Read Ngaju 2 KRONIKA 35 Bible Online

2 KRONIKA 35 - Ngaju bible

2 KRONIKA 35

¹Limbah te Yosia mahaga Paska intu Yerusalem uka mahormat TUHAN. Tabiri akan pesta inyambalih intu tanggal 14 bulan ije.

²Yosia mambagi akan kare imam kare gawi je musti ilalus ewen intu Human TUHAN, tuntang ie balaku uka ewen malaluse dengan bahalap.

³Kare oloh Lewi je jari imisah tantai akan TUHAN, tuntang jadi kare gurun oloh Israel, mandino parentah bara Yosia, “Ina Patin Janjin TUHAN je barasih te intu Human TUHAN je impendeng awi Raja Salomo anak Dawid, dia usah keton minda-mindahe tinai. Keleh manempo TUHAN, Hatallan keton tuntang bangsa Israel ungkup Ayue.

⁴ Batatap intu Human TUHAN manumon kare kalompok ain keton, manumon kare bagin gawi je jari inatap akan keton awi raja Dawid tuntang Raja Salomo anake.

⁵Keleh mator kare kalompok keton te sampai harajur aton bara keton je tau mandohop genep kalompok oloh Israel intu Human TUHAN.

⁶Keton musti manyambalih tabiri akan pesta Paska. Awi te keleh manyadia arep keton uka patut manyembah TUHAN, tuntang keleh manyadia kare parapah je iluput akan TUHAN, uka kare oloh Israel je beken tau malalus taloh je irentah awi TUHAN mahalau Moses.”

⁷Mangat oloh je dumah intu pesta te tau maluput parapah Paska, Raja Yosia manenga bara meto ayue kabuat 30.000 kongan tabiri, anak tabiri tuntang kambing tabela, hayak 3.000 kongan sapi hatue.

⁸Pegawai Yosia manenga sumbangan akan kare imam, tuntang oloh Lewi bara hapus rayat. Kare pagawai je inyarah kapercaya maharago Human TUHAN, iete Imam Hai Hilkia, tuntang Sakharia, hayak Yehiel, katateloe te manenga akan kare imam 2.600 kongan anak tabiri tuntang kambing tabela tuntang 300 kongan sapi hatue akan parapah hong pesta te.

⁹Kare pamimpin oloh Lewi iete: Konanya, Semaya, tuntang Nataneel paharie, Hasabya, Yeiel, tuntang Yosabad, manenga akan oloh Lewi 5.000 kongan anak tabiri tuntang kambing tabela hayak 500 kongan sapi hatue akan parapah hong pesta te.

¹⁰Limbah taloh handiai te uras inyadia akan pesta Paska, maka kare imam tuntang kare regu oloh Lewi manalih eka ayu-ayue kilau je irentah awi raja.

¹¹Palus ewen manyambalih meto akan pesta Paska, oloh Lewi mangupake, tuntang kare imam mambirik dahan meto te akan hunjun mesbeh.

¹²Genep kalompok keluarga je aton intu hete mandino ije kongan bara meto je akan iluput kilau parapah je ingehu. Tumon te ewen tau maluput parapah manumon atoran je aton hong buku Atoran Moses.

¹³ Palus oloh Lewi manyehei parapah Paska te intu hunjun apui, tumon atoran, tuntang maluntoh kare parapah beken intu huang ketel, kenceng tuntang rinjing, limbah te isie jele-jeleng imbagi akan oloh are.

¹⁴Limbah te harue kare oloh Lewi manyadia akan bagin ewen kabuat tuntang akan kare imam turonan Aron. Sabab, sampai hamalem kare imam te bagawi harajur maluput kare meto kilau parapah je ingehu, tuntang mamapui kare enyak parapah te.

¹⁵ Kare tukang musik bara jalahan Asap hong suku Lewi aton intu eka gawi je jari inukas awi Raja Dawid akan ewen. Jetoh kare aran ewen te: Asap, Heman, tuntang Yedutun, ije biti nabi je bagawi akan raja. Kare oloh je manjaga kare lawang dia usah malihi ekae jaga, awi ewen tau mahaga Paska intu ekae bagawi awi pandohop kare oloh Lewi je beken.

¹⁶Hong andau te ewen malalus kare taloh handiai je irentah Raja Yosia akan pesta Paska, tatame kea kare parapah hong mesbeh.

¹⁷ Uju andau katahie hapus rayat Israel aton intu hete mahaga Paska tuntang Pesta Rote Je Dia Iragi.

¹⁸Paska je kilau te dia puji ihaga tinai bara wayah Nabi Samuel. Jaton ije bara kare raja je helo bara te puji mahaga Paska kilau je ihaga

¹⁹hong nyelo kahanyawalas metoh raja Yosia marentah, je ilalus awi raja kabuat impahayak awi kare imam, oloh Lewi, oloh Yuda tuntang oloh Isreal hayak sahapus oloh je melai Yerusalem.

²⁰Limbah Raja Yosia jari malalus kare taloh handiai te akan Human TUHAN; Neko raja Misir mamimpin pasukan parange mangat parang intu Karkemis tokep Sungei Euprat. Yosia handak toto mambalang kahandake,

²¹tapi Neko mangirim barita toh akan Yosia, “Parang toh dia buah ikau, raja Yuda! Aku dumah dia handak malawan ikau, tapi akan malawan kare musohku, tuntang Hatalla manyoho aku malaluse bajeleng. Hatalla aton intu hila aku, awi te ela mangahana Ie, kareh ikau impahancor Awie.”

²²Tapi Yosia jua-juan handak malawan, tuntang dia maku manumon taloh je insanan Hatalla mahalau Raja Neko. Yosia mangganti pakaiae palus tame omba parang intu petak janah Megido.

²³Hong parang te Raja Yosia buah panah. Palus ie marentah kare reware uka mimbit ie balua bara eka parang te awi ie bahimang paham.

²⁴Ewen mindah ie bara karetae akan kareta beken je aton intu hete, limbah te mimbite akan Yerusalem. Intu hete ie mahutus tuntang ingubur intu kubur kare raja. Hapus rayat Yuda tuntang Yerusalem manatum tagal pampateie.

²⁵Nabi Yeremia mangarang ije nyanyi tatum akan raja Yosia sampai toh nyanyi te ihapan intu Israel awi kare tukang nyanyi, aloh hatue atawa bawi hong tatum pampingat akan Yosia. Nyanyi te jari inamean akan kumpulan nyanyi tatum.

²⁶Sarita beken tahiu Yosia, tahiu sintae dengan TUHAN, tuntang kaketepe dengan kare parentah TUHAN,

²⁷pandak auh, tahiu saritan pambelome bara tamparae sampai kahapuse, jari incatet huang buku Sejarah Kare Raja Israel tuntang Yuda.