Read Ngaju 2 KRONIKA 30 Bible Online

2 KRONIKA 30 - Ngaju bible

2 KRONIKA 30

¹ Pesta Paska hindai olih ilalus rayat hong katikae, hong bulan ije, awi kare imam je jari mamparasih arep lalau isut bitie tuntang hindai are oloh je hapumpong intu Yerusalem. Awi te Raja Hiskia tuntang kare pagawaie hayak oloh Yerusalem pakat akan mahaga Paska te hong bulan due. Ewen uras sanang dengan rencana te. Palus raja mangirim surat akan kakare oloh hong hapus Israel tuntang Yuda. Tinai kea akan oloh Epraim tuntang Manase. Hapus bangsa Israel bara tanah suku Dan intu hila utara sampai akan Berseba intu salatan, irawei akan Human TUHAN hong Yerusalem uka mahaga Paska tuntang mahormat TUHAN, Hatallan Israel kilau je inukas hong kare atoran Moses. Hindai puji Paska ihaga tumon te.

⁶Hapan parentah raja tuntang kare pagawaie, kare sarohan ingirim akan hapus Yuda tuntang Israel uka mimbit kare surat te je auhe kalutoh. “Rayat Israel! Keton jari luput bara kuasan oloh Asur. Toh keleh keton haluli manempo TUHAN, Hatalla je inyembah awi Abraham, Isaak tuntang Yakob, mangat ie haluli mandohop keton.

⁷Ela kilau tato hiang keton tuntang kilau kare oloh Israel beken je dia baketep dengan TUHAN, Hatallan ewen. Keton jari mite kabuat kilen ampin kapahame ie mahukum ewen.

⁸Ela badungil kilau ewen, tapi keleh tumon auh TUHAN. Keleh dumah akan Yerusalem akan Human TUHAN je jari tantai ingabeken awi TUHAN, Hatallan keton Akae kabuat palus katatahie. Keleh sombayang Akae mangat terai kasangit Aie dengan keton.

⁹Amon keton haluli manempo TUHAN, maka kare oloh je mimbit tondah paharim kilau tawanan kareh masi tuntang manyoho ewen haluli. TUHAN, Hatallan keton te Hatalla je bahalap tuntang pamasi; Ie kareh manarima keton amon keton haluli Dengae.”

¹⁰Katika kare sarohan te haguet bara lewu ije akan lewu je beken intu tanah suku Epraim tuntang Manase sampai akan utara tikas tanah suku Sebulon, ewen inatawe tuntang inawah.

¹¹Tapi aton kea kare oloh bara suku Aser, Manase tuntang Sebulon je maku dumah akan Yerusalem.

¹²Intu Yuda kea Hatalla bagawi tuntang mampahinje atei rayat uka toto-toto manumon kahandak Hatalla dengan manumon parentah raja tuntang kare pagawaie.

¹³Hong bulan kadue are bara rayat hapumpong intu Yerusalem uka mahaga Andau Hai Rote Je Dia Iragi.

¹⁴Kare mesbeh hong Yerusalem je ihapan akan maluput parapah tuntang mamapui garo akan kare hampatong urase induan tuntang inganan akan Janah Kidron.

¹⁵Hong tanggal 14 bulan te ewen manyambalih kare tabiri akan indu parapah Paska. Kare imam tuntang oloh Lewi je magon papa toto paham mahamen. Ewen mamparasih arep sampai tau maluput parapah intu Human TUHAN.

¹⁶Genep bitin ewen mendeng intu Human TUHAN manumon atoran je aton intu buku kare atoran Moses. Daha bara kare parapah te inyarah awi oloh Lewi akan kare imam, palus ewen manusohe intu mesbeh.

¹⁷Are bara marak oloh je aton intu hete hindai mamparasih arepe. Jadi ewen dia tau manyambalih tabiri akan parapah Paska. Awi te maka oloh Lewi ih je malalus taloh te akan ewen tuntang malupute akan TUHAN.

¹⁸Beken bara te bara marak oloh Epraim, Manase, Isaskhar, tuntang Sebulon, are oloh je dumah dengan dia labih helo mamparasih arepe. Jadi, ewen mahaga Paska te dengan dia manumon atorae. Awi te Raja Hiskia balakudoa akan ewen, koae,

¹⁹“TUHAN, Hatalla je indu taran tato hiang ikei, keleh bara kahalap ateim Ikau mampun kare ewen je metoh sombayang hapan salepah atei, aloh ewen hindai marasih arepe.”

²⁰TUHAN mahining lakudoan Hiskia. Ie mampun kare oloh te, tuntang dia mahukum ewen.

²¹Uju andau katahie, dengan paham kahanjak atei kare oloh je hapumpong intu Yerusalem mahaga pesta Rote Dia Iragi. Genep andau kare oloh Lewi tuntang kare imam manara TUHAN toto-toto.

²²Kare oloh Lewi te paham pintar malalus sombayang akan TUHAN, sampai Hiskia manara ewen. Limbah 7 andau katahie ewen mangkeme komangat panginan bara pesta te hayak maluput parapah akan manyewut tarimakasih akan TUHAN, Hatallan tato hiang ewen,

²³ewen uras manukas uka malalus pesta te 7 andau tinai. Palus ewen mahagae tinai dengan kahanjak.

²⁴Raja Hiskia manyumbang 1.000 kongan sapi hatue tuntang 7.000 kongan tabiri. Kare pagawai Hiskia manenga 1.000 kongan sapi hatue tuntang 10.000 kongan tabiri. Uras meto te inenga akan rayat uka inyambalih tuntang kinan. Are toto imam marasih arep.

²⁵Rayat Yuda, kare imam, kare oloh Lewi, tuntang kare oloh je dumah bara utara hayak kare oloh bangsa beken je manetep hong Israel tuntang Yuda, urase mangkeme sanang.

²⁶Lewu Yerusalem rami toto awi bara Salomo anak Dawid, hindai puji manjadi taloh je kilau te.

²⁷Kare imam tuntang oloh Lewi balaku berkat bara TUHAN akan rayat, tuntang bara eka Aie melai hong sorga Hatalla mahining lakudoan ewen hayak manarima palakun ewen.