Read Ngaju 2 KRONIKA 34 Bible Online

2 KRONIKA 34 - Ngaju bible

2 KRONIKA 34

¹ Yosia umure 8 nyelo metoh ie jadi raja Yuda, tuntang ie marentah intu Yerusalem 31 nyelo katahie.

²Ie mawi taloh je manyanang atei TUHAN. Ie manyonto ampin gawin Raja Dawid tatoe, tuntang manumon hapus parentah TUHAN.

³Limbah 8 nyelo jadi raja, hong umur je magon paham tabela, Yosia nampara sombayang intu Hatalla je inyembah awi Raja Dawid tato hiange. Epat nyelo limbah te ie nampara mangarak kare eka manyembah hampatong, kare hamapatong Dewi Asera tuntang kare hampatong je beken.

⁴ Kare hampatong tuntang kare pantar batu te imparamok awi kare oloh ayun Yosia, palus kawoe inawor ewen akan hunjun kubur kare oloh je maluput parapah akan kare hampatong te. Kare mesbeh Baal tuntang kare mesbeh garo je aton intu hete inderep ewen.

⁵ Limbah te Yosia mamapui intu hunjun mesbeh te tulang kare imam je maharago kare hampatong dewa te. Tumon te ie mawi Yuda tuntang Yerusalem patut tau sombayang tinai intu TUHAN.

⁶Taloh je sama kilau te iawie kea hong kare lewu tuntang hong kare daerah je jari hancor hong tanah Epraim, Manase, tuntang Simeon sampai akan Naptali intu hila utara.

⁷Kare mesbeh tuntang kare hampatong Asera intu hapus karajaan hila utara inderep awi Yosia, palus kare hampatonge tuntang uras mesbeh garo impahancore. Limbah te Yosia buli akan Yerusalem.

⁸Hong nyelo kahanyawalas Yosia marentah, limbah ie mamparasih Human TUHAN tuntang hapus lewu bara gawi menyembah hampatong dewa, ie mangirim telo biti oloh uka mangambuah Human TUHAN Hatalla. Telo biti oloh te iete Sapan anak Asalya, Maaseya gubernur Yerusalem, tuntang Yoah anak Yoahas, ije biti pagawai je gantong pangkate.

⁹Kare oloh Lewi je manjaga bauntonggang Human TUHAN, manyarah akan Imam Hai Hilkia kare duit je ingumpul ewen. Duit te bara oloh Epraim tuntang Manase, tuntang bara rayat je beken intu Karajaan Utara, hayak bara rayat Yuda, Benyamin tuntang Yerusalem.

¹⁰Limbah te duit te inyarah awi Imam Hai Hilkia akan telo biti oloh je inyarah gawi uka manantuani gawi mangambuah Human TUHAN te. Limbah te ewen manenga duit te

¹¹akan kare tukang kayu tuntang tukang je beken uka mamili batu tuntang kayu akan mangambuah kare Human TUHAN je jari inalua rusak awi kare raja Yuda.

¹²Kare oloh je mangambuahe te toto-toto bujur. Ewen ingapala awi 4 biti oloh Lewi: Yahat tuntang Obaja bara jalahan Merari, hayak Sakaria tuntang Mesulam bara jalahan Kehat. Kare oloh Lewi je uras apik mampahiau pakakas musik,

¹³inenga gawi uka manantuani ampin gawi munda kare ramo, mangapala kare oloh je bagawi hong kare macam gawi, maurus kare gawin administrasi tuntang manjaga bauntonggang.

¹⁴Metoh duit sumbangan te impalua bara ekae iingkes, Hilkia sondau buku Parentah TUHAN, iete kare parentah je inenga Hatalla akan Moses.

¹⁵Hilkia hamauh dengan Sapan, “Aku sondau buku Parentah TUHAN intu Human TUHAN,” palus ie manenga buku te akan Sapan.

¹⁶Sapan manarima buku te palus haguet manalih raja tuntang hamauh, “Uras je jari irentah Tuan Raja jari ilalus ikei.

¹⁷Ikei jari manduan duit je jari ingkes intu Human TUHAN, tuntang manyarah akan kare oloh je bagawi tuntang akan kare ewen je inenga gawi tantai manantuani gawi te.”

¹⁸Limbah te ie mandahang, “Hilkia manenga buku toh akangku.” Palus Sapan mambasa buku te akan raja.

¹⁹Mahining auh buku te raja marabit pakayae awi kapehe atei.

²⁰Palus raja menenga parentah toh akan Hilkia, Ahikam anak Sapan, Abdon[15] anak Mikha, Sapan sekretaris karajaan, tuntang Asaya ajudan raja.

²¹“Lius misek TUHAN akangku tuntang akan kare oloh je magon aton hong Israel tuntang Yuda tahiu taloh huang buku toh. TUHAN sangit dengan itah awi tato itah dia malalus kare parentah je tarasurat intu huange.”

²²Palus Hilkia, Ahikam, Abdon, Sapan tuntang Asaya haguet balaku tirok bara ije oloh bawi arae Hulda. Ie ije biti nabi je melai intu eka taheta hong Yerusalem. Banae arae Salum anak Tikwa, eson Harhas.[16] Ie tukang maharago pakaian sombayang intu Human TUHAN. Limbah Hulda mahining auh ewen,

²³ie manyoho ewen haluli manalih raja tuntang manyampai peteh toh, “TUHAN, Hatalla je inyembah awi oloh Israel hamauh,

²⁴‘Aku akan mahukum Yerusalem tuntang oloh hapus lewu te hapan kare sapa je inyurat hong buku te je imbasa akan raja.

²⁵Ewen jari malihi Aku tuntang maluput parapah akan kare hatalla beken. Uras taloh je iawi ewen mampalembut kasangit-Ku. Aku sangit dengan Yerusalem tuntang kasangit-Ku dia tau impatende.

²⁶Tapi tahiu Raja Yosia, jetoh peteh-Ku, TUHAN Hatallan Israel: Limbah ikau mahining taloh je inyurat hong buku te,

²⁷ikau manyasal tuntang mamparandah arepm intu taharep-Ku. Aku jari maancam akan mahukum Yerusalem tuntang kare oloh je melai hete, tapi katika ikau mahining tahiu ancamang-Ku te ikau manangis tuntang marabit pakaiam tanda pehe atei. Aku jari mahining lakudoam,

²⁸awi te hukum akan Yerusalem dia akan ilalus awi-Ku katahin ikau magon belom. Ikau kareh inyoho-Ku mahutus dengan kasanang.’ ” Palus kare sarohan te haluli talih raja tuntang manyampai peteh te.

²⁹Raja Yosia mantehau uras pamimpin oloh Yuda tuntang Yerusalem,

³⁰palus haguet dengan ewen akan Human TUHAN. Hayak ewen omba kea kare imam, oloh Lewi tuntang hapus rayat, aloh je belom susah atawa je tatau. Intu hila baun ewen, intu tokep jihi je tantai akan eka raja,[17] raja mendeng tuntang mambasa hapan hai auh uras taloh huang buku janji je jari inyondau hong Human TUHAN. Limbah te raja mawi janji dengan TUHAN akan manumon auh Ayue tuntang malalus dengan salepah atei tuntang salepah hambaruan uras parentah tuntang kare atoran Aie, hayak malalaus kare auh janjin TUHAN dengan ungkup Ayue je aton tarasurat huang buku te.

³²Uras oloh Benyamin tuntang uras oloh beken je aton intu Yerusalem inyohoe hajanji uka manumon auh janji te, iete janjin ewen dengan Hatallan tato hiang ewen.

³³Kare hampatong je injilek, je aton intu kare eka je aton huang tanah oloh Israel, urase impahancor awi Raja Yosia. Palus ie manyoho hapus rayate musti sombayang intu TUHAN, Hatallan tato hiang ewen. Maka katahin Yosia belom, rayat harajur baketep dengan TUHAN.