Read Ngaju 2 KRONIKA 36 Bible Online

2 KRONIKA 36 - Ngaju bible

2 KRONIKA 36

¹Rayat Yuda mintih tuntang mangkat Yoahas jadi raja intu Yerusalem mangganti Yosia, bapae.

²Yoahas umure 23 nyelo metoh ie jadi raja Yuda, tuntang marentah intu Yerusalem 3 bulan katahie.

³ Neko raja Misir manawan tuntang mimbit Yoahas akan Misir, palus ie manyoho Yuda mambayar panenga 3.400 kilogram perak tuntang 34 kilogram amas. Limbah te ie mangkat Elyakim paharin Yoahas jadi raja tuntang mobah aran Elyakim jadi Yoyakim. Limbah te Yoahas iimbite akan Misir.

⁵ Yoyakim umure 25 nyelo metoh ie jadi raja Yuda, tuntang ie marentah intu Yerusalem 11 nyelo katahie. Ie badosa taharep TUHAN, Hatallae.

⁶ Metoh Nebukadnesar raja Babel marabut Yuda, ie manyingkap Yoyakim tuntang mimbite hapasung akan Babel.

⁷Belahe kare ramo barega intu Human TUHAN iimbit awi Nebukadnesar tuntang ingkese huang istanae intu Babel.

⁸Sarita beken tahiu Yoyakim, tatame kea kare kakarase tuntang kare kapapae, jari incatet hong buku Sejarah Kare Raja Israel tuntang Yuda. Yoyakhin anake jadi raja mangganti ie.

⁹Yoyakhin umure 8 nyelo metoh ie jadi raja Yuda, tuntang ie marentah intu Yerusalem 3 bulan 10 andau katahie. Ie kea badosa dengan TUHAN.

¹⁰ Hong kahapus nyelo, Raja Nebukadnesar mimbit Yoyakhin akan Babel kilau tawanan, tuntang kare ramo barega intu Human TUHAN imbite kea. Limbah te Nebukadnesar mangkat Sedekia, mama[18] Yoyakhin, jadi raja akan Yuda tuntang Yerusalem.

¹¹ Sedekia umure 21 nyelo metoh ie jadi raja Yuda. Ie marentah intu Yerusalem 11 nyelo katahie.

¹²Ie kea badosa taharep TUHAN, Hatallae. Ie dia maku mamparandah arep tuntang dia manumon auh Nabi Yeremia je manyampai peteh bara TUHAN akae.

¹³ Raja Nebukadnesar jari mamaksa Sedekia uka sumpah hapan aran Hatalla je ie kareh baketep dengan Nebukadnesar. Tapi limbah te Sedekia malapas arepe balalu malawan Nebukadnesar. Sedekia badungil dengan TUHAN, Hatallan Israel. Ie dia maku malihi kare dosa tuntang dia maku haluli manalih TUHAN.

¹⁴Beken bara te, Human TUHAN je jari ingabeken TUHAN Akae kabuat, irampas awi kare pamimpin Yuda, kare imam tuntang rayat, awi ewen omba manyembah hampatong tuntang manumon cara belom je badosa bara kare bangsa je hakaliling ewen.

¹⁵TUHAN Hatallan tato hiang ewen, jari lula-luli mangirim kare sarohae akan mampingat ungkup Ayue, awi Ie sayang dengan ewen tuntang dengan human Ayue.

¹⁶Tapi ewen hababaka kare sarohan Hatalla te, tuntang manatawe kare nabi Ayue hayak dia paduli kare auh Aie. Kajariae TUHAN paham sangit dengan ewen sampai jaton tinai hila akan ewen uka luput bara hukuman Aie.

¹⁷ TUHAN manggerek atei raja Babel uka manyarang ewen. Raja te mampatei oloh Yuda je tabela-bela, tamput kea ewen je aton intu Human TUHAN. Ie dia masi eweh bewei, bakas atawa tabela, hatue atawa bawi, haban atawa barigas. Ewen uras inyarah Hatalla akan raja Babel.

¹⁸Kare pakakas Human TUHAN, tuntang kare ramoe je barega, kalote kea kare ramon panatau raja tuntang kare pagawaie, uras irampas awi raja Babel te balalu imbit akan Babel.

¹⁹ Ie manderep dinding lewu Yerusalem, tuntang manusul lewu te, tamput kea Human TUHAN tuntang uras istana hayak dengan kare ramo barega je magon aton intu huang kare istana te.

²⁰Rayat je luput buah patei, imbite akan Babel. Intu hete ewen jadi jipen, tuntang turonae sampai intu wayah karajaan Persia marentah.

²¹ Tumon te jari manjadi taloh je insanan TUHAN mahalau Yeremia tahiu lewu te je kareh akan jadi petak gagas 70 nyelo katahie kilau gantin kare nyelon Sabat[19] je dia ihaga.

²²Hong nyelo je solake kahum Kores, raja Persia[20] marentah, TUHAN malalus taloh je insanae mahalau nabi Yeremia. TUHAN manggerek atei Kores uka mampalua ije parentah je imbasa hong hapus karajaan ayue. Auhe kalutoh:

²³ “Jetoh parentah Kores, raja Persia! TUHAN, Hatalla je kuasa intu sorga jari manjadian aku raja akan hapus kalunen, tuntang manyoho aku uka mawi huma Akae intu Yerusalem hong tanah Yuda. Jadi, keton uras je jadi ungkup Hatalla musti buli haluli akan hete! Keleh TUHAN, Hatallan keton mangalindong keton.”