Read Ngaju 2 KRONIKA 31 Bible Online

2 KRONIKA 31 - Ngaju bible

2 KRONIKA 31

¹Limbah pesta lepah, hapus rayat haguet akan genep lewu intu Yuda palus mampahancor kare turus batu ain dewa, mampalongkang kare hampatong je impendeng akan Dewi Asera, tuntang manganan kare mesbeh tuntang kare eka manyembah hampatong. Ewen mawie kalote kea hong kare eka beken intu Yuda, hayak intu tanah Benyamin, Epraim tuntang Manase. Limbah te ewen uras buli akan eka ewen mije-mije.

²Raja Hiskia manukas haluli kare kalompok imam tuntang oloh Lewi manumon ampin bagin gawin ewen. Kare gawi te ie toh: maluput parapah je ingehu tuntang parapah hapa badamai, malalus gawin sombayang hong Human TUHAN, tuntang manara hayak manyewut tarimakasih akan TUHAN intu kare eka hong Human TUHAN.

³ Bara meto ayue kabuat raja manenga kare meto je perlu akan parapah je ingehu genep hanjewu tuntang genep halemei, tuntang akan parapah je iluput hong andau Sabat, hong pesta Bulan Taheta, tuntang hong kare pesta beken kilau je inukas hong kare parentah hukum TUHAN.

⁴ Beken bara te raja manyoho oloh Yerusalem mimbit parapah je inukas akan kare imam tuntang oloh Lewi, mangat ewen tau mambulat hapus tirok ewen akan maharago kare gawi intu Human TUHAN tumon je aton intu kare parentah hukum TUHAN.

⁵Limbah parentah te insanan, oloh Israel mimbit akan Human TUHAN kare panenga bara[12] kare hasil gawin ewen je solake, iete tepong gandom, anggor, undus saitun, mado tuntang hasil petak je beken. Ewen kea mimbit sapersapuluh bara[13] kare taloh je ayun ewen.

⁶Uras oloh je melai intu kare lewun oloh Yuda mimbit sapersapuluh bara kare sapi tuntang tabirin ewen, tuntang kea are bara panenga je beken, palus maluput urase te indu parapah akan TUHAN, Hatallan ewen.

⁷Kare panenga te nampara dumah-dumaha intu bulan telo, tuntang raju-rajur dumah sampai bulan uju.

⁸Mite sumbangan je are te, Raja Hiskia tuntang kare pagawaie manara TUHAN, tuntang manara rayat Israel, ungkup Ayue.

⁹Metoh raja hakotak dengan kare imam tuntang oloh Lewi tahiu kare sumbangan te,

¹⁰Imam Hai Asarya turonan Sadok hamauh, “Bara katika rayat magah kare parapah ewen akan Human TUHAN, ikei dia tapas panginan, tapi labih haream, sampai magon are persediaan panginan ikei. Urase te inarima ikei awi TUHAN mamberkat ungkup Ayue.”

¹¹Hapan parentah kare raja ewen manatap kare gudang tokep Human TUHAN,

¹²palus mingkes uras kare panenga tuntang persapuluh te. Ije biti oloh Lewi arae Konanya, inenga gawi tantai manantuani kare sumbangan te indohop awi andie je bagare Simei.

¹³Penda ewen aton 10 biti oloh Lewi je inenga gawi, iete: Yehiel, Asarya, Nahat, Asael, Yerimot, Yosabat, Eliel, Yismakhya, Mahat tuntang Benaya. Uras taloh handiai te inukas awi Raja Hiskia tuntang Imam Hai Asarya.

¹⁴Kore anak Yimna ije biti oloh Lewi je jadi kapalan oloh jaga intu Lawang Timor hong Human TUHAN, inenga kapercaya uka manarima kare sumbangan je inenga akan TUHAN palus mambagi-bagie.

¹⁵Intu lewu beken eka melai kare imam, Kore indohop awi kare oloh Lewi beken, iete: Eden, Minyamin, Yesua, Semaya, Amarya tuntang Sekhanya. Kare panginan te imbagi samarata intu marak sama suku Lewi aloh je bakas atawa je tabela manumon gawin ewen.

¹⁶Uras oloh hatue je umure telo puluh[14] nyelo kahunjun, je mandino gilir gawi genep andau intu Human TUHAN, inenga kea bagie akan genep bitie manumon gawie tuntang manumon kalompoke.

¹⁷Kare imam indaptar manumon jalahae, tuntang oloh Lewi je umure 20 nyelo kahunjun indaptar manumon gawie tuntang kalompoke.

¹⁸Ewen urase indaptar hayak dengan anak sawae, tuntang kare oloh beken je omba intu keluargae, awi ewen musti sadia genep katika akan malalus kare gawin ewen je tantai akan TUHAN.

¹⁹Intu marak kare imam je melai hong kare lewu je inukas akan turonan Aron, atawa intu kare janah tokep kare lewu te, inunjok kare oloh je bagawi akan mambagi kare panginan akan uras oloh hatue hong keluarga imam, tuntang akan genep oloh je indaptar hong suku Lewi.

²⁰Intu hapus tanah Yuda, Raja Hiskia malalus kaadilan, bagawi bujur, tuntang manyanang atei TUHAN, Hatallae.

²¹Ie mimbit hasil bara gawie, awi uras je iawie akan Human TUHAN atawa akan manumon kare parentah TUHAN, ilalus dengan salepah atei awi sintae dengan TUHAN, Hatallae.