Read Ngaju 2 KRONIKA 8 Bible Online

2 KRONIKA 8 - Ngaju bible

2 KRONIKA 8

¹Salomo mamangun Human TUHAN tuntang istana raja hong katahin 20 nyelo.

²Kare lewu je inenga Raja Hiram akae imangue haluli, palus ie manyoho oloh Israel melai intu hete.

³Ie marampas tanah Hamat tuntang Soba

⁴hayak mandehen lewu Tadmor intu padang pasir, palus mamangun haluli lewu eka mingkes bahata intu Hamat.

⁵Lewu hakota Bet-Horon-Ngaju tuntang Bet-Horon-Ngawa imangue haluli jadi lewu je ingaliling awi kota dengan lawang je bauntonggange bahuit.

⁶Tinai ie kea mamangun haluli lewu Baalat tuntang uras lewu eka mingkes bahata, hayak kare lewu eka kareta parang tuntang kudae. Uras rencana gawi mamangun intu Yerusalem, Libanon tuntang hapus tanah je inguasae jari ilaluse.

⁷Uras turonan bangsa Kanaan je dia olih impatei lepah awi oloh Israel metoh ewen manguasa lewu te, iirak awi Salomo akan bagawi paksa. Ewen te, iete oloh Het, Amori, Feris, Hewi tuntang Yebusi. Sampai toh turonan ewen magon jadi rewar.

⁹Oloh Israel dia inyoho bagawi paksa; ewen inenga gawi kilau tantara, pangkalima, kapala kareta parang, tuntang tantara je manungkang kuda.

¹⁰Due ratus lime puluh pagawai inyadia akan manantuani kare oloh je bagawi paksa huang pire-pire eka mamangun.

¹¹Salomo mindah sawae, iete anak raja Misir, bara Lewun Dawid akan huma je puna impendeng akae. Awi Salomo manirok, “Sawangku dia akan melai intu istana ain Dawid, raja Israel, awi uras eka Patin Janji je puji iandak, maka hete eka je barasih.”

¹²Salomo maluput parapah je ingehu akan TUHAN intu hunjun mesbeh je imangue intu hila baun Human TUHAN.

¹³ Kare parapah te ilupute manumon atoran Moses akan andau hai: andau Sabat, pesta Bulan Taheta, tuntang telo pesta genep nyelo, iete pesta Rote Je Dia Iragi, pesta Getem tuntang pesta Tingkap Dawen.

¹⁴Tumon kare atoran bapae Dawid, Salomo mator kare gawi genep andau akan kare imam tuntang akan kare oloh Lewi je patut manyanyi tara akan TUHAN tuntang mandohop kare imam hong malalus kare gawin sombayang. Tuntang kare oloh je manjaga Human TUHAN imbagi hong kare kalompok akan genep lawang, tumon atoh Dawid rewar Hatalla.

¹⁵Uras atoh Dawid akan kare imam tuntang oloh Lewi tahiu kare gudang tuntang kare taloh beken, inumoe titi-titip.

¹⁶Maka kare gawi mamangun je irencana Salomo jari hapus. Uras gawi, nampara bara mandak galang sampai Human TUHAN jari imangun, jari ilalus dengan bahalap.

¹⁷Limbah te Salomo haguet akan Esion-Geber tuntang akan Elot, kare lewu pelabuhan intu pantai telok Akaba intu lewu Edom.

¹⁸Raja Hiram mangirim akae kare kapal je impamiar awi oloh ayun Hiram kabuat hayak oloh kapal je bara pangalaman. Ewen barayar akan lewu Opir hayak oloh ayun Salomo tuntang manduan bara hete 15.000 kilogram amas palus mimbite akan Salomo.