Read Ngaju ESRA 9 Bible Online

ESRA 9 - Ngaju bible

ESRA 9

¹Limbah kakare taloh te ilalus, pire-pire pamimpin Israel manalih aku. Ewen mansanan je rayat Israel, tuntang kare imam kea, kare oloh Lewi dia mamisah arepe bara kare jalahan oloh je melai lakau hete, iete jalahan Amon, Moab, Misir, Kanaan, Het, Feris, Yebus tuntang Amori. Tinai kare imam tuntang kare oloh Lewi mahin mawie kalote. Ewen urase mawi gawi papa, je ilalus awi kare bangsa te.

²Hatuen oloh Yehudi kawin dengan bawin oloh bangsa beken, sampai ungkup je tantai imbaris akan TUHAN dia barasih tinai. Je pangkaheloe mawi gawi te iete kare pamimpin tuntang pajabat Israel haream.

³Limbah mahining kare taloh te, aku paham basingi sampai marabit pakaiangku tuntang manjawut balau dengan janggutku, palus mondok marak angat ateiku lenyoh.

⁴Aku mondok sambil mandam angatku sampai katika parapah halemei. Limbah te kare oloh dumah mangaliling aku. Ewen mikeh mingat auh ancaman Hatallan Israel akan dosan kare oloh je jari haluli bara eka tawanan te.

⁵Katika parapah halemei nampara iluput, aku hingkat bara ekaku mondok te marak pakaiangku je barabit te. Aku sontop manyembah tuntang manjolok lengengku akan TUHAN, Hatallangku.

⁶Aku hamauh, “O Hatallangku, aku toh mahamen mananggera baungku intu taharep Aim. Dosan ikei hatantilap intu hunjun takolok ikei sampai sempak langit.

⁷Bara jaman tato hiang ikei sampai toh, ikei ungkup Ayum badosa intu Ikau. Jete bukue ikei, kare raja tuntang kare imam ikei jari impakalah awi kare raja bangsa beken, ikei impatei, irampok tuntang imbit jadi tawanan, ikei jari paham inawah, kilau je ampie gitan hong andau toh.

⁸Tapi toh, o TUHAN, Hatallan ikei, Ikau harue ih mamparahan kataun atei Aim dengan ikei. Ikau malapas pire-pire biti bara marak ikei bara gawi kahajipen uka belom sanang hong eka je imbaris Awim toh. Ikau manenga akan ikei pambelom ije taheta.

⁹Katika ikei huang eka ikei ihajipen, Ikau dia malihi ikei. Ikau mawi ikei inyayang awi kare raja Persia tuntang inyoho belom hayak mamangun haluli Human Ayum je batisa awan derepe te. Ikau manenga akan ikei eka bakalindong intu hetoh, intu Yuda tuntang intu Yerusalem.

¹⁰Tapi toh, o TUHAN, Hatalla, limbah kare kajadian te, narai je tau insanan ikei? Ikei jari malihi kare parentah Aim tinai,

¹¹je inenga Awim akan ikei mahalau kare nabi, kare rewar Ayum. Ewen mansanan akan ikei petak je handak ielai ikei ie te dia barasih, awi uras oloh lewue bara saran silae akan saran silae mawi kapapa tuntang kajilek.

¹² Kare nabi te mangahana ikei kawin campur dengan kare oloh te, atawa mandohop ewen te mangat manjadi oloh je tatau sanang. Amon ikei manumon, ikei kareh jari abas tuntang mangkeme hasil petak te tuntang mawaris akan turonan ikei palus katatahie.

¹³Ikei jari badosa tuntang malanggar parentah Aim, tuntang Ikau jari mahukum ikei. Hukum je inenga Awim te dia tumon ehat je patut ikei manarimae. Tapi ikei magon kea inyalamat awim.

¹⁴Jadi, kilen ampie ikei tau malihi kare parentah Aim tinai tuntang kawin campur dengan kare oloh je papa te? Amon ikei malaluse batantu ikau kareh paham sangit sampai mampahancor ikei samasinde tuntang dia manalua aloh ije biti bara ikei belom.

¹⁵TUHAN, Hatallan Israel, ikau adil, aloh kalote ikau manalua ikei belom. Ikei mangaku kasalan ikei Akam; Ikei jaton hak uka dumah intu taharep Aim.”