Read Ngaju 2 KRONIKA 9 Bible Online

2 KRONIKA 9 - Ngaju bible

2 KRONIKA 9

¹ Ratu lewu Seba mahining tahiu kahain Salomo. Palus ie dumah akan Yerusalem mauji Salomo dengan paisek je bahali-hali. Ie dumah impahayak are toto oloh ayue tuntang kare onta je sarat mamuat rarampah, batu permata, tuntang are toto amas. Metoh hasondau dengan Salomo, ratu te misek uras macam paisek je tau iniroke.

²Uras paisek te tau inombah awi Salomo, jaton ije je pahalau bahali akae.

³Ratu te mite kabuat kapintar Salomo. Ie mite istana je imangun Salomo,

⁴atoran gawi akan kare pagawai istana, tuntang pakaian seragam, tinai huma eka ewen melai. Ie mite panginan je inyarongan, tuntang pakaian kare ayang je manyarongan oloh hong pasta; ie mite kea parapah je iluput Salomo intu Human TUHAN. Urase taloh handiai te mawi ratu lewu Seba te mangkeme hengan.

⁵Palus ie hamauh dengan Raja Salomo, “Uras je ihiningku intu lewungku tahiu Tuan tuntang kapintar Tuan, puna toto!

⁶Bihin aku hindai olih percaya, tapi limbah aku dumah tuntang mite uras taloh te dengan matangku kabuat, harue aku percaya. Ampie uras taloh je ihiningku te hindai sampai satengahe bara ije gitangku katika toh. Toto kapintar kaharati tuntang panatau Tuan labih hai bara je imbarita akangku.

⁷Lalehan katuahe kare pagawai je manaharep manyang Tuan tuntang harajur bagawi akan Tuan sampai tau mahining bara Tuan kabuat kare ajar tahiu kapintar kaharati!

⁸Tara akan TUHAN, Hatallan Tuan! Dengan mangkat Tuan jadi raja uka marentah hapan aran Ayue, Ie mamparahan kahain kasanang Aie dengan Tuan. Awi Ie sinta ungkup Israel tuntang handak uka ewen tetep aton, maka Ie mangkat Tuan jadi rajan ewen, uka Tuan tau mandehen atoran tuntang kaadilan.”

⁹Limbah te ratu lewu Seba te manyarah akan Salomo kare panenga je imbite, iete labih bara 4.000 kilogram amas tuntang are batu permata hayak rarampah. Dia puji tinai Salomo manarima rarampah je kalote kahalape kilau je inenga awi ratu Seba te akae. (

¹⁰Oloh ayun Raja Hiram tuntang oloh ayun Raja Salomo je mimbit amas bara Opir akan Salomo, mimbit kea batu permata tuntang kayu candana.

¹¹Kayu te ihapan Salomo akan mawi tangga intu Human TUHAN tuntang intu istanae, tuntang hapa mawi kacapi tuntang gambus akan kare-kare oloh je manyanyi. Hindai puji aton je kilau te intu lewu Yuda).

¹²Beken bara baleh panenga je bahut inenga awi Salomo, Salomo kea manenga akan ratu bara Seba te uras taloh je ilakue. Limbah te ratu Seba buli akan lewue impahayak kare oloh ayue je omba mampahayak ie.

¹³Genep nyelo Raja Salomo manarima bilak 23.000 kilogram amas,

¹⁴hindai iitong pajak bara kare sadagar tuntang oloh dagang. Kare raja Arab tuntang kare gubernur Israel kea manenga kare amas tuntang perak akae.

¹⁵Salomo manampa 200 talawang hai bara amas tinih. Amas te ihapan akan genep talawang labih kurang 7 kilogram.

¹⁶Ie kea manampa 300 talawang amas je labih korik, amas je ihapan akan genep talawang korik te kurang labih 3 kilogram, urase bara tinih. Kare talawang te iingkes intu huma balai je arae Balai Kayuan Libanon.[5]

¹⁷Raja kea mawi karosi karajaan je hai je inampa bara gading tuntang ihias hapan amas tulen.

¹⁸Karosi te balenge tuntang intu hasansila aton hampatong singa. Karosi te kea halampat jahawen, tuntang ije eka bapijak je ingalukop dengan amas. Eka bapijak te impahinje dengan karosie.

¹⁹Hong tapakan hila sambil tuntang tapakan hila gantau, genep lampat karosi te aton hampatong singa — samandiaie duewalas hampatong. Dia puji aton karosi kilau te intu kueh bewei.

²⁰Uras pakakas hapa mihop ain Salomo inampa bara amas, tuntang uras pakakas je intu Balai Kayuan Libanon, inampa kea bara amas tulen. Hong jaman Salomo, perak iitong kilau ramo dia barega.

²¹Ain Salomo are kapal hai je balayar intu tasik je lombah hayak kare kapal Raja Hiram. Telo nyelo sinde kare kapal te buli mimbit amas, perak, gading, bakei tuntang burong haruei.

²²Raja Salomo labih pintar tuntang labih tatau bara raja je kueh bewei hong kalunen.

²³Uras raja handak toto manyondau Salomo uka mahining ajar kapintar je inenga Hatalla akae.

²⁴Genep bitin ewen dumah hayak mimbit panenga akan Salomo, ewen manenga kare ramo bara perak, amas, pakaian, pakakas parang, rarampah, kuda tuntang kalidai. Kalote genep nyelo.

²⁵ Ain Raja Salomo kea aton 4.000 kandang akan kuda tuntang kareta. Kuda parange aton 12.000 kongan. Belahe ingkese intu Yerusalem, tuntang kalabiee intu pire-pire lewu akan eka kare kareta parange.

²⁶ Ie kuasa mahunjun uras raja intu tanah manampara bara Sungei Euprat sampai akan lewu Pilistin tuntang sampai helat dengan Misir.

²⁷ Hong jaman Salomo marentah, perak kilau ramo dia barega hong Yerusalem, sama kilau batu, tuntang kayu alau Libanon are toto kilau kayu barangai bewei.

²⁸ Salomo mampadumah kuda bara Misir tuntang bara genep lewu beken.

²⁹Sarita beken tahiu Salomo bara tamparae sampai lepah incatet huang buku Sarita Nabi Natan tuntang huang buku Auh tujum Ahia oloh Silo, tuntang huang buku Pangarinah Nabi Ido, je kea mamuat sarita tahiu Yerobeam raja Israel.

³⁰Epat puluh nyelo katahie Salomo marentah intu Yerusalem akan hapus Israel.

³¹Limbah te ie matei tuntang ingubur intu Lewun Dawid. Palus Rehabeam anak hatue ayue jadi raja mangganti ie.