Read Ngaju 2 KRONIKA 33 Bible Online

2 KRONIKA 33 - Ngaju bible

2 KRONIKA 33

¹Manase te 12 nyelo umure metoh ie jadi raja Yuda tuntang ie marentah intu Yerusalem 55 nyelo katahie.

² Ie badosa dengan TUHAN awi omba hadat papa kare bangsa je iharak TUHAN bara Kanaan metoh Israel tame lewu te.

³Kare eka manyembah hampatong je jari inganan Hiskia bapae, imangue haluli. Ie mamangun kare mesbeh eka sombayang akan Baal, tuntang ie manampa kare hampatong Dewi Asera hayak manyembah kare bintang.

⁴ TUHAN jari hamauh, sampai katatahie Yerusalem eka akan sombayng Akae. Tapi intu hete, intu Human TUHAN te, Manase jari mampendeng kare mesbeh akan kare dewa.

⁵Intu due parantaran Human TUHAN te ie mampendeng kare mesbeh akan manyembah kare bintang.

⁶Kare anake iluput kilau parapah je ingehu intu Janah Hinom. Ie kea malalus kare gawin tabit, mahapan tujum, karohei, tuntang balaku tanda bara kare roh. Ie paham badosa taharep TUHAN sampai mampalembut kasangit TUHAN.

⁷ Hampatong dewa iingkese intu huang Human TUHAN, je tahiu eka te Hatalla jari hamauh dengan Dawid tuntang Salomo anake, “Humang-Ku intu Yerusalem toh, je jari iintih awi-Ku bara marak due walas tanah suku Israel, jete eka je inukas-Ku akan eka sombayang akang-Ku palus katatahie.

⁸Amon ungkup Israel manumon uras parentah-Ku tuntang manumon kare atoran je inenga Moses rewar-Ku akan ewen, maka Aku dia manalua ewen iharak bara lewu je jari inenga-Ku akan tato hiang ewen.”

⁹Manase mawi sabab rayat Yuda malalus kare dosa je labih papa bara dosa je ilalus awi kare bangsa je iharak TUHAN bara Kanaan metoh ungkup TUHAN tame lewu te.

¹⁰TUHAN maningak Manase tuntang rayate, tapi ewen dia maku manumoe.

¹¹Awi te TUHAN mampadumah kare pangkalima tantara Asur manyarang Yuda. Manase inyingkap dengan kawit, palus imasong tuntang iimbit akan Babel.

¹²Hong kapehe te ie mamparandah arepe taharep TUHAN Hatallae, tuntang balakudoa balaku pandohop Ayue.

¹³Hatalla manarima lakudoan Manase tuntang maliae akan Yerusalem uka marentah tinai. Awi kajadian te Manase percaya toto je TUHAN te Hatalla.

¹⁴Limbah te Manase mampagantong dinding je hila luar intu hila timor Lewun Dawid. Ie nampara hong ije eka intu janah tokep tahasak Gihon palus akan utara sampai akan Lawang Lauk tuntang eka hila hete inyewute Opel. Intu gagenep lewu hakota hong Yuda, ie mandak ije biti pangkalima.

¹⁵Ie manganan kare hampatong dewa bangsa beken tuntang kare hampatong beken je ingkese intu Human TUHAN. Ie mangarak kare mesbeh hampatong je aton intu bukit Human TUHAN, tuntang intu kare eka beken hong Yerusalem. Taloh te uras iimbit awie akan luar lewu palus inganan.

¹⁶Limbah te ie mangambuah mesbeh eka sombayang akan TUHAN, palus maluput intu hete parapah hapa badamai tuntang parapah tarimakasih. Uras oloh Yuda inyohoee sombayang intu TUHAN, Hatallan Israel.

¹⁷Rayat magon maluput parapah intu kare eka manyembah je beken, tapi parapah te akan TUHAN.

¹⁸Sarita beken tahiu Manase tuntang tahiu lakudoa akan Hatalla, hayak kare peteh Hatalla akae awi kare nabi hapan aran TUHAN, Hatallan Israel, uras jari incatet intu huang buku Sejarah Kare Raja Israel.

¹⁹Intu buku Sejarah kare nabi, jari incatet lakudoan Manase tuntang panombah Hatalla akan lakudoa te, tuntang sarita tahiu kare dosae sahelo bara ie hobah, kare eka manyembah hampatong tuntang kare hampatong Dewi Asera je inampae, tuntang kare hampatong je inyembahe.

²⁰Manase matei tuntang ingubur intu hete. Amon anake jadi raja mangganti ie.

²¹Amon umure 22 nyelo metoh ie jadi raja Yuda, tuntang ie marentah intu Yerusalem 2 nyelo katahie.

²²Kilau bapae ie kea badosa taharep TUHAN. Ie manyembah kare hampatong dewa je inyembah bapae tuntang maluput parapah akan kare dewa te.

²³Tapi dia kilau bapae, Amon dia mamparandah arepe tuntang dia haluli omba TUHAN; ie labih badosa haream bara bapae.

²⁴Kare pagawai Raja Amon pakat malawan ie tuntang mampatei ie intu istana.

²⁵Tapi rayat Yuda mampatei kare oloh je mampatei Raja Amon te, palus mangkat Yosia anake jadi raja.