Read Ngaju 2 KRONIKA 5 Bible Online

2 KRONIKA 5 - Ngaju bible

2 KRONIKA 5

¹ Limbah Raja Salomo mahapus gawi mamangun Human TUHAN te, ie mingkes intu huang kare gudang huma te uras perak, amas, tuntang kare ramo beken je jari inenga Dawid bapae akan TUHAN.

² Limbah te Raja Salomo manyoho uras pamimpin suku tuntang bangsa bara bangsa Israel hapumpong intu Yerusalem akan mindah Patin Janjin TUHAN bara Sion, Lewun Dawid akan Human TUHAN.

³Palus uras ewen dumah hong andau hai Tingkap Dawen.

⁴Limbah uras kare pamimpin te hapumpong, kare oloh Lewi meton Patin Janji te,

⁵tuntang mimbite akan Human TUHAN. Kemah TUHAN hayak uras pakakase iindah kea akan Human TUHAN awi kare imam tuntang oloh Lewi.

⁶Raja Salomo tuntang hapus rayat Israel hapumpong intu baun Patin Janji te, palus maluput akan TUHAN parapah tabiri tuntang sapi je dia taraise karee.

⁷Limbah te kare imam manamean Patin Janji te akan huang Human TUHAN tuntang mingkes jete intu penda hampatong kerub intu huang Kamar Ije Barasih Haliai.

⁸Palapas hampatong te hambirang matep pati te tuntang kare kayu pikule.

⁹Kayu pikule te panjang toto, sampai kare tapakae gitan bara baun Kamar Ije Barasih Haliai, tapi dia gitan bara luar. (Sampai andau toh kare kayu te magon intu hete).

¹⁰ Intu huang Patin Janji te jaton taloh en-en baya due kabintap batu. Kare batu te jari inamean akan hete awi Moses intu Bukit Sinai, metoh TUHAN mawi janji dengan bangsa Israel katika ewen hong jalanae bara Misir akan Lewu Kanaan.

¹¹ Uras imam je aton intu hete, bara kakare kalompok, jari manatap arep akan upacara te. Uras panyanyi tuntang tukang musik suku Lewi, iete Asap, Heman, Yedutun tuntang hapus oloh bara jalahan ewen, mahapan pakaian bara benang lena. Kare oloh Lewi te mendeng intu hila timor mesbeh hayak mimbing simbal tuntang kacapi. Hayak ewen aton 120 biti imam je mahimon tarompet. Nyanyin kare oloh je manyanyi hakarasok dengan musik tarompet simbal tuntang pakakas musik beken je mampahayake. Jetoh kare auh tara je inyanyi awi ewen akan TUHAN: “Tara akan TUHAN, awi Ie bahalap, sintan Aie sampai katatahie.” Metoh kare imam balua bara Human TUHAN te, salenga Huma te kontep awi kalawan panumah TUHAN, sampai ewen dia tau malalus upacara iete sombayang.