Read Ngaju 2 KRONIKA 6 Bible Online

2 KRONIKA 6 - Ngaju bible

2 KRONIKA 6

¹Raja Salomo balakudoa, “O TUHAN, ikau labih mangilak melai hong kakaput baunandau.

²Toh aku jari mamangun akam huma je bahalap toto, akan ekam melai katatahie.”

³Limbah balakudoa, raja mules manaharep akan hapus rayat je mendeng intu hete, palus ie balaku berkat Hatalla akan ewen.

⁴ Ie hamauh, “Bihin, TUHAN jari hajanji dengan bapaku kalotoh, ‘Bara aku mibit ungkup-Ku balua bara Misir sampai andau toh, intu lewun Israel toh jaton ije lewu je jari iintih-Ku akan eka mamangun huma akan eka sombayang akang-Ku, tuntang jaton oloh je intih-Ku akan mamimpin ungkup-Ku Israel. Tapi toh Aku mintih Yerusalem kilau eka sombayang akang-Ku. Tuntang, ikau Dawid, iintih-Ku akan marentah ungkup-Ku’. Tara akan TUHAN, Hatallan Israel je jari malalus janjin Aie te!”

⁷Limbah te Salomo hamauh, “Bapaku Dawid jari marencana uka mamangun huma eka sombayang akan TUHAN Hatallan Israel.

⁸Tapi TUHAN hamauh dengae, ‘Maksudm te bahalap.

⁹Tapi dia ikau, malengkan anakm je kareh mamangun humang-Ku te.’

¹⁰Toh TUHAN jari malalus janjin Aie. Aku kea jadi Raja Israel mangganti bapaku. Tuntang aku kea jari mamangun huma akan eka sombayang akan TUHAN, Hatallan Israel.

¹¹Intu huang Human TUHAN te jari inyadiaku eka akan Patin Janji te je basuang batun Janjin TUHAN dengan ungkup Israel.”

¹²Salomo jari manampa mimbar tambaga intu bentok parantaran Human TUHAN. Kapanjang tuntang kabuke 2,2 meter, kagantonge 1,3 meter. Intu taharep baun rayat je dumah, Salomo mandai mimbar te, tuntang mendeng manaharep mesbeh. Uras oloh tau mite ie. Limbah te ie mandeko utute, balalu manggatang kadadue lengee akan langit tuntang balakudoa,

¹⁴“TUHAN, Hatallan Israel! Intu langit atawa intu petak jaton je sama kilau Ikau! Akan malalus janjin Aim tuntang mamparahan sintan Aim akan ungkup Ayum je baketep tuntang manumon hapan salepah atei Dengam.

¹⁵Ikau jari malalus janjin Aim dengan bapaku Dawid. Taloh je injanji Awim te jari ilalus Awim andau toh.

¹⁶ Ikau kea jari hajanji dengan bapaku, amon turonae toto-toto manumon kare parentah Aim kilau ie, maka palus katatahie ije biti bara turonae kareh marentah kilau raja intu Israel. Toh, O TUHAN, Hatallan Israel, keleh malalus kea kakare taloh je jari injanji Awim dengan bapaku Dawid, rewar Ayum te.

¹⁸ Tapi, o Hatalla, en toto ikau pahias melai hong petak toh marak olon? Hapus langit kea tapas kalombahe Akam, mahi-mahi tinai huma sombayang je imanggungku toh!

¹⁹O TUHAN, Hatallangku, aku toh rewar Ayum! Tapi keleh mahining lakudoangku, tuntang keleh malalus palakungku.

²⁰ Keleh handau hamalem Ikau mangalindong huma toh je jari iintih Awim kilau eka sombayang Akam. Keleh bara eka Ayum melai hong sorga Ikau mahining tuntang mampun aku hayak ungkup Israel, ungkup Ayum te, amon ikei manaharep huma toh tuntang balakudoa intu Ikau.

²²Amon ije biti oloh indawa mawi kasalan dengan oloh beken tuntang imbit akan mesbeh Aim intu huang huma toh uka sumpah je ie dia sala,

²³o TUHAN, keleh Ikau mahininge bara sorga tuntang mamutus kare perkaran rewar Ayum toh. Keleh mahukum oloh je sala tuntang mambebas je dia sala.

²⁴Amon ungkup Ayum Israel impakalah awi kare musohe awi ewen badosa, palus manyasal tuntang mahormat Ikau tinai kilau TUHAN, limbah te dumah akan human Ayum toh hayak balakudoa balaku ampun Dengam,

²⁵keleh Ikau mahining bara sorga. Keleh Ikau mampun dosan ungkup Ayum toh, tuntang mimbit ewen haluli akan lewu je jari inenga Awim akan ewen tuntang akan tato hiang ewen.

²⁶Amon ungkup Ayum balakudoa intu Ikau tuntang Ikau mahukum ewen awi Ikau dia mampamohon ujan, palus ewen hobah bara dosan ewen tuntang mahormat Ikau kilau TUHAN, limbah te manaharep akan huma Ayum toh hayak balakudoa manalih Ikau,

²⁷o TUHAN hong sorga, hining ah auh ewen. Tuntang ampun dosan kare rewar Ayum ungkup Israel. Ajar ewen malalus taloh je bujur. Limbah te, o TUHAN, pamohon ujan akan lewun Aim toh, lewu je inenga Awim akan ungkup Ayum uka jadi ayue palus katatahie.

²⁸Amon lewu toh buah lau atawa calaka atawa kare taloh imbul irusak awi riwut balasut, hama atawa sangakalap, atawa amon ungkup Ayum inyarang musoh, atawa inyarang panyakit,

²⁹keleh Ikau mahining lakudoan ewen. Amon bara marak ungkup Ayum Israel aton je dengan kapehen atei balakudoa talih Ikau sambil mantajok lengee manintu Huma toh,

³⁰keleh Ikau intu eka Aim huang sorga mahining hayak mampun ewen. Baya Ikau bewei je kasene isin atei olon. Awi te lalus akan genep bitin oloh tumon kare gawie,

³¹uka ungkup Ayum mikeh tuntang harajur baketep Dengam katahin ewen melai intu tanah je inenga Awim akan tato hiang ikei.

³²Amon ije biti oloh bangsa beken intu tanah je kejau mahining tahiu kahain Aim tuntang kaabas Aim, tuntang je Ikau harajur tatap akan mandohop, palus ie dumah intu Human Ayum toh uka balakudoa manintu Ikau,

³³keleh bara eka Aim intu sorga Ikau mahining lakudoae tuntang malalus palakue. Tumon te hapus bangsa hong hapus kalunen kasene Ikau tuntang heret Dengam kilau ungkup Ayum Israel. Ewen kareh katawan huma je imangungku toh eka sombayang Akam.

³⁴Amon Ikau marentah ungkup Ayum uka haguet parang malawan musoh, palus hong kueh bewei ewen aton, ewen manaharep akan lewu paintih Ayum toh tuntang balakudoa manintu huma toh je jari imangungku Akam,

³⁵keleh hong sorga Ikau mahining lakudoan ewen toh, tuntang manenga kamanang akan ewen.

³⁶Amon ungkup Ayum balakudoa manintu Ikau — toto ije mahin jaton oloh je dia badosa — palus awi kalait Aim Ikau manalua ewen impakalah awi musoh tuntang iimbit kilau tawanan akan ije lewu je kejau atawa tokep,

³⁷keleh Ikau mahining lakudoan ewen. Amon intu lewu te ewen malihi kare dosan ewen, tuntang balakudoa manintu Ikau sambil mangaku je ewen jari badosa tuntang mawi kapapa, keleh mahining lakudoan ewen, o TUHAN.

³⁸Amon intu lewu te ewen dengan kahias tuntang toto-toto atei malihi kare dosan ewen, tuntang balakudoa manintu Ikau hayak manaharep akan tanah toh, je inenga Awim akan tato hiang ikei, manintu lewu paintih Ayum tuntang huma sombayang je jari imangungku Akam toh,

³⁹maka bara eka Aim hong sorga keleh Ikau mahining lakudoan ewen tuntang masi ewen. Ampun uras kare dosan ungkup Ayum.

⁴⁰Toh o Hatalla, nantuani ikei, hining lakudoan ikei je inyampai ikei hong eka toh.

⁴¹ Keleh harikas metoh toh, o TUHAN, Hatalla! Tuntang hayak Patin Janji je kilau patin kuasan Aim te keleh Ikau tame huma toh tuntang melai intu hetoh palus katatahie. Berkat uras gawin kare imam Ayum tuntang keleh hapus ungkup Ayum melai huang kasanang awi kahalap Aim dengan ewen.

⁴²TUHAN, Hatalla, ela manolak raja je iintih Awim toh. Ingat kare sintan Aim dengan Dawid rewar Ayum.”