Read Ngaju ESRA 4 Bible Online

ESRA 4 - Ngaju bible

ESRA 4

¹Barita tahiu kare oloh je bihin inawanan te, toh ewen mamangun Human TUHAN, Hatallan Israel, ihining awi musoh oloh Yuda tuntang Benyamin.

² Awi te ewen manyondau Serubabel tuntang kare pamimpin bangsa, palus balaku, “Soho ikei omba mamangun Human TUHAN te, awi ikei sombayang kea intu Hatalla je inyembah kare pahari. Ikei harajur maluput parapah akae bara katika Esar-Hadon, raja Asur mimbit ikei akan hetoh.”

³Tapi Serubabel, Yesua tuntang kare pamimpin bangsa te tombah, “Ikei dia perlu pandohop keton akan mamangun Human TUHAN, Hatallan ikei. Ikei kareh mamangun kabuat tumon parentah Kores, raja Persia, akan ikei.”

⁴Limbah te oloh lewu je jari tahi melai lewu te nampara mampalemo atei oloh Yehudi hayak mampikeh ewen mangat gawin pangun te tau impatende.

⁵Ewen manenga duit suap akan kare pajabat pamarentah Persia uka mambalang rencana oloh Yuda te. Taloh te harajur ilalus katahin pamarentahan Raja Kores sampai pamarentahan Raja Darius.[6]

⁶ Katika Raja Ahasweros manampara marentah, kare musoh oloh lewu Yerusalem tuntang Yuda manyurat auh dawa.

⁷Kalote kea hong jaman Artahsasta, kaisar Persia marentah, kajadian te inagkaluli: Bislam, Mitredat, Tabeel, tuntang kare sobat ewen manyurat akan raja. Surat te inyurat hapan basa Aram,[7] tuntang musti inyalinan katika jete imbasa.[8]

⁸Artahsasta kea manarima surat tahiu Yerusalem. Surat te ingirim awi Gubernur Rehum tuntang Simsai sekretaris Propinsi tuntang indehen awi kare sobat ewen, iete kare hakim tuntang kakare pajabat Persia beken je asale bara Erekh, Bebel, tuntang Susan intu lewu Elam,

¹⁰kea awi kare bangsa beken je jari iimbit awi Asnapar Je Hai tuntang inyohoe manetep intu lewu Samaria tuntang intu kare lewu beken huang propinsi Euprat Barat.

¹¹Auh surat te kalotoh, “Akan Raja Artahsasta je paham ihormat, bara kare rewar Tuan Raja je melai intu Euprat Barat. Tabe.

¹²Keleh Tuan Raja katawan, oloh Yehudi je jari malihi kare tanah beken hong karajaan Tuan Raja, toh manetep hong Yerusalem tuntang kanjerae mamangun haluli lewu je papa tuntang rajin mambarontak te. Ewen jari mampendeng haluli kare dindinge tuntang dia tahi tinai kareh mampajadi kare gawi te.

¹³Amon lewu te olih imangun haluli tuntang kare dindinge lepah impendeng, oloh lewu te kareh dia maku tinai mambayar pajak, palus panghasilan karajaan kareh bakurang.

¹⁴Ikei jari butang kajenta kajorah dengan Tuan Raja tuntang dia nahuang mite Tuan Raja imparugi. Awi te ikei balaku,

¹⁵uka Tuan Raja manyoho mariksa arsip kare tato hiang Tuan Raja. Bara huange Tuan Raja kareh katawan je lewu Yerusalem puna rajin mambarontak tuntang bara horan harajur mamparugi kare raja tuntang kare panguasa propinsi. Oloh lewu te harajur bahali imimpin. Awi te lewu te jari impahancor.

¹⁶Jadi, ikei percaya, je amon lewu te imangun haluli tuntang kare dindinge impendeng, Tuan Raja kareh dia olih tinai manguasa propinsi Euprat Barat toh.”

¹⁷Maka raja mangirim auh tombah kalotoh, “Akan Gubernur Rehum tuntang Simsai Sekretaris propinsi hayak kare sobat ewen je melai intu Samaria tuntang kare lewu beken intu propinsi Euprat Barat.[9] Tabe.

¹⁸Surat je ingirim kare pahari jari inyalinan hayak imbasa akangku.

¹⁹Palus awi parentahku jari iriksa, tuntang puna aton bukti je jari bara horan Yerusalem harajur malawan kuasan kare raja tuntang are bara marak oloh lewu te je mambarontak tuntang mawi kaderoh.

²⁰Puji kare raja je abas marentah intu hete tuntang manguasa hapus propinsi Euprat Barat hayak mawi pajak tuntang upeti.

²¹Awi te, palua parentah akan mampatende gawin kare oloh te, mangat lewu te ela imangun haluli sampai aku manenga parentah beken.

²²Lalus parentahku te bajeleng mangat kare karugingku ela sampai mandahang labih hai tinai!”

²³Sana surat Artahsasta te imbasa akan Rehum, Simsai tuntang kare kawal ewen, palus ewen haguet akan Yerusalem tuntang mamaksa oloh Yehudi mampatende gawi mamangun haluli lewu te.

²⁴ Gawin Human TUHAN jari impatende tuntang dia inontong sampai nyelo kadue Darius, raja Persia marentah.