Read Ngaju ESRA 5 Bible Online

ESRA 5 - Ngaju bible

ESRA 5

¹ Katika te due biti nabi, iete Hagai tuntang Sakharia anak Ido, nampara hakotak hapan aran Hatallan Israel akan oloh Yehudi je melai intu Yuda tuntang Yerusalem.

² Mahining peteh due biti nabi te, Serubabel anak Bealtiel tuntang Yesua anak Yosadak bajeleng haluli mamangun Human TUHAN intu Yerusalem, indohop awi due biti nabi te.

³Tapi Tatnai, gubernur propinsi Euprat Barat, hayak dengan Setar-Bosnai tuntang kare kawal ewen bajeleng dumah akan Yerusalem tuntang misek dengan kare oloh Yehudi, “Eweh manyoho keton mamangun tuntang mangambuah Huma Sombayang toh?”

⁴Ewen[10] misek kea aran kakare oloh je mandohop mampendeng Human TUHAN te.

⁵Tapi Hatalla manantuani tuntang mangalindong kare pamimpin Yehudi te, sampai kare pajabat Persia mamutus dia mahukum ewen helo bara ewen mangirim surat akan Darius tuntang manarima auh panombahe.

⁶Jetoh ie auh pansanan je ingirim ewen akan raja.

⁷“Akan raja Darius je paham ihormat. Keleh Tuan Raja marentah dengan kasanang!

⁸Keleh Tuan Raja katawan, je ikei jari haguet akan propinsi Yuda tuntang mite je Human TUHAN, Hatalla Je Hai, kanjerae imangun haluli dengan kare batu hai tuntang kare dinding je inilap hapan kayu. Gawi te ilalus paham bua-buah ampie tuntang ilalus tumon patut.

⁹Limbah te ikei misek dengan kare pamimpin bangsa te, eweh je jari manyoho ewen uka mamangun haluli Huma Sombayang te tuntang mangambuahe.

¹⁰Ikei kea misek kare aran ewen mangat tau mansanae akan Tuan Raja eweh je mangapala gawi te.

¹¹Ewen tombah, ‘Ikei toh rewar Hatalla je mimbing kuasa hapus kalunen. Ikei metoh mamangun Human TUHAN je impendeng tuntang impahalap katahin bapuluh nyeloe je jari halau awi ije rajan oloh Israel je hai.

¹² Tapi awi kare tato hiang ikei jari mampalembut kasangit Hatalla panguasa hong sorga, maka Ie manyarah ewen akan kuasan Nebukadnesar, raja Babel bara turonan Kasdim. Ie jari mampahancor huma te tuntang mimbit bangsa ikei akan Babel.

¹³ Limbah te Kores jadi raja Babel tuntang hong nyelo je solake raja te marentah, ie mampalua parentah uka mamangun haluli Human TUHAN te.

¹⁴Tinai ie kea malian kare pakakas amas tuntang perak je ihapan huang Human TUHAN tuntang je induan bara Yerusalem awi Nebukadnesar palus inamean akan huang human dewa intu Babel. Kare pakakas te inyarah awi Raja Kores akan oloh je bagare Sesbasar, je jari iangkate jadi gubernur Yuda.

¹⁵Raja manyoho ie manduan kare pakakas te tuntang maliae akan Human TUHAN intu Yerusalem, tuntang mamangun haluli huma te.

¹⁶Palus Sasbasar dumah akan Yerusalem tuntang mandak galang huma te. Bara wayah te sampai toh gawi mamangun te ilalus harajur, tapi hindai kea hapus.’

¹⁷Amon Tuan Raja manyoho, ikei balaku uka inantuani huang arsip karajaan intu Babel. Tumon te olih ingatawan en toto aton parentah Raja Kores uka mamangun haluli Human TUHAN te intu Yerusalem toh. Limbah te ikei balaku barita tahiu putusan Tuan Raja tahiu perkara te.”