan TUHAN lagu tara je ingarang awi Dawid tuntang Nabi Asap. Uras oloh manyanyi dengan paham kahanjak sambil mandeko utut tuntang manyembah Hatalla.

³¹Limbah te Hiskia hamauh, “Awi keton toh jari ingabeken akan TUHAN, maka kilau parapah tarimakasih keton, keton musti mimbit parapah akan Human TUHAN.” Palus oloh je aton intu hete mimbit parapah te, tinai aton kea je dengan kahias atei mimbit kare meto akan iluput kilau parapah je ingehu.

³²Ewen mimbit 70 kongan sapi hatue, 100 kongan tabiri, tuntang 200 kongan anak tabiri hayak malupute akan parapah je ingehu akan TUHAN.

³³Ewen kea mimbit 600 kongan sapi hatue tuntang 3.000 kongan tabiri akan iluput tuntang kinan haya-hayak awi uras kare oloh je aton dumah.

³⁴Kare imam je mamparasih arep lalau isut bitie akan mangupak uras meto te. Awi te ewen indohop awi kare oloh Lewi awi kare oloh Lewi labih baketep dengan atoran karasih. Ewen tetep mandohop sampai sukup karee imam je jari mamparasih arepe.

³⁵Beken bara parapah je ingehu, kare imam kea maluput enyak bara parapah tarimakasih je kinan awi rayat. Ewen kea maluput anggor je inusoh hayak parapah je ingehu te. Tumon te sombayang intu Human TUHAN ilalus tinai.

³⁶Maka Raja Hiskia tuntang rayat ayue paham sanang ateie, awi hong katika je dia tahi salenga Hatalla jari mandohop ewen malalus taloh handiai te.