Read Ngaju ESRA 3 Bible Online

ESRA 3 - Ngaju bible

ESRA 3

¹Hong bulan uju kare oloh Israel jari manetep hong genep lewu ayu-ayue. Hong tanggal ije bulan te ewen hapumpong intu Yerusalem.

² Palus Yesua anak Yosadak hayak dengan kare sobate kare imam tuntang Serubabel anak Sealtiel dengan tondah kolae, mamangun haluli mesbeh ain Hatallan oloh Israel. Tumon te ewen tau mamapui parapah intu hunjue, tumon kare atoh je tarasurat hong buku ain Moses, rewar Hatalla te.

³ Aloh[4] ewen mikeh dengan oloh lewu te, tapi ewen mamangun kea mesbeh te hong ekae je solake. Palus ewen manampara tinai maluput parapah je ingehu, hong hanjewu tuntang halemei.

⁴ Ewen kea mahaga Andau Hai Tingkap Dawen, tumon atoran; tuntang genep andau maluput parapah je jari inukas akan andau te.

⁵ Beken bara te ewen harajur maluput parapah hayak dengan parapah hong Andau Hai Bulan Taheta, tuntang hong kakare andau hai beken uka manyembah TUHAN. Ewen kea maluput parapah kahias atei akan TUHAN.

⁶Aloh oloh hindai manampara haluli mamangun Human TUHAN, tapi hong tanggal ije bulan uju rayat jari manampara maluput parapah akan TUHAN.

⁷Rayat manyumbang duit akan hapa mupah tukang batu dengan tukang kayu. Ewen kea mangirim panginan, taloh ihop tuntang undus saitun akan kare oloh hong lewu Tirus tuntang Sidon uka inakiri hapan kayu cendana Libanon je aton hong kare lewu te. Kayu te iimbit akan Yapo mahalau tasik. Uras taloh te ilalus rayat tagal sohon Kores, raja Persia.

⁸Maka hong bulan due, intu nyelo kaduee limbah oloh Israel haluli akan Yerusalem, ewen palus manampara mamangun haluli Human TUHAN. Serubabel, Yesua, tuntang kare sobat ewen ije bangsa, kare imam, oloh Lewi, uras oloh je bihin buah tawan, omba bagawi. Kare oloh Lewi je umure 20 nyelo kahunjun inunjok uka mangawas pangun Human TUHAN te.

⁹Palus Yesua, oloh Lewi, dengan kare anake tuntang kare paharie; tuntang kea Kadmiel dengan kare anake (suku Hodawya)[5] haya-hayak mangawas gawin pangun Human TUHAN te. Ewen indohop awi kare oloh Lewi bara suku Henadad.

¹⁰ Metoh kare tukang pangun manampara mandak galang Human TUHAN, kare imam hapakaian jubah tuntang sambil mimbing tarompet palus manalih eka je jari inukas akan ewen mije-mije. Kare oloh Lewi bara suku Asap kea mendeng intu hete sambil mimbing kare garantong korik. Ewen manara aran TUHAN tumon atoran je jari inukas bara jaman Raja Dawid.

¹¹ Rayat manyanyi auh tara akan TUHAN, sambil lulang-luli mulang bagian je pangkalawie, kalotoh auhe, “TUHAN te bahalap; tuntang sintae dengan Israel palus katatahie.” Hapus rayat te basasurak tuntang manara aran TUHAN, awi galang Human TUHAN jari iina.

¹²Are bara marak kare imam, kare oloh Lewi tuntang kare kapala jalahan je jari bakas puji mite Human TUHAN je solake. Katika ewen manyaksi oloh je mandak galang Human TUHAN jetoh, ewen palus manangis hai auhe. Tapi kare oloh beken je aton intu hete basasurak awi kahanjake,

¹³sampai dia olih ingabeken hindai helang surak kahanjak tuntang tangis. Auh ewen te kalote kapahame sampai tarahining bara kejau.