Read Ngaju ESRA 10 Bible Online

ESRA 10 - Ngaju bible

ESRA 10

¹Metoh Esra balakudoa sambil manangis tuntang mangaku dosa intu taharep Human TUHAN, are toto oloh Israel dumah hapumpong, aloh hatue, aloh bawi tuntang anak oloh. Ewen mangaliling ie sambil manangis hai auhe.

²Limbah te Sekhanya anak Yehiel bara jalahan Elam, hamauh dengan Esra, “Ikei badosa intu TUHAN awi jari kawin dengan bawin oloh bangsa beken. Aloh kalote magon aton kaharap akan Israel.

³Ayo itah sumpah dengan Hatalla, je itah kareh maharak uras oloh bawi te hayak dengan kare anak ewen. Ikei kareh manumon kare nasehatm tuntang nasehat kare oloh beken je mahormat parentah Hatalla. Ikei kareh manumon parentah Hatalla.

⁴Ikau ih je musti malalus gawin kabujur. Ikei kareh mandohop ikau hapan salepah atei. Keleh kare taloh te hapan katukas auh sampai hapus.”

⁵Palus Esra manampara bagawi, ie manyoho kare imam kapala, kare oloh Lewi tuntang kare oloh Israel je beken sumpah je ewen kareh malalus palakun Sekhanya te.

⁶Limbah ewen sumpah, Esra haguet bara hila baun Human TUHAN tuntang tame akan eka melai Yohanan anak Elyasib tuntang baramalem intu[16] hete. Ie dia maku kuman atawa mihop awi pehe atei manirok gawin oloh je asale bara eka tawanan te.

⁷Limbah te inyiar ije auh pansanan akan oloh hapus lewu Yerusalem tuntang Yuda, iete akan kakare oloh je jari haluli bara eka tawanan, uka hapumpong intu Yerusalem.

⁸Eweh je dia dumah akan pumpong te katahin telo andau, hapus panataue akan induan tuntang ie dia tinai iitong kilau anggota ungkup oloh lewu. Pansanan te ineken awi kare pamimpin rayat.

⁹Limbah 3 andau, hong tanggal 20 bulan jalatien, uras kare oloh hatue je melai intu tanah Yuda tuntang Benyamin dumah akan Yerusalem tuntang hapumpong intu pakarangan Human TUHAN. Metoh te andau ujan labat. Uras oloh hagenjeh awi kasadingen udara tuntang kea awi pumpong te puna paham baguna.

¹⁰Limbah te Esra mendeng tuntang hakotak dengan ewen. Ie hamauh “Keton jari badosa tuntang mandahang kasalan Israel awi kawin dengan bawin oloh bangsa beken.

¹¹Awi te, keleh mangaku dosan keton intu TUHAN, Hatalla je inyembah awi tato hiang itah, tuntang lalus taloh je manyanang ateie. Keleh mangejau arep keton bara oloh bangsa beken je melai intu lewun itah tuntang harak kare kabalin keton je bara bangsa beken te.”

¹²Kare oloh te tombah hai auhe, koae, “Ikei kareh nahuang manumon kare auh nasehatm.”

¹³Palus koan ewen tinai, “Tapi je dumah intu hetoh are toto, tuntang ujan paham toto. Ikei dia olih mendeng intu luar kalotoh. Mahin tinai jetoh dia pakara je olih impajadi katahin jandau kadue, awi are toto bara ikei je tamput hong dosa toh.

¹⁴Soho kare pamimpin ikei je melai intu Yerusalem tuntang maurus taloh te. Palus genep biti hong kare lewun ikei je sawae oloh bangsa beken, musti dumah intu katika je inukas, hayak dengan kare pamimpin tuntang kare hakim lewue. Tumon te Hatalla kareh dia sangit tinai dengan itah awi perkara te.”

¹⁵Jaton ije biti je manolak rencana te, kecuali Yonatan anak Asael tuntang Yahseya anak Tikwa, indehen awi due biti oloh Lewi, iete Mesulam tuntang Sabetai.

¹⁶Kare oloh tawanan je jari haluli te tetep nahuang malalus rencana te. Awi te Imam Esra mintih[17] pire-pire biti bara kapala jalahan, palus mancatet aran ewen. Hong tanggal ije bulan sapuluh ewen manampara pumpong uka manaliti perkara te.

¹⁷Hong telo bulan limbah te ewen olih mampahapus gawi mariksa kakare oloh hatue je jari kawin dengan bawin oloh bangsa beken.

¹⁸Jetoh daptar aran kare oloh je aton sawae bara oloh bangsa beken: Kare Imam, tadaptar dengan bangsae: Jalahan Yesua dengan kare paharie, kare anak Yosadak: Maaseya, Elieser, Yarib tuntang Gedalya.

¹⁹Ewen hajanji akan pisah dengan sawan ewen palus ewen maluput parapah tabiri hatue akan parapah ampun dosan ewen.

²⁰Jalahan Imer: Hanani tuntang Sebaya.

²¹Jalahan Harim: Maaseya, Elia, Semaya, Yehiel tuntang Usia.

²²Jalahan Pashur: Elyoënai, Maaseya, Ismael, Netaneel, Yosabad, tuntang Elasa.

²³Kare oloh Lewi: Yosabad, Simei, Kelaya (kea inyewut Kelita), Petahya, Yuda, tuntang Elieser.

²⁴Kare oloh je manyanyi: Elyasib Kare tukang jaga lawang Human TUHAN: Salum, Telem, Uri.

²⁵Kare oloh Israel je beken: Jalahan Paros: Ramya, Yesia, Malkia, Miyamin, Eleasar, Malkia tuntang Benaya.

²⁶Jalahan Elam: Matanya, Sakharia, Yehiel, Abdi, Yeremot tuntang Elia.

²⁷Jalahan Satu: Elyoënai, Elyasib, Matanya, Yeremot, Sabad tuntang Asisa.

²⁸Jalahan Bebai: Yohanan, Hananya, Sabai tuntang Atlai.

²⁹Jalahan Bani: Mesulam, Malukh, Adaya, Yasub, Seal, tuntang Yeramot.

³⁰Jalahan Pahat-Moab: Adna, Kelal, Benaya, Maaseya, Matanya, Basaleel, Binui tuntang Manase.

³¹Jalahan Harim: Elieser, Yisia, Malkia, Semaya, Simeon, Benyamin, Malukh tuntang Semarya.

³³Jalahan Hasum: Matnai, Matata, Sabad, Elipelet, Yeremai, Manase tuntang Simei.

³⁴Jalahan Bani: Maadai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai.

³⁸Jalahan Binui: Simei, Selemya, Natan, Adaya, Makhnadbai, Sasai, Sarai, Asareel, Salemya, Semarya, Salum, Amarya tuntang Yosep.

⁴³Jalahan Nebo: Yeiel, Matica, Sabad, Sebina, Yadai, Yoël, tuntang Benaya.

⁴⁴Uras oloh te jari kawin dengan bawin oloh bangsa beken. Palus kare sawan ewen te inulang tuntang iharak hayak dengan kare anak ewen.