Read Ngaju ESRA 6 Bible Online

ESRA 6 - Ngaju bible

ESRA 6

¹Limbah te Raja Darius marentah, uka arsip karajaan je iingkes hong Babel iriksa.

²Tapi catetan tahiu taloh te sondau dia hong Babel, malengkan intu lewu Ahmeta intu daerah Media. Catetan inyurat intu ije balon surat je auhe kalotoh,

³“Hong nyelo je solake Raja Kores marentah, ie mampalua parentah uka Human TUHAN intu Yerusalem imangun haluli kilau eka oloh mimbit parapah tuntang mangehue. Kagantong Huma te musti 27 meter tuntang kabukae 27 meter kea.

⁴Kare dindinge musti imangun kalotoh, intu genep hunjun batu tilap telo musti ingkepan ije kabilap papan. Ongkose musti inanggong awi kas karajaan.

⁵Kalote kea kare pakakas amas tuntang perak je ihapan intu Human TUHAN tuntang jari induan bara Yerusalem awi Raja Nebukadnesar hayak imbit akan Babel, musti ilian akan ekae solake.”

⁶Limbah te Darius mangirim auh tombah kalotoh, “Akan Tatnai, gubernur propinsi Euprat Barat, tuntang Setar-Bosnai, hayak kare pajabat intu Euprat Barat. Ela manderoh kare oloh Yuda te.

⁷Ela mahalang gawin pangun Huma Sombayang ewen. Keleh gubernur Yuda tuntang kare pamimpin Yehudi mamangun haluli Huma te.

⁸Hayak toh aku marentah kare pahari uka mandohop ewen huang gawi mamangun te hapan cara toh: Uras kare ongkos pangun te musti induan bara hasil pajak karajaan intu propinsi Euprat Barat tuntang musti imbayar akan kare oloh te, dia tau ilanda-landar.

⁹Beken bara te en bewei je imerlu manumon auh kare imam intu Yerusalem, paribasae kilau sapi hatue je tabela, tabiri hatue tuntang anak tabiri indu parapah akan Hatalla je kuasa hong sorga, kea gandom, uyah, anggor tuntang undus saitun, musti inenga akan ewen genep andau tuntang dia tau laya.

¹⁰Keleh malalus kare taloh te uka ewen tau maluput parapah je manyanang atei Hatalla je kuasa hong sorga, tuntang uka ewen balaku berkat akangku tuntang akan kare anakku.

¹¹Aku marentah uka oloh je malanggar parentahku toh bara humae injawut ije jihi, inajim tapakae, palus inusok intu bitin oloh te sampai tembus. Humae musti ingarak tuntang iawi akan eka rutik.

¹²Keleh Hatalla je jari mintih Yerusalem kilau eka oloh manyembah Ie, mambinasa genep raja atawa bangsa je bahanyi malanggar parentah toh tuntang mancoba mampahancor Human TUHAN intu Yerusalem te. Aku, Darius, jari manenga parentah toh. Keleh malalus auh toh bua-buah.”

¹³Parentah Darius te ilalus bua-buah awi Tatnai, gubernur Euprat Barat, tuntang Setar-Bosnai hayak kare kawal ewen.

¹⁴ Indehen awi kare nabi Hagai tuntang Sakharia, maka kare pamimpin Yehudi manontong pangun Human TUHAN te. Ewen bajeleng mampajadi gawin pangun te tumon parentah Hatallan Israel tuntang parentah Kores, Darius tuntang Artahsasta, kare raja Persia te.

¹⁵Human TUHAN te jadi hong tanggal telo, bulan Adar hong nyelo kajahawen kahum Raja Darius marentah.

¹⁶Limbah te kare oloh Israel, kare imam, kare oloh Lewi tuntang kakare oloh are je bihin inawan akan Babel, manyaksi Human TUHAN te dengan kahanjak atei.

¹⁷Hong katika te ewen maluput akan TUHAN 100 kongan sapi hatue, 200 kongan tabiri hatue tuntang 100 kongan anak tabiri. Akan parapah ampun dosa iluput due walas kongan sapi hatue, ije kongan akan genep bangsa Israel.

¹⁸Limbah te akan malalus gawi hong Human TUHAN ewen mambaris kare imam tuntang kare oloh Lewi tumon atoran je inyurat hong buku Moses.

¹⁹ Hong tanggal epat walas bulan ije nyelo je rahian tinai, kare oloh je jari buli bara tawanan, mahaga Paska.

²⁰Kakare imam tuntang oloh Lewi jari mawi gawi marasih arep sampai inukas brasih. Limbah te kare oloh Lewi te manyambalih kare meto akan parapah andau Paska akan kare imam, akan ewen kabuat tuntang akan kakare oloh beken je bihin inawanan.

²¹Kare parapah te kinan awi uras kare oloh Israel je jari buli bara tawanan tuntang oloh lewu te je jari malihi cara belom je badosa tuntang dumah uka sombayang intu TUHAN, Hatallan Israel.

²²Uju andau katahie ewen dengan kahanjak atei mahaga Pesta Rote Je Dia Iragi. Ewen paham sanang tagal TUHAN jari mawi raja Asur[11] tau dengan ewen sampai mandohop ewen hong gawi mamangun haluli Human TUHAN, Hatallan Israel.