Read Ngaju 2 KRONIKA 3 Bible Online

2 KRONIKA 3 - Ngaju bible

2 KRONIKA 3

¹ Raja Dawid manukas je Human TUHAN musti imangun intu Yerusalem intu Bukit Moria hong eka mihik gandom ayun Arauna oloh Yebusi. Pangun Human TUHAN te inampara awi Raja Salomo

²hong bulan kadue nyelo kaepat metoh ie marentah.

³Kapanjang huma te 27 meter tuntang kabukae 9 meter.

⁴Kapanjang kamar hila baun sama dengan kabuka huma te, iete 9 meter. Kagantonge 54 meter. Hila huang huma te ingalukop hapan amas tulen.

⁵Kamar je mambatang mahapan kayu alau je pangkahalape tuntang ingalukop hapan amas batue. Hong kalukop je bara amas te aton ukiran gambar batang korma tuntang gambar rantai.

⁶Raja mambungas huma te hapan batu permata je bahala-halap dengan amas je impadumahe bara lewu Parwaim.

⁷Ie mahapan amas te kea akan mangalukop dinding Human TUHAN te, kare jihie, kare balok, kare lambang bauntonggange tuntang kare bauntonggange. Kare dindinge iukir dengan gambar kerub.[1]

⁸ Kamar huang je inggare Kamar Ije Barasih Haliai, kapanjange 9 meter, tuntang kabukae 9 meter, sama dengan kabuka Human TUHAN te. Due puluh ton amas ihapan akan mangalukop dinding Kamar Ije Barasih Haliai te,

⁹tuntang 570 gram amas hapa manampa paku. Dinding kare karong tingkat hunjun kea ingalukop hapan amas.

¹⁰ Raja kea manyoho kare panggawi te manampa due hampatong kerub bara logam. Kare hampatong te ingalukop hapan amas tuntang impendeng habambai intu Kamar Ije Barasih Haliai manaharep bauntonggang. Genep kerub te aton due palapase, tuntang genep palapas kapanjange uras 2,2 meter. Kare palapas te hambirang sampai ampie lawin palapas je ije hatigong intu bentok karong dengan lawin palapas je ije tinai, tuntang lawin palapas je beken sampai dinding intu sambil gantau. Jadi, kare palapas te hambirang 9 meter kapanjange iete tumon kabuka kamar te.

¹⁴ Akan Kamar Ije Barasih Haliai inampa kea dinding helat bara benang lena tuntang benang beken je biru, ungu tuntang bahandang. Dinding helat te imbungas mahapan kare gambar kerub.

¹⁵Raja manampa due jihi, je kapanjange uras 15,5 meter, palus mandake hila baun Human TUHAN. Genep jihi te aton takolok jihi kamboe 2,2 meter.

¹⁶Hila tapakan hunjun kare jihi te imbungas dengan hiasan bara tambaga kilau jawet rantai dengan 100 bua delima.

¹⁷Kare jihi te impendeng intu balikat sambil tuntang gantau bauntonggang tame Human TUHAN; je intu hila salatan inggare Yakhin,[2] tuntang je intu hila utara inggare Boas. [3]